Fokotuʻumaʻu ʻe he Polokalama Seminelí ʻi he Māmaní ʻa e Fānau Akó ʻi he Ongoongoleleí
ʻOku maʻu semineli ʻa Militoni Lisi ʻo Potukalí ʻi he falelotu honau feituʻú. ʻOku kalasi pē ʻa Feleisa Kalafi ʻo Tasimēnia ʻi ʻAositelēliá ʻi ʻapi pea ko ʻene faiakó pē ʻene faʻeé. ʻOku kolosi pē ʻa Lōleni Houma ʻo ʻIutā ʻi he USA ki he kauhala ʻe tahá lolotonga e piliote hono ua ʻo e ʻakoʻanga māʻolungá ʻo kalasi fakahili ʻaho ai; ʻoku kalasi fakauike ʻa Peni Kilipati ʻo Veamonitī ʻi he USA, kimuʻa pea fai e Mutualé; pea kalasi fakaʻaho ʻa Makenisī Molili ʻi ʻAlapama ʻi he USA ʻo fakafou ʻi he ʻInitanetí. ʻOku kalasi ʻa Tauna Paaka ʻo Kōleá he taimi 10 poʻulí, lolotonga iá ʻoku ʻā hengihengia hake ʻa Seimi Kuliniuti ʻo Niu Mekisikou ʻi he USA he taimi 4 pongipongí ke ne maʻu atu e taimí ki heʻene kalasí he 5:15 pongipongí.
ʻOku muimui e toʻu tupú ni kotoa—mo ha niʻihi kehe ʻe meimei toko 370,000 hangē pē ko kinautolú—ki he faleʻi ko ia ʻa e palōfitá ke fakamuʻomuʻa e seminelí ʻi heʻenau moʻuí.
Naʻe kehekehe pē hono fakahoko ʻo e polokalama seminelí, ʻa ia ʻoku fakamanatu hono taʻu 100 he taʻú ni, ʻi ha ngaahi taimi kehekehe, pea naʻa mo e ʻahó ni, ʻoku faʻa fie maʻu ke liliu ia ke feʻunga mo e ngaahi fie maʻu fakafoʻituituí pea mo e ngaahi tūkunga fakalotofonuá. Pea neongo e kehekehe ʻo e taimí mo e feituʻú, ʻoku kei tatau pē ʻa e meʻa ʻe taha: ʻoku tokoni hono ako ʻo e ongoongoleleí ki hono fakamālohia ʻo e tou tupú ʻi heʻenau ngaahi fakamoʻoni ki he Fakamoʻuí mo ʻEne ongoongoleleí
ʻI he taimi ne fuofua kau atu ai ʻa Militoni Leiasi taʻu 17 ʻo Potukalí ki he seminelí, ko ha kiʻi kulupu tokosiʻi pē ʻo ha toʻu tupu ne nau fakataha mai ʻi he Tokonaki takitaha he ko honau tokolahi ne nau kau atu ki ha ngaahi sipoti mo ha ngaahi ʻekitivitī kehe ne fie maʻu ki ai e fakamālohisino pea mo ha ngaahi ʻekitivitī fakaʻaho kehe.
Ka ko ʻeni ʻoku kau atu ʻa Militoni ki he Seminelí he lolotonga e uiké—taimi ʻe niʻihi kimuʻa pea kamata e akó pea taimi ʻe niʻihi he tuku ʻa e akó. Kuo pau ai ke ʻā pongipongia ʻa Militoni, pea ʻi he taimi ʻe niʻihi kuo pau ke ne liʻaki ai ha ngaahi faingamālie fakasōsiale kae lava ʻo ʻalu ki he kalasí.
Ka neongo ia ʻoku ʻikai lau ʻe Militoni ko ha feilaulau ʻa e seminelí. Naʻá ne pehē, “ʻOku hangē ia ha faingamālié.” ʻOku ʻamanaki ʻa Militoni ke ne muimui atu ʻi hono tufefine ʻoku lolotonga ngāue fakafaifekaú pea ko e seminelí ko e taha ia ʻo e ngaahi founga ʻokú ne teuteu aí. Naʻá ne pehē, “ʻI he ngaahi faingataʻá ni kotoa, ʻoku ou ʻilo ʻoku feʻunga pē ia.”
Naʻe papitaiso ʻa Tia Lasino taʻu 18 ʻo Filipainí ʻi hono taʻu 14 pea kamata ke ne ʻalu ki he seminelí hili ha taimi nounou mei ai. Naʻá ne fakakaukau ko ha kalasi angamaheni pē ʻeni ʻa ia ʻe pau ke ne fai ai ha ngaahi ngāue mei ʻapi, ngaahi lea, pea mo ha ngaahi tākiekina fakatoʻumeʻa ʻoku haʻu fakataha mo iá. Ka naʻá ne pehē, “ʻoku ʻomi ʻe he seminelí ha mālohi kiate au ke u ikunaʻi e ngaahi ngāue ʻoku ou maʻu mei he akó. ʻOku ou ongoʻi ʻoku ʻoku fakaivia au peá u fiemālie ʻi heʻeku ʻalu ki he seminelí.”
Ke lau ʻo kau ki he ngaahi feilaulau mo e ngaahi lavameʻa ʻa e fānau semineli ʻi māmaní hono kotoa, kumi ʻa e “Seminary Program Anchors Students in the Gospel” ʻi he news.lds.org.
Fānau ako ʻi he seminelí ʻi Uetelou, ʻi Siamane.
© IRI