Mai le Misiona
O Le Vavega o le Faamaloloina Faaleagaga
I se tasi aso a o ma o atu ma la’u soa e asi se tagata fou liliu mai i Colombo, Pasila, sa tumu le fale i tagata o le aiga. Sa tau le ofi, ae sa latou valaaulia lava i maua i totonu e faasoa atu se savali. E fetaui le tau amata atu [o le savali] ae sau loa i totonu le tuagane o le tagata liliu mai. Sa le o ia o se tagata o la tatou Ekalesia ma sa le fiafia i le ma asiasiga. Sa foliga mai sa ia sailia soo se auala e tetee ai ia i maua.
Sa ia te ia se tamaiapi o tagata uma o lana aulotu ma o latou gasegase. Sa fai mai ia i maua pe ma te talitonu i le meaalofa o le faamalologa. “Ioe, ma te talitonu i ai,” sa ma tali atu ai. “Ia la,” sa ia faaauau ai, “ua ou faamaloloina uma lava tagata o loo i lenei tamaiapi. E toafia ni tagata ua oulua faamaloloina?”
Sa ma taumafai e faamatala atu le perisitua, faatuatua, ma le ala e tutupu ai mea e tusa ai ma le finagalo o le Atua, ae ina ua mavae sina taimi, sa ma lagonaina le pei ua tulituliapū i maua ma osofaia.
Ma “i le itula tonu lava” (MF&F 100:6) sa ma manaomia ai, sa musumusu mai le Agaga i le mea e ta’u atu. Sa ma faamalamalama atu e ui ina ma talitonu i le faamalologa, ae o la ma galuega o ni faifeautalai O Le Ekalesia a Iesu Keriso o le Au Paia o Aso e Gata Ai, o le aumaia o le faamalologa faaleagaga ia i latou matou te aoaoina, o lea faamalologa e na o le taliaina o le Togiola a Iesu Keriso e maua ai e ala i le faatuatua, salamo, papatisoina i le faatofuina, mauaina o le meaalofa o le Agaga Paia, ma le tumau seia oo i le iuga.
Sa ma faamalamalama atu, e ui ina tatou talitonu i faamalologa faaletino, ae o le faamalologa aupito taua o le faamalologa faaleagaga. Ma o le ituaiga faamalologa lena sa ma vaaia i aso uma. E le afaina lava la pe na faamaloloina faaletino ia tagata pe afai e le’i salamo ma sui o latou olaga e mulimuli ia Keriso.
A o taialaina i maua e le Agaga e tali atu i se agaga toafimalie, sa faapea ona mou ese ia lagona le lelei mai le potu, sa tuu le taumafai o le tuagane e faasagatau mai, ma sa mafai ona faasoa atu le ma savali.
O masina mulimuli ane, ina ua uma la’u misiona, sa ou faitau ai i le faamatalaga lenei i le Liahona mai le api talaaga a le misiona a Ioane Tana: “O le liuaina o le vavega silisili lea. E sili atu foi le matagofie nai lo le faamaloloina o e mamai po o le faatuina mai o e ua maliliu. Aua e ui o se tagata na faamaloloina e iu ina toe gasegase foi, ma iu ai ina maliu, ae o le vavega o le liuaina e mafai ona tumau e faavavau ma e aafia ai le faavavau mo le tagata liliu mai faapea ma ana fanau. Ua faamaloloina ma faaolaina augatupulaga atoa mai le oti e ala i le vavega o le liuaina.”1
Ou te matuai faafetai ona sa uunaia e le Agaga ni faifeautalai se toalua na tautoai ina ia manatua lo tatou faamoemoega, o le faaolaina o agaga.
Ata na tusia e Bryan Beach