Sa Ou Totoina ni Fatu
Abel Chaves, Siamani
I se vasega o amioga lelei faapisinisi mo la’u polokalama o le matuaofaiva i le Iunivesite o Schiller International i Heidelberg, Siamani, sa faatonuina ai tagata aoga taitasi e fai se tautalaga e 20-minute i le faaiuga o le semesa. Sa fai mai le polofesa pe mafai ona ou talanoa e uiga i amioga lelei mai se vaaiga a se Au Paia o Aso e Gata Ai.
Sa papatisoina au i le 18 o ou tausaga ma sa valaauina au e faia se misiona i Pasila i se tausaga mulimuli ane. Talu mai lena taimi sa faaauau lava ona ou faasoaina atu le talalelei i le toatele o tagata.
Sa ou iloaina o le a avea ma se luitau le talanoa o mataupu faalelotu i le siosiomaga o le iunivesite, ae sa ou taliaina le luitau. Sa ou filifili loa e tapena se aoaoga e aofia ai faamatalaga mai le Mormon.org.
O la’u iunivesite e i ai tagata aooga mai soo se mea o le lalolagi. O la’u vasega o le suesuega o amioga lelei e atagia ai lena eseesega, i le i ai o ni tagata aoga e toa 18 mai atunuu eseese.
Sa amataina tautalaga e uiga i amioga lelei i ni tagata aoga se toalua mai Initia ona sosoo ai lea ma se tagata aoga mai Myanmar. O a’u lava le tagata mulimuli. Sa ou talanoa e uiga i le “O Le Aiga: O Se Folafolaga i le Lalolagi,” Mataupu Faavae o le Faatuatua, ma isi autu o le talalelei. Mo le toatele o tagata aooga, o le taimi muamua lea ua latou faalogo ai e uiga i le Ekalesia.
Sa ou faaiuina i la’u molimau e uiga i le talalelei ma le taua o le faia o le mea sa’o e ui lava i luitau e siomia ai i tatou. O le mea mulimuli lava, sa ou tuuina atu ai i tagata uma se Tusi a Mamona i a latou lava gagana. Ina ua uma la’u tautalaga, sa tu’i mai a’u i ituaiga o fesili eseese. O la’u tautalaga e 20-minute, sa iu ina tasi le itula.
O le aso aoga na sosoo ai, sa fai mai sau uo mai Initia, sa faagaeetia lava o ia i la’u tautalaga ma ua uma ona ia faitauina se vaega o le Tusi a Mamona. O lana uo foi, mai Initia, sa fesili mai mo sana kopi. Mulimuli ane, sa fai mai sau uo mai Myanmar sa fiafia o ia e faalogo e uiga i le Ekalesia, ae maise lava i aoaoga e uiga i aiga ma le tulafono o le legavia aua e talitonu o ia i na mataupu faavae. Sa folafola mai o le a faitau i le Tusi a Mamona.
Sa faafetai mai au uo mai Ghana i lo’u tauina atu ia i latou e uiga i le Toefuataiga, ma folafola mai o le a latou taumafai e o e matamata i le malumalu i Accra. Na fai mai la’u uo mai Laipiria, o la’u savali sa o se faamalosiau ia te ia ma tuuina atu ia te ia se faamoemoe mo le lumanai.
Sa ou fiafia ona sa faamautuina atu e le Agaga o le Alii la’u savali. Atonu e le o taimi uma tatou te vaaia ai le aafiaga o a tatou upu, ae ua ou iloa o la’u tautalaga i la’u vasega o le a fua mai i le lumanai. Ou te faamoemoe e i ai se aso o le a talia ai e nisi o tagata sa i ai i totonu o lena potuaoga le talalelei ma avea ma ni tufugaaao a le Alii e faasalalau atu le savali o le Toefuataiga i atunuu, malo, gagana, ma tagata uma (tagai i le MF&F 133:37).