Sa Ou Faalogo i le Taimi Lona Lua
Matthew D. Flitton, Mekasini a le Ekalesia
Sa ou faagalegale moe i le po a o lumanai se malaga, ae ou mauaina se lagona e faatau se uili fou ma se pa’u foi o le matou tamai veni ua 15-tausaga, lea sa aumai e aunoa ma se pa’u faaleoleo. Sa ou pisi i le aso na sosoo ai, ma galo ai ia te au le uunaiga. Sa matou utaina le taavale i le ma fanau e toatolu ma mea e faaaoga ma o atu loa i le fale o lo’u tamā e fa itula le mamao ese.
A o matou malaga, sa faapea ona pa se pa’u o le veni. Sa toso le veni i se aai lata ane e sui ai le pa’u. Na faatoluina le tau nai lo le mea e i ai pe ana faatau se uili ma se pa’u i le matou nuu, ma ua alu le 90 minute i le faatalitali. Sa ou maua se agaga faafetai mo uunaiga a le Agaga ma ou filifili loa ia ou mulimuli lelei i ai i le lumanai.
I le fa tausaga mulimuli ane ma se isi toalua o le fanau, sa matou toe fuafua ai foi e asiasi atu i lo’u tamā, o lē ua 13 itula le mamao o le mea ua nofo ai nei. O le taimi lena ua ese le matou veni na i ai., o se veni ua 14 tausaga. Pe a ma se vaiaso ae matou te le’i o, sa ou lagonaina e tatau ona ou suia le pa’u faaleoleo o le veni. O le manatuaina o lo’u aafiaga muamua, sa ou mulimuli ai i le uunaiga. O ni nai aso mulimuli ane, sa ou maua ai se uunaiga e faatau ni faaū e faaaoga i ni mea sa matou faaaogaina ai muamua ni maea e faamaumau ai. E lua ni mea sa ou manaomia, ae sa ou faatauina mai ni mea se fa. Sa ou tuua le lua sa sili i le matou pusa o mea e faaaoga mo ni mea e tutupu faafuasei.
O le matou foiga mai i le asiga o lo’u tamā, sa matou tutu ai e faatau se matou meaai o le afiafi. A o ou aveeseina mai nisi o aitema mai se konetina i le taualuga o le veni, sa pipii atu lo’u afafine e tolu taulaga le matua i le faitotoa toso. Na pau i lalo o le palapala! Sa matou faafetai ona sa le lavea o ia i le faitotoa. Sa tusa ua 500 maila (805 km) lo matou mamao mai le fale i le po o se Aso Faraile, o lea sa ou faapipiina le faitotoa i lona tulaga ina ia mafai ona matou toe o, ae sa le taatia lelei i lona tulaga, o lea sa matou faalogoina ai le pao o le alu i le auala maualuga a o matou o. Sa ou toe afe i tua ma faaaoga se tasi o faaū na sili e faamau ai le faitotoa.
O ni nai itula mulimuli ane, ae amata ona maluelue atoa le veni. Sa sau se patatu leotele mai le faitotoa maluelue, ae sa mau lava le faaū. Sa afe i tua le veni ma iloa ai ua leai se fusi o le isi pa’u. Sa vave ona ou suia i le pa’u faaleoleo, lea sa ou faatauina mai i ni nai vaiaso na muamua atu, ma matou toe malaga loa.
Ou te faafetai mo uunaiga a le Agaga Paia, lea sa faasaogalemuina ai i matou i le taimi o a matou malaga. Ou te iloa e puipuia i tatou e le Tama Faalelagi pe a tatou faalogo i le “leo itiiti ma le filemu” (1 Tupu 19:12; tagai foi i le 1 Nifae 17:45; MF&F 85:6), Usitai i Ana uunaiga, ma ole atu mo le fesoasoani i taimi tatou te manaomia ai.