Mataupu Faavae ma Feagaiga 135:3

A o lei maliufasia o ia, sa aumaia e le Perofeta o Iosefa Samita le tele o mea e faamanuia ai tagata uma.

3 O Iosefa Samita, le Perofeta ma le Tagatavaai a le Alii, e tele atu mea na ia faia, vagana ai lava Iesu, mo le faaolataga o tagata i lenei lalolagi, nai lo se isi lava tagata na ola ai. I le va puupuu o le luasefulu tausaga, na ia aumaia ai le Tusi a Mamona, lea na faaliliuina e ia i le meaalofa ma le mana o le Atua, ma sa avea ma ala na faasalalau atu ai i konetineta e lua; auina atu le atoatoaga o le talalelei tumau faavavau, ua i ai i ona totonu, i itu e fa o le lalolagi; aumai faaaliga ma poloaiga ua i ai i le tusi lenei o Mataupu Faavae ma Feagaiga, ma le tele o isi tusi ma aoaoga poto mo le manuia o le fanauga a tagata; faapotopoto le tele o afe o le Au Paia o Aso e Gata Ai, faavae se aai tele, ma tuua se ta’uta’ua ma se igoa e le mafai ona faaumatia. Sa soifua maualuga o ia, ma sa maliu maualuga o ia i luma o fofoga o le Atua ma lona nuu; ma e pei o le toatele o le au faauuina a le Alii i taimi anamua, ua faamau faailgoaina lana misiona ma lana galuega i lona lava toto.

Tagatavaai

O se tagatavaai:

Ua faatagaina e iloa e [ona] mata faaleagaga “mea sa le vaaia e mata faalenatura” (tagai i le Mose 6:35–38).
O se talifaaaliga ma o se perofeta (tagai i le Mosaea 8:13–16).
E iloa mea ua tuanai, taimi nei, ma le lumanai.

E Tele Atu Mea Na Ia Faia

“O le galuega ua faia e Iosefa Samita ua le faapito lea i le na o le olaga nei, ae aofia ai foi ma le olaga a sau, ma le olaga sa i ai. I se isi faaupuga, e faatatau ia i latou sa soifua mai i le lalolagi mo i latou o loo soifua ma i latou o le a soifua pe a uma i tatou. E … faatatau … i le aiga uma o tagata mai le faavavau i le faavavau.”

Peresitene Iosefa F. Samita (1838–1918), Aoaoga a Peresitene o le Ekalesia: Iosefa F. Samita (1998), 13–14.

Meaalofa ma le Mana o le Atua

Sa faaliliuina e Iosefa Samita le Tusi a Mamona “e ala i le alofa mutimutivale o le Atua, i le mana o le Atua” (MF&F 1:29) ma “i ala na saunia muamua” (MF&F 20:8), e aofia ai le Urima ma le Tumema.

Ta’uta’ua ma se Igoa E Le Mafai Ona Faaumatia

“E ui o mea na tutupu i le aso 27 o Iuni, 1844 [o le Maturoina o Iosefa Samita ma Ailama Samita], e matautia, ae ua tatou maua ai le mafanafana i lo tatou iloaina lea o le Maturoina o Iosefa Samita e le o le mataupu mulimuli lea o lenei faamaumauga. E ui o i latou o e sa saili e aveese lona ola na lagona o le a muta ai le Ekalesia e aunoa ma ia, ae o lana molimau mamana o le upumoni, o aoaoga na ia faaliliuina, ma lana folafolaga i le savali a le Faaola o loo olaola pea i aso nei i loto o le silia ma le 12 miliona o tagata [o le Ekalesia] i le lalolagi atoa, o e o loo tautino atu e faapea o ia o se perofeta a le Atua.”

Peresitene Thomas S. Monson, “O Le Perofeta o Iosefa Samita: O Se Faiaoga e Ala i Faataitaiga,” Liahona, Nov. 2005, 69.

Ua Faamau Faailgoaina Lana Misiona ma Lana Galuega i Lona Lava Toto

Faitau i upu o le viiga “Viia Le na Fetaia’i ma Ieova” (Viiga, nu. 15) ona tusi lea i lau api o talaaga ia ou lagona e uiga i le Perofeta o Iosefa Samita.