O Le Olioli i le Faamamaluina o le Aso Sapati
Ou te molimau atu e maua le olioli ma faamanuiaga i le tapuai i le Atua i Lona aso paia—e aofia ai ma faamanuiaga e le mafai ona tatou vaai i ai i le taimi nei.
O le ola ae o se tagata o le Au Paia o Aso e Gata Ai i se siosiomaga e le o ni AAG, o se tasi o aafiaga fiafia o lo’u olaga talavou. O le mea e sili ona ou manatuaina o le faatasitasi lea ma aiga ma uo mo ni aso fanau, aso malolo, taaloga soka, ma o nisi foi taimi o se papakiū a le aiga. O le isi mea manaia ou te manatuaina o le o faatasi lea o se aiga i le lotu i Aso Sa.
O le tausia o le aso Sapati ia paia ma tapuai i lo tatou Tama o i le Lagi ma Lona Alo, o Iesu Keriso, o tulaga faavae ia ma masani a lo matou aiga. I le avea ai o se talavou i le Ekalesia, ou te naunau lava e taalo soka i po o Aso Lua, peitai ou te naunau foi e alu i sauniga faamanatuga, Aoga Sa, ma le au perisitua i Aso Sa. E ese le manaia o faalogoga e mafuta ma o matou uso ma tuafafine i le talalelei ma o lea matou te le vavevave ai e o i le fale pe a uma.
Ou te lei talisapaia moni le faataitaiga lelei na faia e o’u matua i tausaga o lo’u talavou, vagana ai ina ua ou faaipoipo ma fai so’u lava aiga. I le avea ai o se tamā o le aiga, sa ou malamalama atili ai i le taua o le “alu i le fale tatalo ma osi a’e i luga [a tatou] faamanatuga i le aso paia [o le Alii]” (MF&F 59:9). Na ou malamalama atili ai i faamanuiaga sa Ia folafola mai ia i latou o e tausia lenei poloaiga.
Ou te malamalama lelei i lo matou fiafia ma a’u uo a o matou talavou, pe a mafai ona ta’u atu e le tasi i le isi faapea matou te lei misia lava se sauniga faale-Lotu i le tausaga atoa. Atonu matou te lei iloa atoatoa le mea sa tupu ia i matou o se taunuuga o lo matou auai ma le faamaoni, ae sa matou tausisia i matou ma le le pona mai le lalolagi. E le gata i lea, sa fiafia o matou loto, sa fiafia o matou foliga, ma sa atoatoa moni lava lo matou olioli (tagai MF&F 59:9, 13–15).
O Se Tu ma se Aga Masani o le Aso Sapati
E tele tausaga o i ai se tu ma se agamasani a a’u ma lo’u toalua ma le ma fanau o le faaaluina lea o le taumafanafana i se matafaga laitiiti i tafatafa o lo matou fale i Pasila i saute. O nisi taimi matou te siitia ai ona o galuega, ae tusa lava po o le a le mamao o lena tama’i matafaga, e fai lava la matou malaga faaletausaga ma lo matou naunautai ma le fiafia. E faapena foi ona malaga mai aiga lautele ma uo i mea mamao ina ia mafai ai ona matou faatasitasi taitasi i le tausaga. Sa vave ona o mai tagata uma i le taimi e mafai ai ma nonofo ai foi i le umi e mafai ai.
I lena tamai matafaga e tele avanoa matagofie na maua ai e lo matou aiga e tuputupu ae ai faaleagaga ma mo aoaoga faaletalalelei. O le toatele lava o o matou aiga lautele e le auai i Le Ekalesia a Iesu Keriso o le Au Paia o Aso e Gata Ai, ma sa latou lei maua o matou talitonuga faalelotu. Ia i latou, o le aso o le Alii sa na o se tasi foi aso e taaalo ma fiafia ai. Talu ai o le toatele o le aiga e i ai i le matafaga i faaiuga o vaiaso nai lo isi aso o le vaiaso, o lea e le gata ina latou faamoemoe matou te i ai ma auai i gaoioiga i Aso Sa ae faapena foi ona talosagaina pea lava pea—e aofia ai foi ma le ma fanau.
Sa laiti le ma fanau ma faatoa aoao e faaaoga upumoni o le talalelei. Sa o se mea manaia ia i latou le faaosoosoga o le auai i gaoioiga faatasi ma o latou tausoga ma uo i Aso Sa. O le faaaluina o taimi ma le aiga o se vaega taua o le talalelei, ma e faigofie ai foi ona fetuunai le soli o le Sapati. E le gata i lea, o le iunite aupito lata ane o le Ekalesia i lena taimi e silia ma le 60 maila (96 km) mai le matafaga. Sa mamao a matou uo ma tuaoi o la matou au paia, ma e leai lava se tasi o i latou o le a iloaina pe na matou nonofo i le matafaga ae le o i le falelotu ma auai i a matou sauniga o le Aso Sa. Sa matou o i le lotu i le tausaga atoa, ma sa mafai ona faatasitasi lo matou aiga lautele mo na o ni nai vaiaso i le tausaga.
Ae ui o lea, sa lei misi lava lo matou o i le lotu i Aso Sa—e le’i misi faatasi lava! Sa matou manatuaina aoaoga a le Alii:
“Ma ina ia mafai ona e tausi atili atoatoa oe lava i le le pisia mai le lalolagi, ia e alu atu i le fale tatalo ma osi a’e i luga au faamanatuga i lo’u aso paia;
“Aua e moni o se aso lenei ua tofia mo oe e te malolo ai mai au galuega ma avatu ai au tapuaiga i le Silisili Ese: …
“Ae ia manatua i le aso lenei, le aso lea o le Alii, ia e avatu ai au taulaga ma au faamanatuga i le Silisili Ese. …
“Ma i le aso lenei, aua ne’i e faia ai se isi lava mea, tau lava o le saunia o au meaai ma le manatu tasi o le loto ina ia atoatoa lau anapogi, po o, i ni isi upu, ina ia atoatoa lou olioli” (MF&F 59:9–13).
Sa matou filifili e tausi lenei poloaiga, ma sa ma aoaoina la ma’ua fanau e tatau ona latou tausia foi. E lei pine ae malamalama i latou e sili atu ona taua le tapuai i le Atua i Lona aso paia nai lo le faamalieina o aiga ma uo pe faamalieina foi o latou lava manaoga.
Faamanuiaina e ala i le Usiusitai
I Aso Sa i le matafaga, matou te alapo ai, fai o matou ofu mo le tapuaiga i le Aso Sa, ona matou o lea i le taavale i se falesa e latalata ane. A o alu le matou taavale ma i le gasologa o lena aso atoa, matou te fiafia ai i le filemu ma le olioli sa folafola mai e le Alii ia i latou o e tausia Ana poloaiga. Sa matou iloa ai o lenei lagona o le filemu ma le olioli, e le maua mai i le lalolagi.
Ina ua mavae ni tausaga o lenei faiga faifai pea, sa tupu mai se mea matagofie. Sa le toe fesili le ma fanau i le taua o le tapuai i le Atua i Lona aso paia, ma sa amata foi ona fesilisili tausoga o le ma fanau pe mafai ona matou o i le lotu! Ma te lei iloaina, sa lagonaina foi lea lava lagona o le filemu ma le olioli e nai o matou tei pe a matou foi mai a matou sauniga. Na iu ina tulai mai se faamanuiaga sili. Ina ua avea nisi o na tamaiti ma talavou, sa fai atu le toalua o i latou mai se tasi o o matou aiga, “Ua ma fia avea ma Au Paia o Aso e Gata Ai.” E lei leva ae papatiso uma le aiga. Talu ai nei, o se tasi o le fanau, ua foi mai ua mae’a le misiona, ma ua faaipoipo i le malumalu.
O loo matou o pea lava i lena matafaga i tausaga taitasi, ae ua iloa e tagata uma o le a le i ai lo matou aiga i taaloga i le Aso Sa. Nai lo lena, matou te o i le lotu ma tapuai i le Atua faatasi ai ma tagata o o matou aiga e auai mai ma i matou—o se vaega ua faatuputupulaia pea i tausaga taitasi!
A matou toe tepa i na tausaga ma mafaufau i le filifiliga sa matou faia, matou te faafetai i le Atua mo le fesoasoani mai ia maua le lototoa e faia ai le mea sa’o ma aoao le ma fanau e faia foi lea mea e tasi. E leai so ma masalosalo o lena faaiuga na faamalolosia ai le ma fanau faapea foi lo matou aiga lautele. Na matou maua ai le filemu sa folafola mai e le Alii, ma faia ai se matafaioi taua i le liuaina o tagata o le aiga, ma faamanuiaina ai i matou i se lotomalie e le maua i nisi gaoioiga e faia i Aso Sa e le faatumuina ai le agaga.
Ou te molimau atu o le olioli ma faamanuiaga e maua mai i le tapuai i le Atua i Lona aso paia—e aofia ai faamanuiaga e le mafai ona tatou vaai i ai i le taimi nei. Ma ou te molimau atu “amuia le nuu e fai Ieova mo latou Atua” (Salamo 144:15).
Faamatalaga mai le O Le Talisuaga Mulimuli, saunia e Simon Dewey; tuaatu © Getty Images; o isi ata uma na tuuina mai e le aiga o Aidukaitis