Iango Ibukin Bootakin te Utu n te Tairiki
Te bwai ae taekinaki aio kanoana bwaai ao mwakuri ake a na kona ni kamanenaaki ibukin te botaki n utu n te tairiki.
“Korakoraia Ara Bakatibu,” iteraniba 16: Wareka te rongorongo ma am utu. Katuruturua te rongorongo aei ae mairoun Unimwaane L. Tom Perry: “N aron ae a karaoa te rereua bwaeoniia bwa e na raure ueena n aron ueen te rooti, ngaia are ai aron naba maiura ao ara utu ana kakabwaiaki ngkana ti irii aia katotoo ao ni bauta aia katei.” Iangoia n titiraki bwa a kanga ma utu ni kona n irii katotoo ake a kateaki irouia bwaeoniia ake ngkoa. Ko na bae n tangiria ni kainiin man anenean “Waaki Ngkami Aika Kam Raoiroi” (Anene n Taromauri nambwa 30).
“Kaitarai Taai Aika a na Roko ma te kantaninga,” iteraniba 35: Ko na bae n tangiria n kakimototoan karakinan te Tari Grilo ke n taekina te karaki ae onoti bwa ko kanga ke temanna ae ko ataia ni kaitarai taai aika a na roko ma te kantaninga. Buokia membwa n te utu ni kamwakura te rongorongo nakon maiuia man titiraki aekan titiraki aika “Tera kakaewenako are e karika te kanganga ibukim ni karekea te onimaki n taai aika a na roko? Tera ae ko kona ni karaoia ni kawakina te katei ae tamaroa ngkai ko kaitarai kakaewenako aikai?” Iangoa kainana man warekan kabanea ni barakaraba akana uoua man te rongorongo.
“Tera te Koaua ae Itiaki?” iteraniba 54: Moana am reirei man tibwauan terana are e reireia te kakoaua. Imwiina iangoa kauarerekean titiraki ibukin te kaoti koaua (tarai iteraniba 56‒57). Ngkana e anaaki nanom iroun te Tamnei, kaoia membwa n te utu ni kaota aia koaua imarenaia n tain bootakin te utu n te tairiki ke ni koroi aia koaua inanon aia tienoro.
“Te Wirikiriki n Nanoanga,” iteraniba 59: Wareka Ruka 6:27 Imwiina tibwaua karakinan James ao Carson, n toki n titirakiniia ataei bwa a na kaekai titiraki ake a kaotaki inano n te moan iteraniba. Kaungaia membwa n te utu bwa a na akoi nakoia tabeman.
“Waaki aika a Karaoaki Itinaniku” Bootakin te Utu n te Tairiki
Ngke 10 au ririki, I bwabetitoaki ma au karo, tariu, ao mwaaneu. I bon rangin kukurei n ikawairake ni karaoan ara Bootaki n Utu n te Tairiki ae teimatoa. Te Bootaki n Utu n te Tairiki bon buroon ara utu.
Ngkai I a riki bwa te membwa n te Ekaretia n te maan ae raka iaon 45 te ririki. Ma oin natiu aika niman, te katei e waaki nako. Tairikin te Moanibong a kawakinaki ibukin te utu.
N te kabanea ni Moanibong n te namwakaina, iai ara waaki ni kukurei ae ananau are ti aranna bwa ara “waaki aika a karaoaki itinaniku” bootaki n utu n te tairiki. Ti nako n tamnei, ni kawariia aoraki, n takakaro n te bwaake, n nooria Lola ao Lolo (tibura), ao a mwaiti riki.
Te kabanea n taneiai ni waaki aika a karaoaki itinaniku are I rinanona ae I aki kona ni mwaninga bon buokakia ataein te kawai. Ti aki kona ni kamatata te kimwareirei ao te kukurei are ti namakinna ni buokakia ake a rangin kainnanoa te buoka. Ti kataia, n ara kawai ae uarereke, ni kakukureia ataei ao n tuangiia bwa a na ataia bwa iai ae tabeakiniia ao n ataia bwa ngaira ni kabane bon natin te Atua.
Tita Mabunga Obial, Philippines