Ko e Meʻa ʻOku Tau Tui Ki Aí

ʻOku Tau Poupouʻi Hotau Kau Takí

ʻOku tui e Kau Māʻoniʻoni ʻi he Ngaahi ʻAho Kimui Ní ko Sīsū Kalaisi tonu ʻa e ʻulu ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOkú Ne ui ʻi he ueʻi fakalaumālie e kau palōfita mo e kau ʻaposetolo ke tataki Hono Siasí. Kuo foaki ʻe he ʻEikí ha mafai ki he kau taki ko ʻení ke ui mo ha niʻihi kehe ke ngāue ʻi he Siasí, hangē ko e kau mēmipa ʻo e Kau Fitungofulú. ʻOku fakahoko atu leva ʻe he Kau ʻAposetoló mo e Kau Fitungofulú ʻa e uiuiʻi ʻo e kau palesiteni fakasiteikí, pea nau ui ʻe kinautolu ha kau pīsope pea ui ʻe he kau pīsopé ha kau mēmipa ke ngāue ʻi he ngaahi fatongia kehekekehe ʻi he uōtí. Pea ʻoku tataki ai ʻe he mafai ʻo e lakanga fakataulaʻeikí mo e maʻu fakahaá ʻa e ngaahi uiuiʻi ʻi he Siasí ni mei he tuʻunga fakaemāmani lahí ʻo aʻu ki he kāingalotu fakalotofonuá.

ʻOku tau maʻu ha faingamālie ke hikinimaʻi—poupouʻi, tokoni, lotua—e niʻihi takitaha ko ʻení ʻi honau uiuiʻí. ʻOku tau fakahā ʻetau loto ke fai iá ʻi hono hiki hotau nima toʻomataʻú ʻi he taimi ʻoku ui mai ai honau hingoá ʻi he konifelenisi lahí, konifelenisi fakasiteikí, konifelenisi fakauōtí, pe houalotu sākalamēnití. ʻI hono hiki ko ia hotau nimá ko ha fakamahino ia kiate kitautolu, mo kinautolu pea mo e ʻEikí ʻoku tau poupouʻi kinautolu.

ʻOku ʻikai hangē hono hiki hotau nimá ke poupouʻi ha tahá ko hono fili ko ia ʻo ha taha ki ha lakangá. Kuo ʻosi ui ʻe he ʻEikí e tokotaha ko iá ki he fatongia ko iá ʻo fakafou ʻi ha taha ʻokú ne maʻu e mafai ʻo e lakanga fakataulaʻeikí ke fakahoko e ui ko iá. Ko ʻetau hikinimá ko hano fakahā pē ia ʻo e falala moʻoni ki he tokotaha ko iá, he ʻoku tau ʻiloʻi kuo ui ia ʻe he ʻOtuá ʻo fakafou mai he kau taki lakanga fakataulaʻeiki ʻoku tau poupouʻí.

Te tau lava ke poupouʻi e Kau Taki Māʻolungá mo hotau kau takí mo e kau ʻōfisa fakalotofonuá ʻi ha ngaahi founga kehekehe:

• ʻAki ʻetau tuí mo hono lotua kinautolú.

• ʻAki e muimui ki heʻenau faleʻí.

• ʻAki e tokoni ʻi he taimi ʻoku nau kole mai ai kiate kitautolú.

• ʻAki hono tali e ngaahi uiuiʻi ʻoku nau ui kitautolu ki aí.

ʻOku fakamahino ʻe heʻetau loto leleí, tuí, mo e feohi fakatokouá ʻetau poupou ki he kau takí.

1. ʻOku tau poupouʻi e Kau Taki Māʻolunga ʻo e Siasí.

2. ʻOku tau fakahā ʻi hono hiki hotau nimá, te tau poupouʻi hotau kau taki fakalotofonuá mo e niʻihi kehe naʻe ui ke ngāue maʻatautolú.

3. ʻOku tau poupouʻi hotau kau takí ʻaki e muimui ki heʻenau faleʻí.

4. ʻOku tau poupouʻi hotau kau takí ʻaki hono tali e ngaahi uiuiʻí, he ʻoku fai mai e ngaahi uiuiʻí kiate kitautolu “ʻe kinautolu ʻoku nau maʻu ʻa e mafaí” (Ko e Ngaahi Tefito ʻo e Tuí 1:5).

5. ʻOku tau poupouʻi hotau kau takí ʻaki ʻetau lotua kinautolú (vakai, T&F 107:22).

Ke maʻu ha fakamatala lahi ange, vakai, Ngaahi Akonaki ʻa e Kau Palesiteni ʻo e Siasí: Siosefa F. Sāmita (1998), vahe 24; mo e Ngaahi Akonaki ʻa e Kau Palesiteni ʻo e Siasí: Siaosi ʻAlipate Sāmita (2011), vahe 6.

“Te mou tuʻu maʻu ‘i he fakapapau ne mou fai ki he ‘Eikí mo e niʻihi kehé ‘i hoʻomou hikinimá, ‘oku mou taumuʻa kotoa ke poupouʻi ‘a e kau ‘ōfisá ni ‘i he ngaahi houalotu kehekehe ‘oku nau ‘i aí, ‘o … mou fakahoko ‘a e meʻa kotoa te mou lava ke tokoni ai kiate kinautolú, ke ‘aonga kiate kinautolu, tapuakiʻi kinautolu, pea mo fakaʻaiʻai kinautolu ‘i he ngāue lelei ‘oku nau kau ki aí.”

Palesiteni Siosefa F. Sāmita (1838–1918), Ngaahi Akonaki ʻa e Kau Palesiteni ʻo e Siasí: Siosefa F. Sāmita (1998), 256.

ʻI laló: faitā ʻa John Luke; toʻomataʻú: faitā ʻa Leslie Nilsson; tā fakatātāʻi ʻo e ʻatá ʻe Craig Dimond mo Welden C. Andersen