O Fea O Le A Tau Atu I Ai Au Filifiliga?
Mata e mafai e Karina ona suia lona ala e ala i le suia o ana filifiliga?
Sa mou ese atu le ataata o Karina. Sa amata ona sau lona afu— ma e le ona sa le masani ona vevela faapea i lena vaiaso. Sa fetilofilofa’i solo o ia mo se fesoasoani. Ma e ui lava i le tumutumu o le fale tatala, ae sa leai se tasi na foliga mai na matauina le i ai na o ia ma le tagata failipoti ma ana fesili uma.
Seia oo mai i lena taimi, sa fiafia lava Karina e 17 ona tausaga e volenitia i le fale tatala o le Malumalu o Kyiv Iukureini. Ae o lenei, faatasi ai ma le tagata failipoti o le nusipepa na faatalitali ma le naunautai, ae na foliga mai ua le mafai ona tautala o ia.
Sa popole Karina ona o ni mea sese ua tuanai sa taumafai o ia e faatoilalo, o le a faapea ona le fesoasoani mai ai le Atua ia te ia.
O Le Mea e Tau Atu i Ai le Tumutumu [o Tagata]
O le ola ae i le Ekalesia, sa moemiti ai Karina i se faaipoipoga i le malumalu. Peitai, e pei o le toatele o le tupulaga, sa faananau o ia i le taliaina [e tagata].
Sa manao o ia ina ia aulelei ma lauiloa e pei o lona uso matua. Sa moemiti o ia ia taulamua ma ia faamemelo i ai tagata, ae sa fefe i le matilatila ese ai ma le tauemuina. O le manao e mulimuli i tulagavae o lona tamā i le aoga faaleoleo sa atili faateleina ai le mamafa. Mai le 2,000 o tagata aoga, sa na o le 70 tamaitai. Sa fiafia o ia i le taulai atu [o tagata ia te ia] ae sa fa’atu ai foi.
I lona manao ina ia taliaina [e tagata] o lea sa ia faia ai ni filifiliga le lelei. “Sa malosi le faatosina a le lalolagi,” o le tala lea a Karina. “O tagata sa siomia au sa inupia ma ulaula. Sa latou tauanauina au ma sa ou gauai atu i ai. Sa ou fiafia i le avea ma se tagata o se vaega sa lagonaina le leai o se mea e popole ai.”
Sa ia iloa o le mea sa ia faia e sese, ae sa le’i mafaufau o ia po o fea e tau atu i ai ana filifiliga a o mulimuli atu o ia i le tumutumu o tagata e o ese mai le Atua (tagai i le Mataio 7:13–14).
O Le Filifili e Suia o Lona Uiga o le Suia o Au Filifiliga
I se tasi aso sa fai atu ai se alii talavou sa fiafia i ai o ia, na te faaaloalogia talitonuga a lana ekalesia.
O le ma ona sa le’i lelei ona ola o ia i na talitonuga, sa iu ai ina nofo Karina ma mafaufau i le ala sa i ai o ia (tagai i le Hakai 1:5–7). Sa ia iloaina o ana faaiuga na taitaieseina ai o ia mai le Atua, le mafutaga a le Agaga Paia, ma lana miti mo se aiga e faavavau.
Na pau lava le ala e suia ai lona ala o le suia o faaiuga sa ia faia i aso taitasi.1 Ae sa mafaufau o ia pe ua mamao tele o ia i le auala sese. Mata ua tuai tele ona [ou] sui?
Sa tonu ia Karina e amata ona sui e ala i le tatalo ma le faitauina o tusitusiga paia i aso uma. Sa amata ona tusitusi i lana api o talaaga, lea sa fesoasoani na te iloa ai le fesoasoani a le Tama Faalelagi i aso taitasi. Na te suia le autu [o talanoaga] pe a faasolo ina leaga ia talanoaga.
O lana faaiuga na sili ona faigata o le filifili lea ia leai ni ana uo mo se taimi nai lo le filifilia o uo e i ai se uunaiga le lelei. Sa amata ona vaavaai o ia mo uo e maualuluga atu tulaga faatauaina.
O Le Taua o le Faamoemoe
I le aluga o masina na sosoo ai, sa velo atu e le fili ia le masalosalo ma le fefe i ona foliga i ana faaiuga uma. O nisi taimi sa mafaufau ai pe na aoga le taumafaiga ia mulimuli i le Faaola. O le tagata sa manao e avea ai o ia, sa foliga mai e le mafai ona oo i ai.
Ae a o vaavaai atu o ia i le ala na ola ai ona matua ma isi e malolosi molimau, sa ia iloa ai e i ai se mea e sili atu le malosi nai lo le masalosalo ma le fefe—sa ia iloaina ona o le salamo, ua i ai ma le faamoemoe.
“Sa ou vaai e mafai ona ola i le auala sa’o,” o lana tala lea. “E le tausalaina i tatou i a tatou mea sese. Ua tuuina mai e le Tama Faalelagi ia i tatou le avanoa e salamo ai ma sui [o tatou] ala.”
O le liliu ese mai ana filifiliga tuai ma taumafai e mulimuli i le Faaola i aso taitasi, ua aoaoina ai o ia o le Tama Faalelagi e onosai. “Ua Ia tuuina mai ia te au lea avanoa ma lea avanoa e sui ai ma avea ma se tagata lelei atu,” o lana tala lea. “Sa fesoasoani mai o Ia ia te au i taimi faigata.”
O Loo Iina le Fesoasoani Pe Afai Tatou te Filifili e Mulimuli Ai
Sa faasasao tauau o Karina ma toe liliu atu i le tagata failipoti. Sa fiafia atu lana ataata. E tele mea ua uma ona fai e le Tama Faalelagi mo ia ua ia iloa ai o le a fesoasoani mai o Ia i le taimi lenei.
Ina ua uma ona fai atu fesili a le tagata failipoti, sa ataata Karina ma talotalo atu. Sa ataata atu i ai le failipoti ma savali ese. Sa le tele ni mea sa tauina atu e Karina na ia manatuaina, ae o le a ia manatuaina mo se taimi umi le lagona sa ia lagonaina, i le iloaina e latalata mai lava le Tama Faalelagi ia i latou o e filifili e mulimuli ia te Ia.
Ata na pueina e Adam C. Olson