O Se Faataitaiga Lelei Atu
Maimau pe ana matou faalogo i faatonuga a o matou taitai, ae matou te le’i manatu e faatatau ia i matou.
Sa tonu i o matou taitai o Tamaitai Talavou o se malaga mo se moe tasi o le mea tonu lea e saunia ai i matou mo le tolauapiga. Sa latou filifilia le auvai o le Vaitafe o San Pedro i Arisona i saute, ISA, e faatu ai la matou tolauapiga faataitai.
Ina ua uma ona fofola ato moe, sa matou mananao ma nisi o teineiti e suesue ma o i totonu o le vai. Sa manatu taitai e tatau ona fai muamua ni lesona e uiga i le saogalemu ma le fesoasoani muamua. O lea sa matou saofafai uma ai i lalo o se mea paolo i talaane o le vaitafe mo le lesona.
Sa le faigofie le taumafai e faalogo ma le totoa a o matou vaai atu i le iila o le vaitafe i le susulu o le la. Sa agiagi le savili i laau o le vavae a o tautala ia Sister Brown (ua suia igoa). Sa matou faalogo muamua uma foi i le lesona, ae ou te le malamalama pe aisea na tatau ai ona matou faalogo i ai i le taimi lenei. Sa matou iloaina uma lava e oomi se manua e taofi ai le toto, ae sa ia toe tauina mai foi ia i matou.
Ae latou te le’i tuuina mai i matou e o, sa faafia ona tau mai e taitai e aua nei o matou o i totonu o le vaitafe e aunoa ma ni seevae. “Tou te le iloa lava po o a ni mea o i ai iina, ma e tatau ona puipui tou vae.”
A o ou oo atu i autafa o le vaitafe, ua amata ona faapisipisi nisi o teineiti i totonu o le vai. Sa enaena le vai i le palapala. Sa itiiti ifo ma le futu le loloto o le vaitafe e tau lava i le isi itu, ma ou te le’i talitonu sa matautia.
Sa ou filifili e aveese o’u seevae. Sa na o le tasi la’u pea seevae na aumai, ma ou te le iloa le uiga o le faasusu o seevae ma see susu ai i le aso atoa. O a’u uo lelei lava e toalua, o Mafa ma Elisapeta, sa la tau fai faamanatu mai le mea na fai mai ai taitai. Ae sa ou aveeseina lava ou seevae ma ta’u atu i ai a’u mafuaaga. Sa aveese foi e Mafa ona seevae. Ae o Elisapeta sa musu lava. Sa ou asa atu i le vai ma i se leo tau faalili sa ou fai atu ai, “See pea ou seevae pe a e manao ai.”
Sa saofai o ia i lalo, aveese ona seevae, ma momoe mai i totonu o le vai. Pe a ma le lima o laa ona tu lea, suia ona foliga vaaia, ma fai mai i se leo malu,” Oi, aue.” Ina ua sii ae lona vae mai le vai. Sa ou iloa atu le tafe mai o le toto i se lavea. Na tu o ia i se atigifagu ta’e.
O le vaaia o le toto na pei ai e pe lo’u faiai. E ui ina sa le’i leva atu ona ou faalogo i se lesona i le fesoasoani muamua, ae sa matuai ou le iloa le mea e fai. Sa ou filifili e momoe atu mo se fesoasoani. Sa fesoasoani le isi toalua e aumai o ia mai le vai.
Sa ou maua ia Sister Brown ma ta’u atu i ai le mea na tupu. Sa faapea o ia o sa’u tala ula. Ae ina ua ia iloa atu Elisapeta o saofai i le auala ma le toto o loo pasī mai i lona vae, sa tamoe atu i ai o ia ma taualaga atu, “Oomi malosi le mea o loo lavea!”
O le lesona o le 10 minute na muamua atu ua amata ona gofo ifo. O teineiti, na tutu faataamilo ia Elisapeta ma matamata i le toto o lona vae, sa latou faamaualugaina teisi lona vae ma oomi malosi le manua.
Sa ave atu Elisapeta i le falemai, lea sa ta’u ifo ai ia te ia na toetoe lava a afa lona vae i le lavea. Sa manaomia ai ni filo se tele ma o le a umi se taimi ona faatoa toe lelei lea. O le isi taimi na ou vaai ai ia te ia, sa ia faaaogaina ni tootoo.
Ou te le’i mafaufauina lava e mafai pe o le a ou tauanauina la’u uo lelei e fai se mea o le a tigaina tele ai o ia. Ou te le’i vaai ia te a’u lava o se faatosinaga le lelei i se taimi muamua.
O le taimi nei, o loo ou taumafai e avea ma se faataitaiga lelei atu i au uo, ma ua sili atu lo’u naunau e faalogo i o’u taitai. Latou te iloa mea o loo latou fai mai ai.
Ata na tusia e Dilleen Marsh