O Faamanuiaga o le Galue Malosi
“Ia tatou faia ai ma le fiafia mea uma ua i ai i lo tatou mana” (MF&F 123:17).
A o ou laitiiti i Suetena, sa avea lo’u tamā ma se fesoasoani i nisi o peresitene o misiona. O lenei valaauga e manaomia ai lona femalagaai i le tele o faaiuga o vaiaso. Sa avea o ia ma se faataitaiga ia i matou ma nai ou tei i le taua o le auauna atu i le Alii, e tusa lava po o lona uiga e ao ona tatou faia ai ni osigataulaga.
Sa ou aoaoina ai foi le taua o le galue malosi a o o’u laitiiti lava. I taimi o le taumafanafana e vili atu la’u uila i se faatoaga vine e na o ni nai maila le mamao ese atu. Ou te tauina le vine mo ni itula se tele i aso taitasi e maua mai ai se tupe.
E i ai se fale o le taumafanafana o le matou aiga i se faatoaga. Sa le’i i ai se eletise po o ni paipa, o lea sa matou tātāina ai a matou lava fafie ma la’u mai vai mai le vaieli. Sa tuuina mai e le faifaatoaga e ana le faatoaga le faatuatuaga ia te au e ave atu ai povi i le fale o manu manu i ni isi o taeao mo le tatauina o le susu ma toe faafoi atu. Sa matou seleseleina ma faaputu vaomago ma faaaoga solofanua e la’u ai taui vaomago i le fale o manu.
O ou aafiaga i le galue malosi ma faataitaiga a lo’u tama i le tuuto atu o ia lava i le galuega a le Alii, sa fesoasoani ia te au i la’u misiona muamua. I le na o le 16 o o’u tausaga, sa valaauina ai au e leiina le piliki mo fale o le Ekalesia i Suetena, Finelani, Siamani ma Netherlands. E tele ni musumusuga faaleagaga sa ou maua i le taimi o la’u auaunaga. Sa ou aoaoina o le galue malosi ma le faamaoni o se tasi lea o auala e fai ai le mea sa’o ma, e faapea foi ona fiafia ai le Atua.
O se faamamaluga le maua o se tofiga ma lipoti atu sa e faia le mea sili e faamae’a ai. A tatou taliaina ni tofiga ma faaaoga o tatou taimi ma taleni e fausia ai le malo o le Alii, o le a tatou maua ma vaai i faamanuiaga o loo teuina e le Tama Faalelagi mo i tatou.
Ata na tusia e Dan Burr