O Se Uo Moni
“O loo tutu au uo i ou tafatafa” (MF&F 121:9).
O le tusi sa tusia i se pepa lanumoana ma ni laina fepiopioa’i na faataamilo i tulimanu, e ui la o Ieremia sa na tuuina atu ia te ia, ae na iloa e Melania o le tusi na aumai ia Rasela. Sa fetilofa’i solo Melania. Ua uma le taimi o le faitauga tusi, ma ua tuu ese e tamaiti o lana vasega a latou tusi.
Sa iloa e Melania le ituaiga amataga o le a amata ai le tusi: “Le Uo Sili Peleina.” Sa ataata o ia ia te ia lava. Sa la faauo mai lava ma Rasela mai le vasega lua. “O loo avea pea i maua ma se uo sili ona lelei, e ui ma te matuai eseese lava,” o mafaufauga ia o Melania a o ia tatalaina le tusi.
Le Uo Sili Peleina,
E te ulaula?
—Rasela
Sa te’i Melania. “Ma te o faatasi ma Rasela i taimi uma lava,” o ona mafaufauga ia. “Na te le’i iloa ou te le ulaula?”
Sa ia tusia i le pito i lalo o le pepa:
Leai. Ou te manatu o se mea leaga. Aisea e te fia iloa ai?
—Melania
Sa toe tuu atu e Melania le tusi ia Ieremia. E le’i leva ae toe pasi mai foi. Sa faitau e Melania:
Sa ou nanaina mai se pepa sikaleti mai le fale o le fafine o lo’u aiga. E te manao ta te o ta te faataitai ai pe a tuua le aoga?
—Rasela
Sa sioa atu Melania i le tusi. Ona ia tusia lea:
Rasela! Aisea e te fia ulaula ai? E leaga mo oe! Ou te iloa e te fiafia e faataitai ni mea fou, ae ou te le fia vaai atu ua e afaina mai.
—Melania
Sa toe tusi mai Rasela:
O le a ou le afaina i ni nai sikaleti. Atonu foi e le uma ia te au le pepa atoa.
—Rasela
Sa lagona e Melania e pei o le a tagi. Sa ia tusia:
O oe o la’u uo ma ou te alofa ia te oe. Aua e te ulaula.
—Melania
Sa tilotilo atu Melania a o faitau e Rasela le tusi. O le taimi lenei sa foliga mai o le a tagi Rasela. Sa umi se taimi o ia uuina le tusi. Ona toe tusi mai lea. Ina ua maua e Melania le tusi, sa ia faitauina:
Faafetai. Ou te alofa foi ia te oe. O le a ou le ulaina ia sikaleti.
Sa faafetai Melania ona sa ia filifili e avea ma se faataitaiga. Sa ia lagona le agaga faafetai ona sa fai e Rasela le filifiliga sa’o.
Ata na tusia e Matt Smith