Na Faapefea Ona E Iloa E Tatau Ona E Sau?
Sherrie H. Gillett, Iuta, ISA
I le 33 o o’u tausaga, sa maliu ai lo’u toalua ona o le kanesa o le faiai. Sa faafuasei ona avea au ma se matua nofofua e tausia toatasi se fanau e toatolu. Sa o se taimi luitauina o lo’u olaga, ae o le fautuaga a le Alii “o nei mea uma e te maua ai le poto masani, ma o le a avea mo ou lelei” (MF&F 122:7) na tuuina mai ia te au le lototele e agai ai pea i luma.
Mulimuli ane, sa ou toe faaipoipo ma siitia atu i se uarota fou, lea sa valaauina ai au e avea ma peresitene o le Aualofa. I se tasi aso, a o ou tapenaina lo’u fale, sa ou maua se uunaiga manino e asiasi atu i se uso e le toaga i le lotu, o le sa le’i leva ona maliu lana tane. Sa ou tuleieseina le mafaufauga, ma le manatu e i ai mea e manaomia ona ou faia i lena aso. Ou te matamuli e tau atu, sa faalua ona ou toe mauaina lena lava uunaiga ona faatoa ou faia lea.
Ina ua ou taunuu atu i le fale o le uso i lena afiafi, sa pogisa. Sa ou faatatagiina le logo o le faitotoa ma faatalitali. Sa ou tuituia leotele ma toe faatalitali pea.
E fetaui lava lo’u liliu ou te aluese, ae ola loa le moli o le polotito, ma matala lemu mai le faitotoa. Sa falo mai ma le musua le ulu o le uso i le avanoa. O le a le galo lava ia te au lana fesili: “Na faapefea ona e iloa e tatau ona e sau?” Sa fai mai o ia, ua alu le aso atoa o tagi ma lagona ai e le mafai ona ola e aunoa ma lona toalua.
Sa ma talanoa mo le tele o itula i lena po. Ou te le manatuaina le tele o mea sa ma talanoa ai, ae ou te manatua lo’u tauina atu ia te ia, “Ou te iloa lelei lava le mea o loo feagai ma oe.” Sa ou faamautinoa atu ia te ia o le taimi o lana uo lea ma o le a puipuia o ia e le Alii. A o ma talanoa, sa ou matauina o le vaaiga atuatuvale sa i ona foliga ua suia i foliga o le toafilemu.
I le faaiuga o le ma talanoaga, sa ou opoina o ia ma le lotoatoa. Sa ou matuai lagona le agaga faafetai ona sa uunaia au e asiasi atu ia te ia. Sa ou iloa sa faatagaina au e lo tatou Tama Faalelagi agalelei e fesoasoani ia te Ia e fesoasoani atu i lenei uso lelei i ona taimi o puapuaga.