Naʻe ʻIkai Ke u Fie Ngāue
Nevila Simeta, Kalefōnia, USA
ʻI hoku taʻu 11, naʻá ku lulululu mo Palesiteni Hauati W. Hanitā (1907–95) ʻi ha konifelenisi fakavahelahi naʻe fai ʻi Siohanasipeeki ʻi Saute ʻAfilika, peá ne pehē mai, “Te ke ʻalu ʻo ngāue fakafaifekau pea te ke hoko ko ha faifekau lelei ʻi ha ʻaho.”
Ko e tokolahi taha e kau talavoú te nau fakamahuʻingaʻi e ngaahi lea ko iá ʻo taʻe ngata. Ka naʻe ʻikai ke u pehē au. ʻI he taʻu ʻe 10 hono hokó naʻe ʻikai ke u fie ʻalu au ʻo ngāue fakafaifekau. Naʻá ku fuʻu tokanga ange au ki he lavameʻa he sipotí mo ʻeku moʻui fakasōsialé. Naʻá ku fakakaukau ʻe mole kotoa e ʻū meʻá ni kapau te u mavahe ʻi ha taʻu ʻe ua. ʻI he ngaahi ʻinitaviu mo ʻeku palesiteni fakakoló mo e fakasiteikí naʻe lahi e ngaahi ʻuhinga ne u ʻohake ki he ʻikai ke u fie ngāue fakafaifekaú.
ʻI hoku taʻu 21 naʻe ʻikai pē ke u fie ngāue fakafaifekau, peá u ʻaʻahi ki hoku fāmilí ʻi he ʻIunaiteti Siteití ʻi ʻAiouā. Naʻa nau hiki ki ai he taʻu ʻe taha kimuʻá. ʻI heʻeku ʻi ʻAiouaá ne u maʻu ai e faingamālie ke ʻalu ki he Temipale Uinitā Kuata Nepulasikaá mo e kau tāutaha ʻo e koló. Naʻe teʻeki ai ke maʻu hoku ʻenitaumení, pea ne u ʻilo pē te u kau he papitaiso ki he kau pekiá.
ʻI heʻemau aʻu atu ki he temipalé, ne u ʻilo ʻoku ʻikai fakataimitēpileʻi ha papitaiso ia ki he hoʻataá. Ne u pehē, “Sai, ko e hā leva e meʻa te u fai he foʻi houa ko ʻeni ʻe ua mo e kongá?”
Ne u fakakaukau leva ke ʻalu ki he senitā takimamata ʻo e Hala e Kau Māmongá (Mormon Trail) he kauhala ʻe tahá. Hili haʻaku sio ʻi ha faiva miniti ʻe 15 kau ki he kau paioniá, naʻe fakafeʻiloaki mai ha ongo faifekau fefine ke na takimamataʻi aú. Hili haʻana ʻilo ha kiʻi meʻa kau kiate au, naʻe ʻeke mai ʻe Sisitā Kusika pe ko e hā ʻoku ʻikai ai ke u ʻalu ai ʻo ngāue fakafaifekaú. Naʻá ku ʻoatu ai pē e ʻuhinga tatau. Naʻe fakamoʻoni mai ʻa Sisitā Kusika kiate au kau ki he kau paioniá pea mo e ngāue fakafaifekaú.
Hili e ʻaʻahí ne u tangutu he loki talitali ʻo e temipalé peá u fakakaukau. Naʻe fakafokifā kuo hoko pē ʻeku ngaahi ʻuhinga ki he ʻikai ke ngāue fakafaifekaú ko ha foʻi fakakaukau taʻeʻaonga. Naʻe fakamoʻoni mālohi mai e Laumālié ʻoku totonu ke u ʻalu ʻo ngāue fakafaifekau. Naʻe liliu e meʻa kotoa ʻiate au talu ʻeku talanoa mo e ongo faifekau fefiné. Naʻe fakamoʻoniʻi ʻe he Laumālié ki hoku lotó ʻa e meʻa ʻoku fie maʻu ke u faí.
Hili ha ngaahi māhina mei ai ne u ʻilo naʻe talaange ʻe he kihiʻi leʻo siʻí kia Sisitā Kusika ʻoku fie maʻu ke fai pē ha takimamata kiate au. Naʻe ʻikai ke ne ʻiloʻi ʻe ia hono ʻuhingá, ka naʻe ʻi ai ha palani ia ʻa e ʻEikí maʻaku.
Ne u ngāue ʻi he Misiona Kalefōnia Venitulá—ko e misiona lelei taha ia ʻi māmaní—pea langaki ai ha ngaahi feohi fakakaungāmeʻa ʻoku ou ʻamanaki ʻe tolonga ʻo aʻu ki ʻitānití. Naʻe ʻikai ke u tui kia Palesiteni Hanitā ʻi ha taʻu ʻe 10, ka naʻá ne ʻiloʻi moʻoni pē ʻe ia e meʻa naʻá ne lea ʻakí.
Naʻe liliu fakaʻaufuli ʻeku moʻuí, koeʻuhí pē ko ha faifekau fefine naʻá ne ngāue ʻo fakatatau ki he ueʻi ʻa e Laumālie Māʻoniʻoní.