Naʻe ʻIkai Ke u Fakatokangaʻi Kinautolu
Seli Polofiti Haueli, Kalefōnia, USA
ʻI haʻaku lau kimuí ni e Tohi ʻa Molomoná, ne u lau ai e fakatokanga ko ʻení: “Ko e hā ʻoku mou … tuku ʻa e fiekaiá, mo e masivá, mo e telefuá, mo e mahakí, mo e faingataʻaʻiá ke ʻalu ʻiate kimoutolu, pea ʻikai tokangaʻi ʻa kinautolú?” Molomona 8:39
Naʻe ʻikai ke u kei maʻu e ongoʻi nonga mo e fiemālie naʻá ku faʻa maʻu he folofolá, ka naʻe lōmekina au ʻe ha ongoʻi loto-mamahi. Naʻá ku ʻiloʻi fuoloa pē ʻoku ʻikai ko ha tokotaha fakatokanga meʻa au. Ne u fuʻu femoʻuekina he ngaahi ngafa ʻo e moʻuí, hoku fatongiá, mo hoku fāmilí kae ʻikai fakatokangaʻi e ngaahi faingataʻaʻia ʻa e kakai kehé.
Naʻá ku ʻilo ʻoku ʻikai ke u fai e meʻa kotoa te u lavá “ke fefuaʻaki ʻa hoʻomou ngaahi kavengá, koeʻuhí ke nau [lava ʻo] maʻamaʻa; … ke tangi fakataha mo kinautolu ʻoku tangí; ʻio, pea fakafiemālieʻi ʻa kinautolu ʻoku ʻaonga ki ai ʻa e fakafiemālié” (Mōsaia 18:8–9). Naʻá ku loto ke liliu ia; naʻá ku loto ke toe lelei ange. Naʻe ʻikai ke u ʻilo e foungá. Naʻá ku lotu ki he ʻEikí ke tokoni mai kiate au.
Naʻe hoko mai e talí ʻi ha founga naʻe taʻe ʻamanekina mo ʻikai ke u fie maʻu he naʻá ku puke maʻu pē. Naʻá ne toʻo māmālie atu e meʻa kotoa ne u femoʻuekina ki ai kimuʻá. ʻI he fakalalahi ko ia ʻeku puké, ne tuku leva ʻeku ngaahi ʻekitivitī ʻi tuʻá, hoku fatongiá, mo ʻeku ʻalu ki he lotú. ʻOku ou nofo fale pē, ongoʻi tukuhāusia pea ongoʻi ʻoku ʻikai tokanga mai ha taha.
ʻOku ou lotua ʻe fakamoʻui au ʻe he ʻEikí ʻi ha ʻaho. ʻOku ou palōmesi ko e taimi te ne fai ai iá, he ʻikai pē te u fakasiosio kehe. ʻI heʻeku ʻalu ki he lotú, te u vakai pe ko hai ʻoku nofo toko tahá pea ko hai ʻoku ʻikai ke haʻu he ʻaho ko iá ʻo lotú. Te u toʻo ha taimi he uike takitaha ke feinga ke ikunaʻi e maá kae ʻaʻahi ki ha taha ʻoku puke pe faingataʻaʻia pe fie maʻu pē ha kaungāmeʻá. Te u ʻofa ʻi hoku ngaahi tokouá mo e tuofāfiné he ʻaho kotoa—ʻo ʻikai ʻi he Sāpaté pē pe lolotonga e ngaahi ʻekitivitī faka-Siasí.
Te u manatuʻi pea ʻamanaki pē te u moʻui tāu ke fanongo ki he tali mai ʻa e ʻEikí: “Ko e meʻa ʻi hoʻomou fai ia ki ha taha ʻoku kihiʻi siʻi hifo ʻi hoku kāingá ni, ko hoʻomou fai ia kiate aú” (Mātiu 25:40).