Kae ʻOua Ke Tau Toe Feʻiloaki
Laka Atu pea Laka Ki Muʻa
Ne u lotua ke mahino kiate au e founga ki hono fakaleleiʻi ʻo ha loto kuo lavea. Naʻe māmālie pē ʻeku fakatokangaʻi ko e talí ko ha faʻahinga loto ʻe taha ne lavea.
Ne u toki foua ha loto mamahi he faikaumeʻá peá u lahilahi nofo pē ʻi he ʻapi hoku tokouá. Ko e meʻa ne hokó ko ʻema kai ʻa e meʻakai naʻe ʻikai ke fakatupu ivi, sio TV, mo mohe ʻataʻatā pē. ʻI haʻaku ʻā hake mei he taha ʻo ʻeku mohé, ne u talaange, “ʻOku ʻikai ke u tui ʻoku kaunga lelei ʻeta nofo fakatahá.” Naʻá ma kakata, pea ʻi he pō ko iá ne u fakamālō ki he Tamai Hēvaní ʻi heʻeku fakatokangaʻi hake ʻoku ou ngāue ʻaki hoku tokouá ke u ongoʻi fiemālie ai he tuʻunga ʻoku ou lolotonga ʻi aí pea lotua ha mahino lahi ange ki he meʻa te u fai pea laka atu ai ki muʻa ʻi heʻeku moʻuí. ʻI he ngaahi māhina hokó naʻe tali ʻa e lotu ko iá ʻi hono maʻu tahataha ʻa e mahino ki he meʻa ko iá.
ʻI heʻeku ʻalu ki ha fakataha ʻa e Fineʻofá he ʻaho hono hokó ne u fakatokangaʻi ai e folofolá ni: “Pea te ne fakafiemālieʻi ʻa e loto ʻo e niʻihi kehé, pea kākaaʻi fakaolololo ʻa kinautolu ke nau fiemālie fakakakano pea nau pehē: ʻOku lelei ʻa e meʻa kotoa pē ʻi Saione, ʻio, ʻoku tuʻumālie ʻa Saione, ʻoku lelei ʻa e meʻa kotoa pē. … Ko ia, malaʻia ia ʻa ia ʻoku nofo fakafiefiemālie pē ʻi Saioné!” (2 Nīfai 28:21, 24). Naʻá ku faʻa lau maʻu pē ʻa e ngaahi veesi ko ʻení ʻa ia naʻá ne fakamatalaʻi e feinga ʻa e kau fielahí ke fai ha lotú. Naʻe ʻikai ke u fakakaukau ʻoku ou nofo fakafiefiemālie ʻi Saione ʻi hono fakamoleki ha taimi lahi mo hoku tokouá. Ka naʻe kamata ke u fakatokangaʻi naʻe ʻikai ke u fekumi ki ha fakamoʻui, ka naʻá ku fekumi pē ki ha fakafiemālie. Naʻá ku fakapapauʻi ʻi he mōmeniti ko iá ke feinga mālohi ange ke u mavahe mei hoku tuʻunga fiemālié.
Naʻe tokoni ʻa e fili ko iá, ka naʻe lahi ange ʻeku fakatokangaʻi ʻeku taʻefeʻungá ʻi heʻeku mavahe mei hoku tuʻunga fiemālié, pea ʻai ai ke u fakaangaʻi pē au. ʻI he taimi ne u fakahā e ngaahi ongo ko iá ki ha kaungāmeʻá, naʻá ne talamai, “ʻIkai ko ha meʻa fakafiefia ia ke tau fakamolemoleʻi pē kitautolu?” Naʻe tokoni ʻene talí ke u holi ke toe lahi ange ʻeku fakamolemoleʻi ʻeku ngaahi tō nounoú—ʻo ʻikai fiemālie pē ʻo hangē ko kinautolu ko ia ʻoku nofo “fakafiefiemālie ʻi Saioné.”
Naʻá ku fakatokangaʻi hake ʻi ha ʻaho ʻe taha he lolotonga ʻeku lau e Molomona 2:13–14: “Naʻe ʻikai tupu ʻenau loto-mamahí ki he fakatomalá, koeʻuhí ko e angalelei ʻa e Otuá; ka ko e loto-mamahi ia ʻa e kau malaʻiá, koeʻuhí ʻe ʻikai tuku maʻu pē ʻe he ʻEikí ke nau fiefia ʻi he fai angahalá. Pea naʻe ʻikai te nau haʻu kia Sīsū mo e loto-mafesifesi mo e laumālie fakatomala.” Naʻe mahino kiate au ʻoku hanga heʻeku ongoʻi taʻe lavameʻá ʻo taʻofi ʻeku tupulaki fakatāutahá, pea kamata ke u fakalaulauloto ki he meʻa ʻe fie maʻu ʻe he mamahi moʻoní. Naʻá ku maʻu e talí ʻi he Lautohi Faka-Sāpaté.
Naʻe tā ʻe heʻemau faiakó ha laine ʻi he palakipoé, pea fakahingoa e ngataʻanga ʻe tahá ko e, “Fuʻu fakamāuʻi fefeka pē kitautolú” pea fakahingoa e ngataʻanga ʻe tahá ko e, “Kai mo inu mo fiefia.” Naʻa mau talanoa ʻo kau ki he fakaʻehiʻehi mei he ʻai ha meʻa ke fuʻu tōtuʻa pe siʻisiʻi. Naʻá ku fifili pe ko e hā e ngaahi lea ʻe tuʻu ʻi loto-mālie ʻo e laine ko iá, pea naʻe tataki ʻe he Laumālié ʻeku fakakaukaú ki he kupuʻi lea “ko ha loto-mafesifesi mo ha laumālie fakatomala.” Naʻe hangē kiate au ko e tali ko ia ki he fuʻu fakamāuʻi fefeka pē kitautolú ʻe lava ke fakamatalaʻi ia ko ha laumālie fakatomala—ko ha taha ʻoku fakatomala, tali e tokoni ʻa e ʻEikí, pea houngaʻia Heʻene ʻaloʻofá. Ko e faitoʻo ko ia ki he fakafiefiemālie ʻi Saioné ʻe lava ke ui ko ha loto-mafesifesi—ko ha taha kuo ueʻi lahi ke liliu pea fakamoʻui.
Naʻe akoʻi ʻe he Fakamoʻuí, “Pea te mou ʻoatu kiate au ʻa e feilaulau ko e loto-mafesifesi mo e laumālie fakatomala” (3 Nīfai 9:20). ʻOku hounga kiate au ʻa ʻeku ʻiloʻi ko ʻeku fekumi ko ia ki he tokoni ʻa e ʻEikí ke tuku ai e fakafiefiemālie ʻi Saioné mo fakaʻehiʻehi mei hono fakamāuʻi fefeka pē aú, ʻoku ou fai ai ha feilaulau lelei kiate Ia—ko ha feilaulau ʻoku tokoni ke laka ai ki muʻa ʻeku moʻuí.
Tā fakatātaaʻi ʻo e ʻatá ʻe Christina Smith