Faalauiloa atu le Uepisaite a le Ekalesia mo Tagata e I Ai Manaoga Faapitoa i Gagana Faaopoopo e Iva

Saunia e Melissa Merrill

Tala Fou ma Mea e Tutupu i le Ekalesia

Ina ua faatoa faalauiloa mai le lds.org/disability i le 2007 i le gagana Peretania, na toe tuufaatasia ai ni faamatalaga lea na taape solo i tusitaulima, tusi lesona, ma isi uepisaite, ma ua faafaigofie ai ona maua ia fesoasoaniga ma manatu i se nofoaga autu.

O le taimi nei, i le 2012, ua maua na punaoa (lea e aofia ai ni faamatalaga e uiga i ni vaega eseese se 10 e faatatau i manaoga faapitoa ma le tele o isi fesoasoaniga eseese) i ni gagana faaopoopo se iva: Saina, Farani, Siamani, Italia, Iapani, Korea, Potukale, Rusia, ma le Sipaniolo.

O lenei faalauiloaga lata mai o le a fesoasoani i aiga e pei o le au Varins o Pale, Farani. O Raymond ma Isabelle Varin sa toatasi le la tama tama o, Jérôme, ae fanau loa le tama tama lona lua o, Jérémy, lea na fanau mai e ma’i i le Down syndrome [o se ma’i e mafua mai le tuasivi ma afaina ai le mafaufau]. E ui sa avea le mauaina o le mai o Jérémy ma se popolega i ona matua—aua sa itiiti lava so la malamalama e uiga i le Down syndrome i lea taimi—ae na lelei lava le tele o aafiaga o le aiga o Varin e faatatau i manaoga faapitoa o Jérémy. Fai mai Brother Varin o le toatele o tagata sa matua alolofa ia Jérémy, na matauina foi o tagata o le Ekalesia sa faapitoa lava le agalelei atu ma na siosiomia ma faaalia le alofa ma le talisapaia o ia.

E talitonu o ia o le a fesoasoani le uepisaite e atiina ae ai na ituaiga o amioga. “O le a mafai ona fesoasoani i taitai ma faiaoga o le Ekalesia ona malamalama i manaoga faapitoa ma le auala e fetuutuunai ai ma taulima ai na tulaga,” sa ia fai mai ai.

Ae e tutusa lava le taua o le saite i tagata e i ai manaoga faapitoa ma o latou aiga, na ia fai mai ai—e le o se auala e faailoa mai ai ae o se punavai o le faamalosiauga.

“E taua lenei saite mo aiga e i ai se tagata o le latou aiga e i ai manaoga faapitoa ona o le lagolagosua o loo tuuina atu ai,” o lana tala lea. “Ua tuuina atu ai ia te oe se vaaiga e uiga i le aafiaga ma molimau a isi, lea e maua atili ai se vaaiga lelei o le lumanai. Mo ia mafuaaga uma, o le mea taua o le maua lea o ia faamatalaga i gagana eseese.”

Na ioe i ai Elder Keith R. Edwards o le Fitugafulu, lea e faufautua i le Auaunaga mo Tagata e I Ai Manaoga Faapitoa mo le Ekalesia.

“O le a silafia e tagata o le ekalesia e i ai manaoga faapitoa, o latou aiga, ma e tausia i latou o loo tatou galulue faatasi uma lava mo le faamoemoega e tasi—‘ia aumaia le tino ola pea ma le ola faavavau o le tagata’—ma e manaomia e lena faamoemoega i tatou ina ia ‘tasi le loto ma tasi le mafaufau,’” o le tala lea a Elder Edwards (tagai i le Mose 1:39; 7:18). “O le a silafia ma malamalama tagata i le mea latou te o i ai mo se fesoasoani ma o le a iloa ai afai o loo galue le Ekalesia a le Alii e pei ona tatau ai, o le a leai lava se tasi e tuua e tau na o ia lana taua.”

O Fatima Alves mai Potukale, lea e faaletonu lona tuasivi, na iloaina le fesoasoani o le uepisaite ia te ia e iloa ai: e le o tuua na o ia.

“E taua ia te au le i ai o se uepisaite a le Ekalesia e fesoasoani i tagata e i ai manaoga faapitoa ina ia tatou lagona ai le lotogatasi i le avea ai ma tagata o le Ekalesia. E taua le iloaina o loo popole ma naunau le Ekalesia e fesoasoani ma lagolagosua i tagata e i ai i tulaga faapitoa,” o lana tala lea.

O le faalauiloaina atu o le saite o se tasi lea mai le tele o taumafaiga o loo faia e le Ekalesia ina ia aapa atu ai i tagata uma o le Ekalesia, o le tala lea a Elder Edwards.

“O se vaega o lo tatou ‘tiute’ mai le Alii o le tuuina atu lea o le talalelei i tagata uma i se auala e mafai ai e i latou ona malamalama ma faaaogaina ma le tatau,” na fai mai ai Elder Edwards. “Matou te naunau lava ia aua nei misia soo se vaega o fanau a le Alii i le tuuina atu o avanoa taua o le talalelei.

“E le gata o le a fesoasoani lenei uepisaite i tagata taitoatasi ae ua mamanuina foi ina ia fesoasoani i taitai ia iloa le auala e fesoasoani ai po o fea foi latou te o i ai mo se fesoasoani e auauna atu ai ia i latou e i ai manaoga faapitoa,” na ia faaauau ai.

E moni, e le o le faamoemoega o le uepisaite ia suia ai fegalegaleaiga patino a tagata taitoatasi ma tagata o le Ekalesia.

“E eseese auala o loo faamanuiaina ai le taulimaina o manaoga faapitoa e le Ekalesia i le aluga o tausaga,” o le tala lea a Elder Edwards. “E oo mai faamanuiaga i ni auala tetele pe afai ua i ai se naunautaiga i totonu o le tagata lava ia e fai se suiga. O le ki e fesoasoani ai i tagata uma—e tusa lava pe i ai se manaoga faapitoa pe leai—o le alofa lea ia i latou ma saili le taitaiga mai le Agaga e aapa atu ai ma fesoasoani atu.

“Ua tuuina mai ia i tatou uma se tiute ina ia alolofa i o tatou tuaoi e pei o i tatou lava (tagai i le Mataio 19:19). Ua na ona saunia lava e le Ekalesia o se isi ala o fesoasoaniga e fesoasoani ai ia i tatou ina ia malamalama ma faamanuiaina o tatou manao e lagolago i le galuega a le Alii.”

I gagana uma o loo maua ai le saite, o loo aofia ai ma nisi o polokalama:

Disability List [Lisi o Manaoga Faapitoa]: O loo maua i le vaega lenei o le saite ni faamatalaga e patino i manaoga faapitoa ua faatulagaina i ni vaega se 10 ma e tuuina mai ai ni manatu i le ala e fesoasoani ai i se tasi o i ai manaoga faapitoa taitasi.

Families [Aiga]: O le vaega lenei o le uepisaite, e aofia ai ni faamatalaga e fetaui mo tagata o le aiga e i ai ni fanau e i ai manaoga faapitoa, ma ua ofoina atu ai ni fautuaga mo le faamalolosia o aiga.

Questions and Answers [Fesili ma Tali]: O i, e mafai ai e le au faitau ona maua ia tali i fesili e masani ona fesiligia i ni vaega se fa: pe faapefea ona, aoaoga faavae ma aiaiga faavae, punaoa, ma faamatalaga faafuainumera.

General Information [Faamatalaga Lautele]: O le vaega lenei ua tuuina atu ai se vaaiga lautele e uiga i le saite ma faailoa atu ai faapea, e ui o nisi taimi e le lelei le tali atu a tagata i tulaga o le le atoatoa, ae o le aoao e uiga i le tulaga o le tagata o le a mafai ai ona faateleina le malamalama ma le taliaina.

Leaders and Teachers [Taitai ma Faiaoga]: O le vaega lenei o le saite o loo faamanatu atu ai i taitai ma faiaoga ia mea e manatua ao galulue faatasi ma tagata e i ai manaoga faapitoa.

Scriptures and Quotes [Mau ma Upusii]: O lenei faaputuga o mau ma saunoaga faaperofeta ua faamoemoeina e avea ma se punaoa o le faamalosiauga, faamafanafanaga, ma le faamoemoe mo tagata o loo i ai i tulaga faigata.

O le a maua le Saite a le Ekalesia o Manaoga Faapitoa i le 2012 i gagana e 10: Saina, Peretania, Farani, Siamani, Italia, Iapani, Korea (o loo faaali atu i i), Potukale, Rusia, ma le Sipaniolo.