Auaunaga i le Ekalesia
O Le Gafatia o Auaunaga e Taitaiina e le Autalavou
E fiafia tagata Nigeria e fai mai o i latou e nonofo i lalo “o se la saua o Aferika.” O le vevela i talane o le ekueta e na o se tamai eseesega lava e tusa lava pe o le a le vaitau. O lea la, ina ua fai le matou galuega faatino i Aferika atoa ia Aokuso, sa amataina i le 7 i le taeao ina ia mafai ona tele se mea e mafai ona fai i taimi mālū o le taeao.
Faatasi ai ma suo, lako, ma sapelu, sa matou galulue ai e faamama le vao ma la’u le lapisi mai fanua tuufua e lata i le falelotu o le matou Uarota o Yaba i le Siteki o Lagos Nigeria. Ina ua mavae ni itula se tolu o le galuega, na matou faamamaina le tusa ma le tolu eka (1.2 ha) o le fanua e fa eka (1.6 ha).
“O le a se tou manatu ae faauma loa si vaega laitiiti lenei ae toe fuafua se isi aso e faauma ai le faamamaina o le fanua?” o le fesili lea a le epikopo.
O le lagona mai o le epikopo e Emanuelu, le peresitene o le korama a le au aoao, sa faaali mai ai lona faagaulemalie.
“Afai ae tatou tuua le vaega lenei e le faia, o le a leai se tasi o le autalavou e lagona e tele se mea na latou faia i le aso,” o lana tala lea. “Se faamolemole, sei tatou faaumaina.”
Talu ai o vao sa pe a ma le ono futu (1.8 m) le maualuluga i le tele o vaega [o le fanua], sa latou punitia ai la matou vaaiga ma faafaigata ai ona matou iloa pe o le a se telē o le fanua na totoe.
“Uso Hill, sei ta vaai pe o le a le umi ta te faamamaina ai se auala lauiti, atonu pe na o le lua futu le lautele,” o le tala lea a Emanuelu. “A vave ona ta faia, o le a iloa e isi e mafai ona vave uma nai lo le mea latou te manatu i ai.”
O alii talavou, sa vaevaeina i ni vaega se lua, ma sa galulue i le aso atoa i itu faafeagai o le fanua. Sa leai se tasi na asaina le gaogaosa o le vao i le isi itu. Faatasi ai ma se papatua tiga, sa ou tootuli ifo ai e saili se toomaga a o faaauau ona sasa ese le vao i se sapelu. O le popole, sa o mai ai nisi o le autalavou e vaai pe mafai ona latou fesoasoani ona tuu mai lea o o latou tauau ina ua latou vaaia i maua ma Emanuelu o galulue e faasaga mai le tasi i le isi. I ni nai minute ae ma fetaui loa, ma sa faalogoina se alaga laitiiti o le fiafia. O le vaaia o le asaga, na amata galulue taitoalua ai loa isi e fai foi faapena.
E le’i atoa se itula, ae matou faamaeaina loa. O le fiafia i le faamalieina, sa tau fai faamālō ai le tasi i le isi—ae maise lava ia Emanuelu, o lē sa saunia moni se ala mo isi e mulimuli ai.
Sa ma manatu ma le epikopo o i maua, i lo ma matutua ma le atamai, ua ma iloaina mea e mafai ona ausia e nei alii talavou. Sa le gata ina ma vaaia ni alii vevela, ma lelavava, ae sa vaaia e Emanuelu se avanoa mo ana uo e atiina ae ai le malualii ma le talitonu o le tagata ia te ia lava. Sa ia iloaina o le tuuina i ai o se taumafaiga faaopoopo o le a aumaia ai le faamalieina sili atu ia i latou nai lo le faamaeaina o le galuega i se taimi mulimuli mai. Sa ia faamanatu mai ia i maua le malosi o le autalavou o le Ekalesia ma le auala e faamanuiaina ai i tatou uma pe a latou faia se saofaga ma taitai ai.
Sa ou iloaina e le manaomia ona tatou faatali mo le tatou autalavou ia tuputupu ae—e mafai ona latou faia se eseesega i le taimi nei pe a tatou faataga i latou.
Ata na tusia e Brian Call