Manatu mo Afiafi Faaleaiga
O lenei lomiga e aofia ai tusiga ma gaoioiga e mafai ona faaaoga mo afiafi faaleaiga. O nisi nei o faataitaiga.
“O le Anapogi e Faamalolosia ai i Tatou Faaleagaga ma Faaletino,” itulau 10: Faitau le tusiga, ma fetufaai atu ia manatu o loo tusia i le itulau lona lua. Faailoa atu o le anapogi e aofia ai nisi mea e sili atu nai lo le le ‘ai—e tatau ona o faatasi ma le tatalo, tuuina atu o se molimau, ma taulaga anapogi. Atonu tou te fia fesili i tagata o le aiga pe na faapefea ona faamanuiaina i latou e ala i le anapogi. Mafaufau foi e faasoa atu le tala mai le Feagaiga Tuai o loo maua i le Eseta e 4.
“Gaoioi e Tusa ma Uunaiga,” itulau 20: Faitau pe otooto mai ia faamatalaga i autafa “O Faamoemoega e Valu o Faaaliga.” Ona faitau auauai lea o tala i le tusiga ma talanoa i le mafuaaga o le faaaliga i le tala. Uunai tagata o le aiga ina ia nofouta i lenei vaiaso i le taimi ma le auala latou te lagonaina ai le Agaga. Atonu e te manao e toe tulitatao i le vaiaso a sau ina ia talanoaina ai mea sa latou aoaoina.
”O Fea O Le A Tau Atu I Ai A’u Filifiliga?” itulau 56: Faitau pe otooto mai le tala; ona faitau lea o le upusii a Peresitene Boyd K. Packer. Faamanatu i tagata o le aiga e mafai ona latou filifili e sui, pe afai na latou faia ni mea sese.
“O Le Lesona a le Au Liki Laiti,” itulau 68: Atonu e te manao e amata i le usuina o le pese “E Mafai Ona Faavavau Aiga” (Tusipese a Tamaiti, 98). Faitau faatasi o se aiga le tala. Aisea e taua ai mo i tatou le faaalia o le lagolagosua mo tagata o o tatou aiga? E mafai faapefea e lou aiga ona lagolagoina atili le tasi ma le isi?
Alofa ma le Malamalama i Afiafi Faaleaiga
Ina ua ou faatoa liliu mai ma a’o ou nofo i Kolomupia, sa valaaulia au e se aiga e sili ona faapitoa mai la’u uarota i le afiafi faaleaiga. O se taimi muamua lea ua ou auai ai i se afiafi faaleaiga, ma sa faateia au i le agaga o le alofa ma le faatuatua sa ou maua ai iina.
Ina ua potopoto faatasi tagata uma, sa faia le matou tatalo ona fetufaai lea e uiga i mea sa matou faia i le vaiaso ua tea. Ina ua uma ona matou talanoa, sa faia se matou gaoioiga.
Sa tape moli, ma sa matou tusia ni fuaitau i luga o pepa felanulanuai e foliga i ni fatu. Ina ua uma, sa matou toe kiina moli ma faaali atu mea na matou tusia. O nisi e le i lelei, o nisi na leaga, ao isi e pei o a’u na faigata tele ona ou tusitusi; ou te manatu o au na sili atu ona leaga le tusitusi na i lo tagata uma. Ioe, sa matua manino mai lava le lesona: afai tatou te le mauaina le malamalama o le talalelei i o tatou olaga, o le a foliga pogisa mea uma, e le manino, ma faigata.
Na matua ootia au i lenei lesona. Ma o tausaga talu mai lena aso, ua ou taumafai e faamautinoa ua i ai i lo’u olaga se ala ua faatumulia i le malamalama o le talalelei aemaise lava ina ia avea au ma faataitaiga i la’u fanau.
Dina del Pilar Maestre, Kalefonia, ISA