Alu i le Ofisa o le Misiona!
Felicien Dogbo Mobio, Ghana
O le taeao ina ua ou toe foi atu ai i le fale i Ghana mai la’u misiona i Ivory Coast, sa ou ala ai i le 6:00 i le taeao. O lo’u taimi faatulagaina e vaai ai le peresitene o le siteki mo lona faamaloloina o a’u na faatoa fai i le aoauli, o lea sa ou filifili ai loa e moe umi. A o ou moe, sa oo mai se manatu i lo’u mafaufau: “Alu i le ofisa o le misiona i Cape Coast.” Sa ou iloa le ofisa o le Misiona i Ghana Cape Coast, ae sa ou matuai le iloa pe aisea na tatau ai ona ou alu iina i lena taeao.
Ina ua mavae le oo mai o nei mafaufauga, sa amata ona ou lagona le popole i nei lagona, o lea sa ou alu ai loa i le ofisa o le misiona. A o ou alu sa ou popole po o le a sa’u tala e fai atu i le peresitene o le misiona. Sa ou iloa o le a fesili mai i le mafuaaga o lo’u oo atu, o lea sa ou taumafai ai e tapena se tali talafeagai.
Ina ua ou taunuu atu, sa ou le iloaina lava le tali. Sa valaaulia au e le peresitene o le misiona o Melvin B. Sabey, i totonu o lona ofisa, ma le manatu sa ou alu atu iina na te faamaloloina au. Ina ua uma ona fai mai ni nai fesili, sa fai mai Peresitene Sabey ou te alu i lo’u peresitene o le siteki e faamaloloina au.
“Ua ou iloa, Peresitene,” o la’u tali lea.
Sa nofo o ia mo nai sekone ona fesili mai lea o le fesili tonu lea sa ou taumafai e tali: “Aisea ua e sau ai iinei i lenei taeao, Elder Mobio?”
“Peresitene Sabey, e leai sa’u tali talafeagai i lena fesili,” o la’u tala lea. “Ae o ananei i le taeao sa ou maua ai se lagona malosi ou te sau iinei.”
Sa toe nofo o ia mo se taimi ma fai mai ia te au ma le malu, “Elder Mobio, o lou i ai iinei o le fesoasoani lea sa ou tatalo ai ananafi.” Sa ia faamatala mai, na faatoa taunuu atu lava ona fesoasoani ma ni faifeautalai fou. O se tasi o i latou o se tagata Aivori, o le faifeautalai muamua lea e tautala faaFarani ua ia mauaina, ma na te le iloa pe faapefea ona ia talanoa atu ia te ia. Ona ia tautino mai lea, “Ua ou mautinoa na faafofoga le Tama Faalelagi i lo’u atugaluga i le po ananafi.”
Na iu ina ou iloa le mafuaaga o le lagona na ou maua i le taeao. Sa vave ona ma faatasi atu i faifeautalai fou, ma sa ou faamatalaupu mo le alii faifeautalai Aivori a o amataina lana misiona.
O le fitu masina mulimuli ane, sa ou toe malaga atu ai i Ivory Coast e toe faafou lo’u tusifolau ma faasoa atu lena aafiaga matagofie i le peresitene o la’u misiona. Sa ia tau mai ia te au, “O i tatou o tufagaaao o le Alii. Na te silafia le auala ma le taimi e faaaoga ai i tatou i Lana galuega.”
Ou te iloa afai tatou te faatofu i tatou lava i le galuega matagofie a le Tama Faalelagi, e le tatau ona tatou popole. Ae tau lava o le tatou usitai i uunaiga a le leo, malu ma le itiiti ae tuu atu i le Alii e taitaia i tatou.