O Se Malaetaalo mo Carly
O Carly W. mai Rexburg, Idaho, ISA, o se tagata fesoasoani pisi tele. I le fale e fesoasoani Carly i le vaaiga o pusi, taifau, ma moa a le latou aiga. Ona o Carly o se tasi o tamaitiiti aoga e sili ona lelei i lana vasega i le aoga, o lea e fesoasoani ai i isi tamaiti i le matematika ma le faitauga tusi. I le Peraimeri, o le pese a Carly e fesoasoani ai i isi tamaiti ia lagona le Agaga.
Ona o le lelei tele o le galuega a Carly na fai i le fesoasoani atu i isi, o lea sa filifili ai nisi o ana uo e fesoasoani atu foi ia te ia.
O Carly sa fanau mai ma se faama’i e ta’ua o le maeafoa. O lenei faama’i e faigata ai ia Carly ona faaaoga uma ona maso. O le faia o mea e pei o le savali i eleele le laugatasi ma le a’ea’e i luga o faasitepu e faigata tele mo ia. I le aoga, sa le mafai e Carly ona taalo i le malaetaalo ona o mea taalo i le malae sa faigata ona ia faaaogaina. Sa i ai foi isi tamaiti sa le mafai foi ona taalo i mea taalo i le malaetaalo.
“O isi taimi ou te faanoanoa ai ma le fiafia i le malologa puupuu ona e le mafai ona ou taalo i le malaetaalo,” o le tala lea a Carly.
O se tasi o uo a Carly, o Halli Jo, ma le tina o Halli Jo sa filifili e sue se tupe e fau ai se malaetaalo e mafai e Carly ma isi tamaiti aoga uma i le aoga ona faaaoga.
O Halli Jo, lona tina, ma le toatele o isi tagata sa galulue mo le mauaina mai o tupe mo le malaetaalo fou. Sa tele se galuega na alu ai, ae sa mafai ona lava se tupe na latou maua e fau ai se malaetaalo fou e mafai e tamaiti aoga uma ona taaalo ai.
“Sa matuai tele lava le galuega sa fai,” o le tala lea a Halli Jo. “Ae ou te le’i faanoanoa ai lava i le faiga o le galuega—na atili faateleina ai lo’u alofa ia Carly.”
Ua fiafia Carly ua mafai ona taalo i le malaetaalo ma ana uo. Fai mai o ia, “Ou te fiafia e savalivali i luga o matie ma alu i lalo i faasee. Ua matou maua faatasi ma a’u uo se taimi fiafia.”
E fiafia Carly i musika. E i ai o ia i se vaega pepese ma o loo ia aoaoina le taina o le piano.
O le mea e tasi e fesoasoani ia Carly e aoao ai le faapaleni o le tietie solofanua.
O le tasi o mea e sili ona fiafia Carly e fai i le malaetaalo o le i ve’a ma ana uo.
O le fola pa’u o le malaetaalo ua faigofie ai ia Carly ona savali ai i luga.
Carly ma Halli Jo (taumatau) e fiafia e taaalo i pepe meataalo, savalivali i fafo ma valivali ata faatasi.
Ata na pueina e Christina Smith