Ngaahi ʻOfefine ʻi Hoku Puleʻangá

Ako ʻa e fakamatala ko ʻení, peá ka feʻunga, pea aleaʻi ia mo e houʻeiki fafine ʻokú ke ʻaʻahi ki aí. Fakaʻaongaʻi ʻa e ngaahi fehuʻí ke tokoni ʻi hoʻo fakamālohia ʻa e kau fafiné pea ʻai ke hoko ʻa e Fineʻofá ko e konga maʻu pē ia ʻo hoʻo moʻui fakafoʻituituí.

Tuí, Fāmilí, Fakafiemālié

Ko e ngaahi ʻofefine kitautolu ʻo e Tamai ʻi Hēvaní. ʻOkú Ne ʻafioʻi mo ʻofeina kitautolu, pea ʻi ai Haʻane palani maʻatautolu. ʻOku kau ʻi he palani ko iá ʻa e haʻu ki he māmaní ʻo ako ke fili ʻa e leleí mei he koví. ʻI heʻetau fili ke tauhi e ngaahi fekau ʻa e ʻOtuá, ʻoku tau fakaʻapaʻapaʻi ai Ia mo ʻiloʻi hotau tuʻunga ko e ngaahi ʻofefine ʻo e ʻOtuá. ʻOku tokoni e Fineʻofá ke tau manatuʻi ʻa e tukufakaholo fakalangi ko ʻení.

ʻOku fakamālohia mo poupouʻi kitautolu ʻe he Fineʻofá mo hono hisitōliá. Naʻe pehē ʻe Suli B. Peki, ko e palesiteni lahi ʻo e Fineʻofá: “ʻI hoʻomou hoko ko e ngaahi ‘ofefine ‘o e ‘Otuá, ‘oku mou teuteu ai ki ha ngaahi ikuʻanga taʻengata pea ‘oku ‘iloʻi ai homou tuʻunga ko e fefiné, natula mo e fatongia ke faí. ‘E makatuʻunga e lavameʻa ‘a e ngaahi fāmilí, tukui koló mo e Siasí ni, mo e palani mahuʻinga ‘o e fakamoʻuí ‘i hoʻomou faivelengá. … Naʻe fakataumuʻa [‘e heʻetau Tamai Hevaní] ‘a e Fineʻofá ke langaki hake Hono kakaí mo teuteuʻi kinautolu ki he ngahi tāpuaki ‘o e temipalé. Naʻa Ne fokotuʻu ‘a e [Fineʻofá] ke ngāue ai Hono ngaahi ‘ofefiné ke fenāpasi mo ‘Ene ngaué pea ke nau tokoni ‘i hono langa Hono puleʻangá mo fakamālohia e ngaahi ‘api ‘o Saioné.”¹

Naʻe foaki mai ʻe heʻetau Tamai ʻi Hēvaní ha ngāue pau kiate kitautolu ke tokoni ʻi he langa Hono Puleʻangá. Kuó Ne toe tāpuekina kitautolu ʻaki ʻa e ngaahi meʻafoaki fakalaumālie ʻe fie maʻu ke tau fakahoko ʻaki e ngāue pau ko ʻení. ʻOku tau maʻu e ngaahi faingamālie ʻi he Fineʻofá ke fakaʻaongaʻi ʻetau ngaahi meʻafoakí ke fakamālohia e ngaahi fāmilí, tokoniʻi ʻa kinautolu ʻoku faingataʻaʻiá, pea ako e founga ke moʻui ʻo hangē ko ha kau ākonga ʻa Sīsū Kalaisí.

Naʻe lea ʻa Palesiteni Tieta F. ʻUkitofa, ko e Tokoni Ua ʻi he Kau Palesitenisī ʻUluakí ʻo fekauʻaki mo e tuʻunga fakaākongá: “ʻI heʻetau ‘aʻeva faʻa kātaki ‘i he hala ‘o e tuʻunga fakaākongá, ‘oku tau fakahaaʻi ai kiate kitautolu ‘a e lahi ‘o ‘etau tui mo ‘etau loto fiemālie ke tali ‘a e finangalo ‘o e ‘Otuá, kae ‘ikai fai ki hotau lotó.”²

Tau manatuʻi ko e ngaahi ʻofefine kitautolu ʻo e ʻOtuá pea feinga ke moʻui ʻo hangē ko ʻEne kau ākongá. ʻI heʻetau fai iá, te tau tokoni ai ki hono langa ʻo e puleʻanga ʻo e ʻOtuá ʻi he māmaní pea hoko ʻo taau ke foki ki Hono ʻaó.

Mei he Folofolá

Sākalaia 2:10; Tokāteline mo e Ngaahi Fuakava 25:1, 10, 16; 138:38–39, 56; “Ko e Fāmilí: Ko ha Fanongonongo ki Māmani” (Liahona, Nōvema 2010, 129)

Mei Hotau Hisitōliá

ʻI he ʻaho 28 ʻo ʻEpeleli 1842, naʻe lea ai ʻa e Palōfita ko Siosefa Sāmitá ki he houʻeiki fafine ʻi he Fineʻofá ʻo pehē: “Kuo tuku ‘eni kimoutolu ki ha tuʻunga te mou lava ai ‘o ngāue fakatatau mo e ngaahi ongoʻi ‘ofa kuo tō ‘e he ‘Otuá [‘iate kimoutolú]. … Kapau te ke moʻui fakatatau mo e ngaahi faingamālié ni, he ʻikai ke lava ʻo taʻofi ‘a e kau ‘āngeló mei haʻanau hoko ko hao takaua.”³

ʻI hono fakatokangaʻi e mālohi ʻo e Fineʻofá ke tokoni ki he niʻihi kehé pea tokoniʻi e fakafoʻituituí ke tupulaki ʻi he tuí, naʻe talaʻofa ai ʻa Sina D. H. ʻIongi, ko e palesiteni lahi hono tolu ʻo e Fineʻofá, ki he houʻeiki fafiné ʻi he 1893, “Kapau te mou fekumi fakamātoato ʻi homou lotó pea ʻi he tokoni ʻa e Laumālie ʻo e ʻEikí, te mou ʻilo ai e mataʻitofe mahuʻingá, ko e fakamoʻoni ia ki he ngāue ko ʻení.”⁴