Ua Feiloai Elder Nelson ma le Au Paia i Amerika Tutotonu

Saunia e Jose Peña

Sui Sooupu o le Liahona

Ia Ianuari, ao i ai Elder Russell M. Nelson o le Korama a Aposetolo e Toasefululua i se tofiga mai le Au Peresitene Sili, sa ia malaga ai i Amerika Tutotonu e aoao ia taitai perisitua ma tagata o le ekalesia i le lotoifale.

El Salvador

O le Aso Toonai, aso 14 o Ianuari, sa feiloai ai Elder Nelson ma taitai perisitua mai El Salvador i totonu o se falelotu i le lotoa o le Malumalu o San Salvador El Salvador . Sa latou faatasi ai ma Elder L. Whitney Clayton o le Au Peresitene o Fitugafulu; Elder Enrique R. Falabella o le Fitugafulu, Peresitene o le Eria o Amerika Tutotonu; Elder Carlos Rivas, Fitugafulu Eria; Walter Ray Petersen, peresitene o le malumalu; ma David L. Glazier, peresitene o le Misiona a San Salvador El Salvador.

Sa aoaoina e Elder Nelson ia taitai i le auaunaga ma le taua o le avea ai ma leoleo mamoe o Isaraelu. Sa ia faamamafa atu le suesue i tusitusiga paia ma le faaaogaina o le Agaga Paia e avea o se taiala tumau. Sa ia saunoa foi i faamanuiaga o le lomiga fou a le AAG o le Tusi Paia i le gagana Sipaniolo.

O le aso na sosoo ai, sa pulefaamalumalu ai Elder Nelson i le konafesi a le Siteki a La Libertad San Salvador El Salvador, ma sa latou faatasi ai ma lona faletua o, Wendy, ma Elder Rivas.

I lana saunoaga, sa tuuina atu ai e Elder Nelson se faamanuiaga faaaposetolo i luga o tagata ma taitai o El Salvador o e o ola i le talalelei ma o loo faamaoni i a latou feagaiga.

Nicaragua

Ona oo lea i le aso 18 o Ianuari, 2012, sa feiloai ai Elder Nelson ma tagata o le au paia i Nicaragua, ma sa faatasi ai ma Elder Enrique R. Falabella ma Elder James B. Martino, o Fitugafulu uma i laua.

Sa ia uunaia le au paia ina ia faateleina le paia ma ia faaauau pea ona galulue i o latou faamaumauga o talafaasolopito o aiga. “Ou te folafola atu ia te outou afai ua outou saunia, o le a faataunuuina e le Alii Lana vaega ina ia outou mauaina se malumalu,” o lana saunoaga lea.

E tatau ona faatupuina i totonu o i tatou lava ia uiga auau mama o le Faaola, na saunoa ai Elder Nelson, e amata lea i le alofa.

“E mafai ona tatou aoao ia alolofa atu e ala i auaunaga,” na ia saunoa ai. “O le isi uiga auau mama o le gauai atu lea i sauniga: papatisoga ma le faamanatuga. E faatatau ia mea i le Faasatauroga o le Faaola.”

O isi mausa lelei na saunoa i ai Elder Nelson e ao i le au paia ona faatupuina, o le tatalo e pei ona tatalo le Faaola, ma ia maua le malamalama e ala i le suesueina o tusitusiga paia. “Faitau tusitusiga paia i lau fanau, atiina ae le fiafia i [tusitusiga paia], ma ou te faamautinoa atu ia te outou, o le a outou lagona le olioli ao outou faatatauina [mea na outou aoaoina] i o outou olaga,” o lana saunoaga lea.

O le mea mulimuli na saunoa ai Elder Nelson, “Atiina ae le tutumau; tumau e oo i le iuga. Na sili atu le mafatia o Iesu Keriso nai lo se isi lava tagata ma e lei toilalo foi. Sa Ia faalagolago i Lona Tama e oo i le iuga. Manatua lenei mea pe afai tou te feagai ma ni luitau o le olaga.”

I le faaiuga, sa faaali atu e Elder Nelson le agaga faafetai mo le faatuatua, tuuto, ma sefuluai ma taulaga a le au paia i Nicaragua, ma sa ia molimau atu e uiga i le Togiola.

“O le Toetu o lo tatou Alii ua faamautinoa mai ai ia i tatou ma tatalaina ai le faitoatoa i le ola e faavavau e ala i le faatuatua ma le salamo, pe afai tatou te tumau e oo i le iuga,” na ia saunoa mai ai.

Ao asiasi atu i le au paia i El Salvador ma Nicaragua, sa patipatia e Elder Russell M. Nelson i latou o e o ola i le talalelei ma o loo faamaoni i a latou feagaiga.