Fakapapauʻi he Taimí Ni
Mei ha lea ʻi he konifelenisi lahi ʻo ʻOkatopa 2010
ʻOku ou fakamālō ki ha Tamai Hēvani angaʻofa ko ʻEne meʻaʻofa ʻo e tauʻatāina ke filí, pe ko e totonu ke filí. Naʻa tau haʻu kotoa ki he māmaní mo e ngaahi meʻangāue ʻoku fie maʻu ke fai ʻaki e ngaahi fili ʻoku totonú. ʻOku talamai kiate kitautolu ʻe he palōfita ko Molomoná, “ʻOku foaki ʻa e Laumālie ʻo Kalaisí ki he tangata kotoa pē, koeʻuhí ke ne ʻiloʻi ʻa e leleí mei he koví” (Molonai 7:16).
ʻOku ʻātakaiʻi kitautolu ʻe he ngaahi pōpoaki ʻa e filí: “ʻAi tuʻo taha pē pea he ʻikai ha meʻa ia ʻe hoko.” “ʻOua ʻe tokanga ki ai; he ʻikai ʻilo ia ʻe ha taha.” ʻOku ʻi ai maʻu pē ha fili ke tau fai. ʻOku fie maʻu ha loto-toʻa ke fai ʻaki ha fili fakapotopoto—ʻa e loto-toʻa ke tali ʻikai, mo e loto-toʻa ke tali ʻió. ʻOku makatuʻunga e ikuʻangá mei he ngaahi fili ʻoku tau faí.
Tuku ke u vahevahe atu ha sīpinga ʻa Misa Keleitoni M. Kulisiteniseni, ko ha mēmipa ʻo e Siasí pea ko ha palōfesa ʻi he ʻUnivēsiti Hāvātí.
Naʻe fakapapauʻi ʻe Misa Kulisiteniseni heʻene kei taʻu 16 he ʻikai ke ne vaʻinga sipoti he ʻaho Sāpaté. Hili ha ngaahi taʻu mei ai ʻi heʻene hū ki he ʻUnivēsiti ʻOkisifooti ʻi ʻIngilaní, naʻá ne vaʻinga senitā he timi pasiketipoló. Naʻe teʻeki ai ke nau foʻi ʻi he taʻu ko iá pea nau aʻu ai ki he feʻauhi haú.
Naʻe faingofua pē ʻenau mālohi he feʻauhí, pea nau aʻu ai ki he vaʻinga fakaʻosí. Pea naʻe sio ʻa Misa Kulisiteniseni ki he taimi tēpilé ʻo ʻilo ʻoku fai e vaʻinga fakaʻosí ʻi he ʻaho Sāpaté. Naʻá ne ʻalu leva ki he faiakó ʻo fakahā ange ʻene palopalemá. Naʻe fakahā ange ʻe he faiako ʻa Misa Kulisitenisení kuo pau ke ne vaʻinga.
Naʻe ʻalu leva ʻa Misa Kulisiteniseni ki hono loki he hōtelé. Naʻá ne tūʻulutui. Naʻá ne lotu ki he Tamai Hēvaní pe ʻe sai pē ke ne vaʻinga tuʻo taha pē he foʻi vaʻinga ko ʻeni he Sāpaté. Naʻá ne pehē naʻe teʻeki ai ke ʻosi ʻene lotú kuó ne ʻosi maʻu ʻe ia ʻa e talí: “Keleitoni, ko e hā e meʻa ʻokú ke toe fehuʻia mai ai kiate aú? ʻOkú ke ʻosi ʻiloʻi pē ʻa e talí.”
Naʻá ne ʻalu leva ki heʻene faiakó, ʻo kole fakamolemole ange he ʻikai ke ne lava ʻo vaʻinga he foʻi tau fakaʻosí. Naʻá ne ʻalu leva ki he ngaahi fakatahaʻanga ʻo e ʻaho Sāpaté.
Naʻe ako ʻa Misa Kulisiteniseni ʻoku faingofua ange ke tauhi peseti e 100 ʻa e ngaahi fekaú ʻi hono tauhi pē ha peseti ʻe 98.
ʻOku ou kole atu ai kiate kimoutolu ke fakapapauʻi he taimí ni ke ʻoua naʻa toe afe mei he hala ʻoku fakatau ki heʻetau taumuʻá: ko e moʻui taʻengata mo ʻetau Tamai ʻi Hēvaní.