Sa Manaomia Lo’u Toe Foi i Tua

Nestor Querales, Potukale

I se tasi po, a o ou galue o se taitai perisitua i le siteki i Loulé, Potukale, sa ou momoliina atu nisi o le autalavou i o latou aiga ina ua uma se gaoioiga a le siteki. Sa leva le afiafi, ma a’o alu atu la’u taavale i le fale ina ua uma ona momoli le autalavou, sa ou afe i se auala pogisa i se eria maotua e tau leai ni taavale. O le auala na ou uia ai se auala laupapa laitiiti ma vaaia ai se sulu o emo mai i lo’u itu taumatau i lalo o le vaitafe e pei o se afi.

Ona o le susu o le ea o le po, sa ou faapea ai, e tusa lava foi pe o i ai se afi, o le a vave ona pe i le susu, o lea na ou toe taulai ai i le auala i luma.

Ae peitai, sa na o ni nai mita na ou alu ai, ae ou faalogoina se leo na fai mai, “Taofi!” Sa ou te’i aua sa ou alu na o a’u, ae sa ou le ano i ai ma faaauau ona ou alu. Ona oo mai lea o se leo o le faititili, “Taofi ma toe foi i tua!” Sa vave ona ou toe liliuina le taavale ma toe foi i tua. A o ou faia, sa ou fesili atu i le Tama Faalelagi, “le Alii e, o le a lea mea?” O le taimi lava na ou oo ai i le auala laupapa, sa ou oso ai i fafo mai le taavale, ma sa oo mai i le taimi lava lena le tali a le Alii, aua na ou faalogoina le taualaga mai a se tagata i lalo, “Faamolemole, fesoasoani mai!”

Sa toetoe lava a leai se malamalama, ma sa le mafai ona ou iloa se mea na vagana ai se tamai sulu, lanumoli sa emoemo mai lalo. Sa i ai se vanu tifato i lalo ifo o le auala laupapa, ma o le tau leai o se malamalama, sa ou le iloa ai pe faapefea ona ou fesoasoani. Sa faavave ona ou viliina se numera telefoni mo faalavelave faafuasei, ma sa le’i umi ae oo atu tagata laveai e fesoasoani.

O lena sulu itiiti sa sau mai i se taavale na oso ese ma le auala ae sa i ai ni tagata se toalima. E toalua na maliliu, ae na semanu e oo i se tulaga sili atu ona leaga pe ana ou le faalogo i le leo o le Agaga Paia.

Ou te molimau atu e talanoa mai le Alii ia i tatou e ala mai i le Agaga, a le o se leo malu po o se leo o le faititili. Ou te faafetai ona sa ou faalogo i ai i lena po. Ou te iloa o loo soifua le Alii, ma e alofa o Ia ia i tatou, ma o le Agaga Paia e fesootai mai ia i tatou. Pau le mea e tatau ona tatou faia o le mataala i Lona siufofoga.