Malolo mo se Misiona

Saunia e Elyse Alexandria Holmes

Pe e te tuua se avanoa e tulitulimatagau ai lau sini ua leva ona e moemiti i ai ina ia e faia se misiona?

O le sisina ifo o le afu i ona foliga, sa mataituina ai e le alii lauiloa i Ausetalia i le lakapi o Viliamu Hopoate le polo. O lana au, o le Blues, e fai ma sui o Niu Saute Uelese, o loo fetaui ma le latou fili, o le Maroons mai Kuiniselani, i le tauvaga e sili ona taua o le tausaga. Ina ua uma le 20 minute muamua, sa i tua le au a Uili ma e tatau ona vave le latou tulituli atu. E tele mea e tatau ona faamaonia e Uili aua o lana tauvaga muamua lenei i le au. O ia foi o le tagata taalo aupito laitiiti o lana au ma o le tagata lona lua e sili ona laitiiti ua taalo i le taamilosaga o le State of Origin [Setete o le Afuaga].

Sa tilotilo atu Uili a o pasi atu le polo i lana au ona togi mai lea ia te ia. Sa puna o ia i luga e pue. Maua! Faatasi ai ma le polo i lona lima, sa eli atu ai Uili i le laina sikoa. Faatasi ai ma le puipuiga i ona autafa tonu lava, sa emo atu ai i le isi itu o le malae. Toe lava o ni nai iata. I le tulimanu o le malae, i le va o le faia o se sikoa ma le sili i fafo le vae, na toetoe lava a uma le taimi o Uili. Sa tulei malosi atu i luma, aapa atu i le laina sikoa ma le faatuatua, ma tatao le polo i le palapala. Sa sāō tagata mo sina taimi. Pe na ia sikoa? Ona ia faalogoina lea o le feei o le au maimoa i le tapuaiga!

Ola Ae ma le Lakapi

A o 4 tausaga o Uili, sa lesitala ai o ia e ona matua i le kalapu lakapi i le lotoifale. E foliga mai e laitiiti tele, ae o lena lava foi taimi sa fiafia ai Uili i le “futi” (o le agaga e ta’u ai le “lakapi”). E atoa ane le 12 o Uili, ua avea le lakapi ma se mea e sili atu nai lo na o se taaloga mo ia, ma sa filifilia o ia e taalo i se au liki laiti. E 16 ane ona tausaga ua taalo mo se au liki laiti faapolofesa.

I Ausetalia, a atoa le 20 tausaga o tagata taaalo, ua lava lo latou matutua e taaalo faapolofesa ai i se au liki matutua. E ui lava ina sa 18 tausaga o Uili, ae sa oo atu tauofoga mai le taumatau ma le agavale. Sa avea o ia ma se tagata fou iloga. Sa ofo atu e se tasi o au ia te ia se konekarate e 1.5 miliona tala Ausetalia—o se ofo e seāseā faia i tagata taaalo o lana tupulaga. Peitai, e le o le mea lena sa vaaia e Uili i lona lumanai i le taimi lena. Sa filifili Uili e fai se misiona.

Faia o le Filifiliga o le Misiona

Ina ua oo i le taimi na tatau ai ia Uili ona faailoa atu pe o le a alu e fai se misiona pe talia se konekarate lakapi liki, sa faigofie ia te ia le faaiuga. “Sa ou tuuina le misiona i lo’u mafaufau ma lo’u loto a o ou talavou, ma sa ou faia se folafolaga ia te au lava o le a ou le faatagaina manao o le lalolagi e pulea a’u,” o lana tala lea.

E ono fesili le lalolagi, Ae faapefea le tupe? o konekarate? o le taalo lakapi faapolofesa—lana miti i le olaga atoa? O le a se eseesega e i ai lona olaga pe ana ia taliaina se konekarate faapolofesa? “Semanu e mafai ona fesoasoani ai i lo’u aiga i mea tautupe. Semanu e mafai ona mautu ai foi lo’u lumanai mo nai isi tausaga e sosoo ai,” na ia tautino ai.

Aisea la na ia le taliaina ai le ofo? “O se misiona o se mea e manaomia mai e le Alii mai ia te a’u, mai i alii talavou o le Ekalesia,” o lana tala lea. “O se auala e faafetai atu ai i le Alii mo mea uma ua Ia faia mo a’u i o’u tausaga e 19 iinei i le fogaeleele. Ma o le iuga, ailoga ou te fiafia pe ana ou nofo. Sa ou faia le filifiliga e faia se misiona aua o le a i ai lava le lakapi iina.”

O le faasilasilaga a Uili sa le mautonu ai ma faateia ai le toatele. I se faamatalaga e uiga i ana uo le lolotu, sa ia fai mai, “Latou te le malamalama i le pogai moni ua ou alu ai; pau lava le latou matau ua ou savali ese mai le taaloga mo le lua tausaga.” Sa ta’u atu e Uili ia i latou, “O loo ou aoaoina tagata e uiga ia Iesu Keriso ma auauna atu i isi. O se mea ou te manao e fai.” Ina ua latou faalogo i le faamalamalamaga a Uili, sa faapea loa ona lagolago atu ana uo.

Saunia e Auauna Atu

Sa iloa e Uili sa le lava le na o le manao e fai se misiona. Sa ia iloaina sa taua le saunia. O le mea e tasi sa ia faia o le o ma faifeautalai faamisiona i le aoaoina atu o ni lesona sa atofaina. “A fai mai faifeautalai ou te tali i fesili, sa foliga mai e o mai upu ou te le’i iloa e mafai ona fesoasoani i le tagata sailiili e malamalama teisi ai,” o lana tala lea. “Ma o nisi o tagata sailiili sa latou aoaoina—lea sa ou fesoasoani e aoao—na papatisoina talu ai nei. O se faamanuiaga ia te au le vaaia o lena mea.”

O loo auauna atu nei Uili i le Misiona a Ausetalia Brisbane, peitai na te le’i tuua atoa le lakapi. E ui ina e le mafai ona taalo o ia, e galue o ia o se faifeautalai ma le naunautai lava e tasi lea e i ai mo le lakapi. A o le’i alu i lana misiona, sa ia ta’ua, “O loo i ai lava iina le faamemelo ma le finafinau e tasi i le taalo lakapi ma le auauna i le Alii. I taaloga e tatau ona e galue malosi e saili le manumalo. E mafai ona e faatataua lena mea i le galuega faafaifeautalai aua o loo ou galue malosi e taumafai e saili tagata o e fia faalogo i le talalelei.”

Foi Mai ma le Mamalu

Soo se taimi lava e tuua ai e se tagata lauiloa i taaloga le tulaga mo se taimi umi, ae maise lava mo le lua tausaga, e masalosalo tagata po o le a le mea o le a tupu pe a foi mai o ia? Ua iloa e Uili o le faia o se misiona, na te ono lafoaia ai ni mea se tele, ae ua ia iloa foi ua ia lafoaiina mo se mea e sili atu le matagofie. “Ou te manatu o se ositaulaga tele lea, ae o se mea ua ou naunau e fai,” o lana tala lea. “E mafai ona tupu soo se mea, ma o le lua tausaga o se malologa talafeagai lea mai le taaloga. Ia te au lava ia, ou te fia toe foi mai ma taalo lakapi.”

E ui lava o le taalo lakapi faapolofesa sa avea ma ana miti i taimi uma lava, ae ua iloa e Uili faamanuiaga e faavavau e oo mai mai le auauna atu i se misiona. “I le lakapi liki, e i ai i taimi uma le olioli i le manumalo ma le sikoa, ae o lena olioli e na o ni vaiaso lava e tumau ai po o ni nai aso. E le umi se taimi e te faapelepeleina ai,” o lana faamatalaga lea. “Ae o se uo po o se tagata sailiili e sau i le Ekalesia ma le vaaia o le mafai e le talalelei ona faamanuia o latou olaga e faavavau, e mafai ona tuuina e faavavau se ataata i ou foliga.

Ata na saunia e Bryan Rowland