Fesili & Tali
“O nisi taimi ou te lagona ai le lofituina pe a ou mafaufau atu i mea uma e manaomia ona ou faia e ola ai i le talalelei. O fea ou te amata atu ai?”
O le olaga e mafai ona lofituina pe a e taumafai e soona fai ni mea se tele i le taimi e tasi. Mo se faataitaiga, afai e te taumafai e alu i le seminare, aoga, galuega, ma le malumalu, ma le Mutuale i le aso e tasi, o le a e lagona le lofituina. Ae afai e te faamuamuaina gaoioiga o le talalelei ona fuafua lea o le taimi mo na mea, o le a alualu i luma. O gaoioiga o le talalelei e pei o le seminare, tatalo, ma le Tiute i le Atua po o le Alualu i Luma o le Tagata Lava Ia, o nisi ia o mea e sili ona taua e mafai ona e faia o se tagata talavou. Ioe, e manaomia ai ni taimi faaopoopo, ae o le a faamanuiaina oe mo ositaulaga uma e te faia e te usiusitai ai.
Ina ia iloa ona fuafua le taimi o nei gaoioiga, ia saili musumusuga e ala i le tatalo ma e ala i le mafaufau pe faapefea ona e faaaluina lou taimi. O le Aso Sa o se aso lelei lea e fuafua ai gaoioiga o le talalelei ma isi gaoioiga taua mo le vaiaso. O le a aoga foi le talanoaina o lenei fesili ma ou matua ma taitai o le Ekalesia.
A e mafaufau i mea uma e manaomia ona e faia, ia manatua o vasega, polokalama ma gaoioiga a le Ekalesia e musuia—o le a fesoasoani e faamalosia ai lau molimau, tausi poloaiga, ma sauni ai e fai se misiona ma faaipoipo i le malumalu.
A o e taumafai e faamaoni i le talalelei, o le a “saunia [e le Alii] se auala” (1 Nifae 3:7) e fesoasoani e te tausia ai Ana poloaiga, e tusa lava pe e te lagonaina le lofituina. O le tausia o poloaiga o le a valaaulia ai le Agaga i lou olaga. Ma o le lagonaina o le Agaga o le a e iloa ai o loo e i ai lava i le ala sa’o faaleagaga.
Fai Mea Laiti ma Faatauvaa
E le o taumafai le Alii ina ia tatou atoatoa i mea uma lava i le taimi lenei, ae e finagalo o Ia ia tatou faia ni mea se tele e mafai ona tatou faia. Afai o le uiga o lena mea o le amata mai i mea autu e pei o le suesueina o tusitusiga paia ma tatalo i aso uma, o le a fiafia o Ia i a tatou taumafaiga. A o tatou naunau e ola i le talalelei ma fai mea laiti ma faatauvaa e manaomia mai ia i tatou, o mea uma e foliga mai e lofituina e fetalai mai o Ia tatou te faia, o le a le toe avea ma mea e lofituina tele.
Hunter D., 17 tausaga, Tennessee, ISA
Ola i le Talalelei ma Lou Aiga
E taua tele le ola i le talalelei faatasi ma lou aiga. E mafai ona tatou amata ola ai ma i latou e ala i tatalo faaleaiga, suesueina faaleaiga o tusitusiga paia, afiafi faaleaiga, ma le faia o talafaasolopito faaleaiga. O nei mataupu faavae autu o ni fesoasoaniga tele e malamalama loloto ai i le mea e mafai ona faia e le talalelei a Iesu Keriso i o tatou olaga.
Cherry O., 19 tausaga, Davao, Filipaina
Fai le Mea Sili E te Mafaia
Ua ou aoaoina a e taumafai e fai mea uma, o le a faapea ona e lagona ai le atuatuvale. Ae afai e te taumafai e fai le mea sili e te mafaia i aso taitasi, o le a e manuia lava. Afai e te faalogo i le Agaga Paia ma faalatalata i le Alii e ala i le tatalo ma le suesue i tusitusiga paia, o le a fetaui lelei lava mea uma ma e le umi ae avea oe ma le tagata ua faamoemoe le Alii e avea ai oe. Sa ou taumafai ia ou latalata i le atoatoa ma sa ou popole i le avea o au ma se tagata e le lava lo’u lelei, ae e le o le mea lena e finagalo i ai le Alii. O le lagonaina o le le atoatoa ma le faanoanoa ona o oe lava e lē a le Alii lea. O lea tau lava o le avatu ia te Ia o le mea sili e te mafaia, ma o le a e maua ai le toafilemu ma le olioli i lou olaga.
Zandi C., 16 tausaga, Wyoming, ISA
Saili atu i le Fesoasoani a le Alii
Faitau tusitusiga paia ma tatalo i aso uma. Ia saili e le aunoa e faalogo i le Agaga Paia. O le a fesoasoani le Tama Faalelagi ia te oe e ola i le talalelei. Ia saili mo Lana fesoasoani i taimi uma. Ia ole atu mo Lana taitaiga ina ia mafai ona e faia mea ua Ia faamoemoe e te faia. O filifiliga sa’o taitasi e te faia, o le a e lagona ai le faatasi mai o le Agaga. O lena mea o le a faapea ona e manao atili ai e fai filifiliga sa’o.
Thaís S., 15 tausaga, Rio Grande do Sul, Pasila
Faalagolago i le Alii
Ua iinei le talalelei e fesoasoani ia i tatou, ae le o le faapopoleina o i tatou. Afai tatou te faalagolago i le Alii, ona mafai lea ona tatou faatuatuaina Lana talalelei. Afai e ia te oe le faatuatua, o le ola i le talalelei o le a le toe lofituina aua ua e malamalama i le pogai e te ola ai [i le talalelei].
Charlotte R., 14 tausaga, Iuta, ISA
Tepa Taulai i le Galuega ua i Ou Lima
Aua le mafaufau i mea uma e manaomia ona e faia i lou olaga atoa; mafaufau i mea e manaomia ona fai i le taimi nei. Ia fai le mea sili e te mafaia, ae o le Tama Faalelagi o le a faaausiaina. Mo se faataitaiga, a o ou sauni e aoao atu se lesona o le seminare e uiga ia Peresitene Thomas S. Monson, sa ou mafaufau pe o le a faapefea ona ou faatumauina ni tamaiti se toafitu (o i latou uma e matutua atu ia te au) ia faalogo, aoao, ma fiafia [i le lesona]. Sa ou filifili e taumafai ia faateleina lo latou auai, i se mafai ou te mafaia. Sa manaia lava le faaiuga! O lea tau lava o le fai o le mea sili e te mafaia i le galuega ua i ou luma.
Bethany F., 15 tausaga, Kentucky, ISA
Faasolosolo Malie le Alualu i Luma
Ua fetalai mai le Alii, o le a Ia tuuina mai ia i tatou aoaoga faavae o “lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o” (2 Nifae 28:30). E le mafai ona tatou faamoemoe tatou te malamalama uma i le talalelei i le taimi e tasi, ae a tatou amata mai i mea autu—alofa, faatuatua, ma le faamoemoe—ma a o tatou suesue i tusitusiga paia, faaaoga i aso uma, ma tatalo e le aunoa, o le a faasolosolo malie lava lo tatou alualu i luma ma iloa ai ua tatou latalata atili atu ia Keriso.
Riley C., 16 tausaga, Iuta, ISA