Ua Lava Mea Ua E Iloa
Mai se lauga na tuuina atu i le konafesi aoao o Oketopa 2008.
O lo tatou liua e oo mai i lea laasaga ma lea laasaga, i lea mataupu ma lea mataupu. E muamua ona tatou fausia se faavae o le faatuatua i le Alii o Iesu Keriso.
Ua silia ma le 40 tausaga talu ai, a o ou mafaufau i le luitau o se misiona, na ou lagona lava lou matuai le agavaa ma le le saunia. Ou te manatua na ou tatalo, “Le Tama Faalelagi e, e mafai faapefea ona ou faia se misiona ae e matua itiiti se mea ua ou iloa?” Na ou talitonu i le Ekalesia, ae na ou lagonaina na matuai le lava lou malamalama faaleagaga. A o ou tatalo, na oo mai se lagona: “E te le iloaina mea uma, ae ua lava mea ua e iloa!” O lena faamautinoaga na ou maua ai le lototele e fai le isi laasaga e agai atu i le misiona.
O la tatou malaga faaleagaga o se faagasologa o le olaga atoa. Tatou te le iloa mea uma i le amataga pe o le aluga foi o le olaga. O lo tatou liua e oo mai i lea laasaga ma lea laasaga, i lea mataupu ma lea mataupu. E muamua ona tatou fausia se faavae o le faatuatua i le Alii o Iesu Keriso. Tatou te faatauaina mataupu faavae ma sauniga o le salamo, papatisoga, ma le mauaina o le meaalofa o le Agaga Paia. Tatou te faaaofiaina ai se tautinoga faifai pea o le tatalo, o se naunau ina ia usiusitai, ma se molimau faifai pea o le Tusi a Mamona.
Ona tatou tumau ai lea ma le mausali ma le onosai a o tatou faagasolo i le olaga faaletino. E i ai taimi, e oo mai ai le tali a le Alii, “E te le iloa mea uma, ae ua lava mea ua e iloa”—ua lava e tausi ai poloaiga ma fai ai le mea sao. Manatua i upu a Nifae: “Ua ou iloa e alofa o Ia i ana fanau; a e ui i lea, ou te le iloa le uiga o mea uma” (1 Nifae 11:17).
E tofu i tatou taitoatasi ma taimi o le mana faaleagaga, o taimi o musumusuga ma faaaliga. E tatau ona tatou faagotoina ifo i o tatou agaga. A o tatou faia, ua tatou saunia ai o tatou faleteuoloa faaleagaga mo taimi o faigata faaletagata lava ia. Na fetalai Iesu, “Tuu lenei mea i o outou loto, ina ia outou faia mea o le a ou aoao atu, ma poloaiina ai outou” (Faaliliuga Iosefa Samita, Luka 14:28 [i le Luka 14:27, vaefaamatalaga e]).
O ni nai tausaga ua mavae na maliu ai se afafine talavou o sa’u uo i se faalavelave matuia lava. Na nutimomoia faamoemoega ma moomooga. Na lagona e la’u uo se faanoanoa le magafatia. Na amata ona ia fesiligia mea na aoaoina ai o ia. Na tusi mai e le tina o lau uo se tusi ia te au ma talosagaina pe mafai ona ou tuuina atu ia te ia se faamanuiaga. A o tuu ou lima i luga o lona ulu, o le uunaiga na oo mai ia te au o le: O le faatuatua e le gata o se lagona; ae o se filifiliga. E moomia ona ia filifilia le faatuatua.
Sa lei iloa e la’u uo mea uma, ae na lava mea na ia iloaina. Na ia filifilia le ala o le faatuatua ma le usiusitai. Na alu ifo o ia i ona tulivae. Na toe foi mai ia te ia lona tulaga paleni faaleagaga.
O ni nai tausaga talu ona mavae le faamanuiaga o lau uo, na ou maua ai se tusi mai lona atalii o loo auauna nei faamisiona. Na tumu i tautinoga ma molimau. A o ou faitauina lenei tusi matagofie, na ou vaaia ai le faamanuiaina tele o le augatupulaga na sosoo ai i le filifilia e se tama o le faatuatua i se taimi na sili ona faigata.
O luitau, faigata, fesili, ma masalosaloga—o vaega nei o lo tatou olaga i le tino. Ae e le o tuulafoaiina i tatou. I le avea ai ma soo o le Alii o Iesu Keriso, ua i ai ni a tatou faatanoa tetele faaleagaga o le malamalama ma le upumoni ua faaavanoaina mo i tatou. E le mafai ona o mai faatasi le matau ma le faatuatua i le taimi lava e tasi i totonu o o tatou loto. Na fetalai Iesu, “Aua e te mata’u, tau lava ina e faatuatua” (Mareko 5:36).
O le aluga o tausaga tatou te laasia faafia ai nei laasaga taua faaleagaga. E amata ona tatou iloa ai “o le talia foi le malamalama, ma tumau pea i le Atua, e faateleina atu i ai le malamalama, ma e tuputupu pea le pupula o lea malamalama seia oo mai le aso atoatoa ona lelei” (MF&F 50:24). E taliina a tatou fesili ma masalosaloga pe tuuitiitia foi le faapopoleina ia i tatou. O o tatou faatuatua e faatauvaa ma mama. Tatou te iloa ai mea ua uma ona tatou iloa.
Ata na tusia e Annie Henrie