O Le Lesona a le Au Liki Laiti
“E i ai so’u aiga i lalo nei. Alolofa ia te a’u. Ou te fia mau pea ma i latou e faavavau” (Tusipese a Tamaiti, 98).
“Aisea e manaomia ai lo’u i ai iinei?” o le tomumu lea a Linisei.
“E manaomia lou lagolagoina o lou tuagane,” o le tala lea a Tina.
“Ae e le manaia,” o le tala lea a Linisei. “O le tele o le taimi ou te le matamata ai ia te ia.”
O le tuagane laitiiti o Linisei, o Mikaele, sa auai i se au pesipolo o le Liki Laiti, ma e ave ai e Tina ia Linisei i faataitaiga uma ma taaloga uma. E le fiafia ai lava Linisei i le taimi atoa. A o taumafai Mikaele e ta le polo pesipolo, e faalogologo Linisei i musika, faitau ni tusi, ma tusi ni ata mo lona uso laitiiti.
Sa mapuea Linisei ma matamata atu i lona tuagane o tutu mai i le talituaā ma lana au. Sa matamata atu ia te ia ao tamoe e sapo le polo, le maua, ona togi atu lea i le tagata sese.
“Faamalosi, Mikaele!” O le valaau lea a Tina. “O loo manaia lava lau taalo!”
“Ae, Tina,” o le fai atu lea a Linisei, “e le o manaia lana taalo.”
“O le mafuaaga lena o le ta i ai iinei, Linisei,” o le tala lea a Tina. “E valaau faamalosi ia Mikaele, ae maise pe a le lelei lana taalo. Ana fai ta te le i ai iinei ma faapea Mikaele ua toilalo, atonu o le a ia le toe taumafai. Ou te manao ia te ia e taumafai pea lava. E pei foi ona ou manao ia te oe e te taumafai pea i lau tusiata.”
“E leai se isi e valaau faamalosi mai ia te au i le vasega tusiata,” o le tala lea a Linisei. “E le sau lava Mikaele e valaau mai, ‘Manaia tele!’ pe a sa’o lo’u tuufaatasia o lanu.”
“Leai, ae o taimi uma lava e faamalo atu ai mo au ata pe a e faaalia mai ia i matou,” o le tala lea a Tina.
Sa mafaufau Linisei i lena mea. Sa ia manatuaina le aveina e Tina o ia i ana vasega tusiata ma o nisi taimi sa tietie atu ai ma Mikaele i le taavale, e tusa lava pe na manao e taalo ma ana uo. Sa matamata atu o ia ia Mikaele o talituaā. Na faatoa uma lava ona ta e le tagata o le isi au le polo. Ma sa alu atu sa’o lava ia te ia!
“Faamalosi, Mikaele!” o le valaau faamalosi atu lea a Linisei. “E mafai ona e sapoina!”
Sa momoe atu Mikaele i le polo ma faaloloa atu ona lima. Sa ia sapoina le polo!
Sa tau fai tutu i luga Linisei ma Tina ma tapuai leotetele. “Malo lava, Mikaele! O oe o lo’u tuagane e sili ona ou fiafia i ai!” o le alaga atu lea a Linisei.
“Ua na o a’u lava lou tuagane!” o le alaga mai lea i ai o Mikaele ma se ataata lapoa i ona foliga.
Sa toe saofai i lalo Linisei, ma se ataata lapoa foi.
“Atonu e tatau ona ou taulai atu ma tapuai ia Mikaele,” o ona mafaufauga ia. “O le matamata atu ia te ia a o ia sapoina lena polo o le mea aupito manaia lea na tupu i le aso atoa. Ma sa foliga mai sa matuai taua lava ia te ia lo’u matamata atu. Ou te mitamita lava ia te ia.”
“Tina, ou te manatu e sa’o oe,” o le tala lea a Linisei. “E tatau ona ta lagolago ia Mikaele.”
Na ataata Tina. “Ua ou fiafia ua sui lou mafaufau.”
“Ia ta tapuai atili!” o le tala lea a Linisei.
“Faamalosi Mikaele!” o le valaau faamalosi atu lea a Linisei ma Tina. “E mafai ona e faia!”
Ata na tusia e Shawna J. C. Tenney