Savali a le Au Peresitene Sili
Valaauina e le Atua ae Lagolagoina e Tagata
I le avea ai ma tagata o le Ekalesia, e masani ona valaaulia i tatou e lagolago tagata i valaauga e galulue ai. I tausaga ua mavae, sa faailoa mai ai e se tagata aoga e 18 tausaga le matua le uiga o le lagolago o auauna a le Alii. O loo faamanuiaina pea a’u e ala i lana faataitaiga faatauvaa.
Sa faatoa amata lona tausaga muamua i le kolisi. E lei atoa se tausaga talu ona ia papatiso ae tuua lona aiga e amata ana aoaoga i se iunivesite tele. O iina sa avea ai au ma ona epikopo.
A o amata le tausaga aoga, sa fai se ma faatalanoaga puupuu ma ia i le ofisa o le epikopo. E itiiti lava sina mea o ou manatuaina o lena talanoaga muamua, vagana ai sa ia faamatala e uiga i ona luitau i se nofoaga fou, ae o le a le galo ia te au le ma talanoaga lona lua.
Sa ia talosaga mai e fia vaai ia te au i lo’u ofisa. Sa ou te’i ina ua ia fai mai, “E mafai ona ta tatalo faatasi, ma e mafai ona ou faia le tatalo?” Sa ou tau fai atu i ai ua uma ona fai lau tatalo ma faamoemoe foi sa faapena o ia. Peitai, sa ou ioe atu i ai.
Sa amataina lana tatalo i se molimau na te iloa o le epikopo ua valaauina e le Atua. Sa ole atu i le Atua e ta’u mai ia te a’u le mea e tatau ona ia faia i se mataupu e tele sona taunuuga faaleagaga. Sa ta’u atu e le alii talavou i le Atua na te mautinoa ua uma ona iloa e le epikopo ona manaoga ma o le a tuuina atu fautuaga e manaomia ona ia faalogo i ai.
A o tautala o ia, sa oo mai i lo’u mafaufau ni tulaga lamatia faapitoa o le a feagai ma ia. Sa faatauvaa le fautuaga ae sa tuuina atu ma le manino lelei: tatalo e le aunoa, usitai i poloaiga, ma ia aua le matau.
O lena alii talavou, e tasi le tausaga i le Ekalesia, sa aoao e ala i faataitaiga mea e mafai ona fai e le Atua i se taitai a o lagolagoina o ia e le faatuatua ma tatalo a i latou e valaauina o ia e taitai. Sa faaalia e lena alii talavou mo a’u le mana o le tulafono o le finagalo autasi i le Ekalesia (tagai i le MF&F 26:2). E ui ina valaau e le Alii ia Ana auauna e ala i faaaliga, ae seiloga e lagolagoina i latou e i latou ua valaauina i ai e tautuaina, ona faatoa mafai lea ona latou galulue.
O la tatou palota lagolago, tatou te faia ai ni folafolaga faamaoni. Tatou te folafola atu e tatalo mo auauna a le Alii ma o le a Ia taitai ma faamalosia i latou (tagai i le MF&F 93:51). Tatou te tautino atu o le a tatou vaavaai ma faamoemoe e lagona musumusuga mai le Atua i a latou fautuaga ma soo se taimi e faatino ai a latou valaauga (tagai i le MF&F 1:38).
O lena folafolaga o le a manaomia ona faafouina i o tatou loto e le aunoa. O le a taumafai lou faiaoga o le Aoga Sa e aoao atu i le Agaga, ae e pei foi ona e ono faia, atonu e fai e lou faiaoga ni measese i luma o le vasega. Peitai, o oe e mafai ona e filifili e faalogo ma vaavaai mo taimi e mafai ona e lagona ai le oo mai o musumusuga. O le aluga o taimi e itiiti ni measese o le a e mataua ae tele atu faamaoniga o loo lagolago e le Atua lena faiaoga.
A tatou sii se lima e lagolago se tagata, tatou te tautino e galulue mo po o le a lava le faamoemoega a le Alii e valaauina ai lena tagata e ausia. A o laiti le ma fanau, sa valaauina lo’u toalua e aoao tamaiti laiti o le matou uarota. Sa le gata ina sii lo’u lima e lagolago o ia, ae sa ou tatalo foi mo ia ma talosagaina le faatagaga e fesoasoani atu ai ia te ia. O lesona sa ou mauaina o le talisapaia o mea e fai e tamaitai ma le alofa o le Alii i tamaiti o loo faamanuia ai pea lo’u aiga ma lo’u olaga.
Sa ma talanoa talu ai nei ma lena alii talavou sa lagolagoina lona epikopo i tausaga ua mavae. Sa ou iloaina ai sa lagolagoina o ia e le Alii ma tagata i lona valaauga o se faifeautalai, o se peresitene o le siteki, ma o se tamā. Fai mai o ia ina ua faaiu le ma talanoaga, “O loo o’u tatalo pea mo oe i aso uma.”
E mafai ona tatou filifili e tatalo i aso uma mo se tagata ua valaauina e le Atua e auauna ia i tatou. E mafai ona tatou faafetaia se tagata sa faamanuiaina i tatou e ala i lana auaunaga. E mafai ona tatou filifili e laa i luma pe a talosaga mai se tagata ua tatou lagolagoina mo ni volenitia.1
O i latou o e lagolago i auauna a le Alii i Lona malo o le a lagolagoina e Lona mana e le mafaatusalia. Tatou te manaomia uma lava lena faamanuiaga.
Aoao Atu mai Lenei Savali
A uma ona faasoa atu le savali, mafaufau e faitau atu le upusii lenei: “O le a avea oe e le Alii e fai ma meafaigaluega i Ona aao pe afai e te lotomaualalo, faamaoni, ma filiga. … O le a e lagonaina se malosiaga faaopoopo pe a lagolagoina oe e le faapotopotoga ma faamanuiaina i le tofiga” (O Le Aoao Atu, E Leai Se Isi Valaauga E Sili Atu [1999], 20). Ia faataaliolio le aiga i se mea faitino mamafa ma fai atu i se tagata se toatasi e taumafai e sii i luga. Ia faaopoopo atu i ai se tagata se toatasi i le taimi, ma valaaulia isi tagata o le aiga e fesoasoani e sii i luga le mea faitino. Talanoa po o le a le mea e tupu pe a fesoasoani i ai tagata uma. Mafaufau e faamamafa atu le fautuaga a Peresitene Eyring e uiga i auala aoga e mafai ona tatou lagolago ai isi i o latou valaauga.
Tauagavale: ata na tusia e Scott Snow; luga: ata na tusia e Scott Greer; ata na saunia e Welden C. Andersen, Hyun-Gyu Lee, ma Frank Helmrich