O Ou Tiute i le Perisitua Arona
Ua faauuina oe i le Perisitua Arona. O le a la lau mea e tatau ona fai nei?
Atonu o oe o se tiakono fou lava, na faatoa faauuina i le Aso Sa ua mavae, po o se aoao e fesoasoani e tapena le faamanatuga i vaiaso taitasi. Pe o oe foi o se ositaulaga potomasani lelei, atamai i auala o galuega faatino ma le taitaiina o aoao laiti ifo ma tiakono i o latou tiutetauave fou. Ae ua i ai ia i latou uma ua umia le perisitua se valaau e tasi mai le Alii: “Ia tuu atu nei i tagata taitoatasi e aoao lona tiute ma galue i le tofi ua tofi i ai o ia i le filiga atoa” (MF&F 107:99).
Ae o fea e mafai ona e alu i ai e aoao ai e uiga i lenei tiute? O le nofoaga muamua lava e tatau ona vaai i ai o tusitusiga paia. Ae e faapitoa lava, o le a e manao e suesue i vaega o le Mataupu Faavae ma Feagaiga lea o loo faataatia mai ai tiute o le Perisitua Arona: vaega e 20:46–60, 72–79; ma le vaega e 84:111.
O le isi punaoa lelei lava o le tamaitusi Faataunuuina o Lo’u Tiute i le Atua: Mo e Umia le Perisitua Arona. O lenei tamaitusi o loo vaevae atu ai ou tiutetauave o le perisitua i ni vaega se tolu: (1) “Faatautaia o Sauniga o le Perisitua,” (2) “Auauna Atu i Isi,” ma le (3) “Valaau Atu i Tagata Uma ia O Mai ia Keriso.” I le vaega o “Tiute o le Perisitua” mo tofi taitasi—tiakono, aoao, ma ositaulaga—o le a e maua ai mau faaopoopo e suesue ma fautuaga mo le faia o la oe lava fuafuaga e fesoasoani e te malamalama atili ai i ou tiute o le perisitua.
Sei o tatou vaavaai mo sina taimi i nisi o tiute autu o e umia le Perisitua Arona.
Tiakono
O se tiakono na te faia se faataitaiga lelei mo isi tagata o le korama ma isi tagata o le Ekalesia. E ola o ia i se olaga amiotonu ma tumau le agavaa e faaaoga le perisitua.
Na te tufaina le faamanatuga. O le tasi lenei o tiute e sili ona paia o se tiakono. A o faatino e se tiakono lona tiute, e fai o ia ma se sui o le Alii. E tatau ona agavaa o ia e tuuina atu faatusa o le faamanatuga i tagata o le Ekalesia. E tatau ona fai ona laei ma amio i se auala o le a atagia ai le natura paia o le faamanatuga. Afai e mafai, e tatau ona ofu sona ofutino paepae.
O se tiakono e avea ma se faifeau tumau, “tofia e leoleo i luga o le ekalesia” (MF&F 84:111). E tatau foi ona ia “lapatai, folafola, apoapoai, aoao ma valaau atu i tagata uma ia o mai ia Keriso” (MF&F 20:59). O lenei tiutetauave e aofia ai le faaaumeaina o tagata o le korama ma isi alii talavou, logoina o le au paia i fonotaga a le Ekalesia, faasoa atu le talalelei, ma tuuina atu le molimau.
E fesoasoani atu i le epikopo i le “faataunuuina … mea tau le tino” (MF&F 107:68). O lenei tiutetauave e ono aofia ai le aoina o le taulaga anapogi, tausia o e matitiva ma le tagolima, tausia o falelotu ma lotoa, ma le avea ma avefeau mo le epikopo i fonotaga a le Ekalesia.
E auai o ia i aoaoga a le korama e ala i le avea ma se tagata aoga malosi o le talalelei. O isi tiute e aofia ai le fesoasoani i le au paia ia maua o latou manaoga faaletino, sauniuni mo le, ma le tuuina atu o le auaunaga faafaifeautalai, lagolagoina ma le fesoasoani i peresitene o le korama, faatoagaina o alii talavou o le vaitausaga o le korama, ma le aoaoina o le talalelei.
Aoao
O se aoao e i ai tiutetauave uma o se tiakono. O ia foi e i ai tiutetauave nei:
Na te tapenaina le faamanatuga. O le tiutetauave o aoao le saunia i taimi uma o le faamanatuga mo le sauniga faamanatuga. O le tapenaina o le faamanatuga o se faataitaiga lelei lea o le faia o se auaunaga e aunoa ma le faamoemoe e viia ai i le faia o lena mea. E tele lava ina le iloa e le au paia o le au aoao e tapenaina le faamanatuga ae e faataunuuina lava le auaunaga, ma e fiafia ai le Alii aua o le auaunaga moni lena.
“O le tiute o le aoao o le leoleo lea i luga o le ekalesia e le aunoa, ma faatasi ma faamalosi i latou” (MF&F 20:53). O se tasi auala e fai ai lenei mea o le avea ma se faiaoga o aiga.
E tatau ona ia “vaai ia leai se amioletonu i totonu o le ekalesia, po o se feitagai ma le tasi, po o se pepelo, faatuaupua, po o se tautala leaga” (MFF 20:54). O lenei tiutetauave e aofia ai le avea ma se tagata e faatupuina le filemu e ala i le fesoasoani i le au paia ia fiafia le tasi i le isi. E tatau ona ia uunaia i latou e siomia o ia e vaai i taimi uma i itu lelei o isi tagata.
Na te “vaai ia potopoto soo faatasi le ekalesia, ma vaai foi ia fai e tagata uma o le ekalesia o latou tiute” (MF&F 20:55). O se vaega o lenei tiutetauve o le valaaulia lea o isi e o i le lotu.
Ositaulaga
O se ositaulaga e i ai tiutetauave uma o se tiakono ma se aoao. O ia foi e i ai tiutetauave nei:
E taitai o ia i le laulau o le faamanatuga. O le faamamaluga o le taulimaina o le faamanatuga e tuuina atu i ositaulaga, o e faia tatalo o le faamanatuga. E tatau ona masani lelei se ositaulaga i tatalo o le faamanatuga, fai faalelei lavalava, ma fufulu ona lima a o lei faatinoina lenei sauniga. Ae maise lava, e tatau i ositaulaga ona agavaa e faatino lenei sauniga paia o ni sui o le Faaola.
O le isi tiute o ositaulaga o le faia lea o papatisoga pe a faatagaina ai e le epikopo po o le peresitene o le paranesi (tagai i le MF&F 20:46). O le papatisoina i le pule e tatau ai o se tasi lea o sauniga e sili ona taua ma paia i le Ekalesia, aua o le sauniga lea e avea ai i tatou ma tagata o le Ekalesia, faamagalo ai a tatou agasala, ma ulu atu ai i le ala o le malo selesitila.
“O le tiute o le ositaulaga o le talai atu, aoao atu, faamalamalama atu, [ma] apoapoai atu” (MF&F 20:46). O lona uiga o se ositaulaga e valaauina e aoao atu i isi le mataupu faavae o le talalelei. Ma ina ia mafai ona aoao atu mataupu faavae o le talalelei, ioe, e tatau ona ia aoaoina muamua na mataupu faavae. O lenei tiutetauave o le a avea ma se fesoasoani tele a o sauni o ia e auauna atu i se misiona talai.
E tatau ona ia “asiasi atu i fale o tagata taitoatasi o le ekalesia, ma apoapoai atu ia te i latou ia tatalo atu ma le leo ma i le mea lilo ma faasaga atu i tiute uma faaleaiga” (MF&F 20:47). E fai e se ositaulaga lenei mea a o ia faataunuuina lona tiute o le avea ma se faiaoga o aiga ma asi aiga na totofi atu ia te ia.
O loo ia te ia le pule e tuuina atu ai le Perisitua Arona ma fauu ai isi ositaulaga, aoao, ma tiakono ae seiiloga e faatagaina ai e le epikopo po o le peresitene o le paranesi (tagai i le MF&F 20:48). O le mana e tuu atu ai le Perisitua Arona e paia.
Tamaitai Talavou ma le Perisitua
E ui o le pule o le perisitua e na o alii agavaa o le Ekalesia e tuuina atu i ai, ae o faamanuiaga o le perisitua e maua e tagata uma—ma o nei faamanuiaga e tutusa lava mo alii ma tamaitai, teine ma tama, mauoa ma le mativa. Ua i ai i fanau uma a le Atua le faamanuiaga o le mauaina o na sauniga faaola o le perisitua.
I le avea ai ma afafine filifilia o le Atua, o tamaitai talavou uma o e ua papatisoina ua mauaina foi le meaalofa o le Agaga Paia. Ua ia i latou le aia tatau e saili ai ma ia faamanuiaina i faamanuiaga faaleagaga, e pei o “le meaalofa o gagana, valaoaga, faaaliga, faaaliga vaaia, faamaloloina o ma’i, ma isi mea faapena” (Mataupu Faavae o le Faatuatua 1:7). A ola tamaitai talavou i ni olaga amiotonu ma taumafai e auauna atu i isi e ala i le mauaina ma le atiina ae o nei meaalofa o le Agaga, o le a avea a latou faataitaiga mo le lelei o se faatosinaga malosi i alii talavou e siomia i latou.
E mafai faapefea ona fesoasoani tamaitai talavou i alii talavou ia avea ma e agavaa e umia le perisitua? Sa tali se tasi o alii talavou: “Ou te manatu o mea tetele lava e lua latou te faia o le fai o lavalava tauagafau ma ia agalelei i tagata uma. O faia o lavalava tauagafau e fesoasoani e faatumauina ai ou mafaufauga mama, ma e mafai ona ou tilotilo atu ia i latou a o talanoa!”
O Le A Fesoasoani Le Tama Faalelagi Ia te Oe
A oo ina malamalama outou o tiakono, aoao, ma ositaulaga ma faataunuu o outou tiute o le perisitua, o le a outou oo i le olioli lea e sau mai le taulimaina o sauniga o le perisitua, mai le auauna atu i isi, ma mai le valaaulia o tagata uma e o mai ia Keriso. I la latou savali i e umia le Perisitua Arona, sa tusia ai e le Au Peresitene Sili: “Ua ia te oe le faatuatuaga ma le talitonuga tele o le Tama Faalelagi, ma ua i ai se misiona taua mo oe e te faataunuuina. O le a fesoasoani o Ia ia te oe pe a e liliu atu ia te Ia i le tatalo, faalogologo mo uunaiga a le Agaga, usitai i poloaiga, ma tausi feagaiga ua e osia” (Faataunuuina o Lo’u Tiute i le Atua [2010], 5).
O le faauuina i le Perisitua Arona e aumai ai aia tatau faapitoa, tiutetauave, ma tiute. Ina ia aoao po o a nei mea, ia sue muamua i tusitusiga paia. O le isi punaoa lelei lava o le tamaitusi Faataunuuina o Lo’u Tiute i le Atua: Mo e Umia le Perisitua Arona.
E ui o le pule o le perisitua e na o alii agavaa o le Ekalesia e tuuina atu i ai, ae o faamanuiaga o le perisitua e maua e tagata uma, alii ma tamaitai.
Ata na saunia e Cody Bell