Pagpalambo og Pagtuo diha kang Kristo
Gikan sa usa ka pakigpulong nga gihatag sa seminar alang sa bag-ong mga presidente sa misyon sa Provo, Utah, niadtong Hunyo 23, 2011.
Dako ang atong mahimo sa pag-impluwensya ug pagpalapad sa panalangin sa hugot nga pagtuo nga atong madawat pinaagi sa Espiritu Santo.
Si Apostol Pablo tingali naghatag sa pinakamaayo nga kahulugan sa hugot nga pagtuo: “Karon ang pagtuo mao ang pasalig kanato sa mga butang nga atong ginapaabut, ug ang panghimatuod sa pagkaanaa sa mga butang nga dili nato makita” (Mga Hebreohanon 11:1). Gidugangan ni Alma nga ang mga butang nga gilauman ug dili makita “mga tinuod” (Alma 32:21).
Ang hugot nga pagtuo diha ni Jesukristo mao ang kombiksyon ug kasiguradoan sa (1) Iyang kahimtang isip Bugtong Anak sa Dios, (2) Iyang mahangturong Pag-ula, ug (3) Iyang literal nga Pagkabanhaw—ug ang tanan nga gikinahanglan kanato niini nga mga sukaranang reyalidad.
Gilakip ni Pablo ang hugot nga pagtuo sa iyang lista sa espirituhanong mga gasa (tan-awa sa 1 Mga Taga-Corinto 12:9). Tinuod ang hugot nga pagtuo mabatunan pinaagi sa Espiritu Santo, apan natala sa Bible Dictionary, “Bisan tuod ang hugot nga pagtuo usa ka gasa, kini kinahanglang amumahon ug tinguhaon hangtud kini motubo sama sa gamay nga liso ngadto sa dakong punoan.” Dako ang atong mahimo sa pag-impluwensya ug pagpalapad sa panalangin sa hugot nga pagtuo nga atong madawat pinaagi sa Espiritu Santo.
Ang Hugot nga Pagtuo Mabatunan pinaagi sa Pagpaminaw sa Pulong sa Dios
Ang unang pagpakita og hugot nga pagtuo diha ni Jesukristo mabatunan pinaagi sa pagpaminaw sa pulong sa Dios—ang ebanghelyo ni Jesukristo. Kon kana nga pagtulun-an gihatag ug gidawat pinaagi sa Espiritu Santo, “ang Espiritu sa kamatuoran” (tan-awa sa D&P 50:17–22), ang liso sa hugot nga pagtuo diha kang Kristo natanom. Si Pablo mitudlo niini ngadto sa mga taga-Roma sa dihang siya nagpasabut nga ang tanan makadawat sa gasa sa hugot nga pagtuo: “Ang pagtuo magaabut gikan sa madungog, ug ang madungog magaabut pinaagi sa pagwali mahitungod kang Kristo” (Mga Taga-Roma 10:17). Buot ipasabut, ang hugot nga pagtuo mabatunan pinaagi sa pagpaminaw sa mensahe nga mao ang pulong, o ebanghelyo, ni Kristo.
Samtang iyang gihulagway ang pagpangalagad sa mga anghel, si Mormon naghisgut kanato nga sa kanunay kini ang sumbanan nga ang hugot nga pagtuo mamugma pinaagi sa pagpaminaw sa ebanghelyo.
“Ug ang katungdanan sa ilang [mga anghel] pagpangalagad mao ang pagtawag sa mga tawo ngadto sa paghinulsol, ug sa pagtuman ug sa paghimo sa buhat sa mga pakigsaad sa Amahan, nga iyang gihimo ngadto sa mga katawhan, sa pag-andam sa agianan diha sa mga katawhan, pinaagi sa pagpadayag sa pulong ni Kristo ngadto sa pinili nga mga sulugoon sa Ginoo, nga sila magpamatuod kaniya.
“Ug sa ingon nga pagkahimo, ang Ginoong Dios nag-andam sa agianan nga ang nahabilin sa mga tawo makabaton sa hugot nga pagtuo diha kang Kristo, nga ang Espiritu Santo mahimo nga adunay dapit sa ilang mga kasingkasing, sumala sa gahum niini; ug sunod niini nga paagi gipahinabo sa Amahan, ang iyang mga pakigsaad nga iyang gihimo ngadto sa mga katawhan” (Moroni 7:31–32).
Gisangunan nga “magpamatuod kaniya,” ang mga misyonaryo gi-call, gi-set apart, ug gihatagan og gahum ubos sa mga yawe ug awtoridad sa pagka-apostol. Busa sila giihap lakip sa “pinili nga mga sulugoon sa Ginoo.” Buot ipasabut, isip awtorisadong mga mensahero sa Ginoo, sila, sa ilang pagtudlo ug pagpamatuod pinaagi sa gahum sa Espiritu Santo, motanom og hugot nga pagtuo diha kang Kristo ngadto sa mga kalag niadtong naminaw kanila.
Ang pulong nga atong i-deklarar, ang pulong nga nakamugna og hugot nga pagtuo diha kang Kristo, mao ang ebanghelyo, o ang maayong balita, ni Jesukristo. Sa yanong pagkasulti, ang maayong balita mao nga ang kamatayon dili ang katapusan sa kinabuhi ug ang atong pagkahibulag sa Dios temporaryo lang. Kita adunay Manluluwas, si Jesukristo, ang balaanong Anak sa Dios, kinsa pinaagi sa Iyang Pag-ula nakabuntog sa kamatayon ug impyerno aron ang tanan mabanhaw ug ang tanang maghinulsol ug magpabunyag sa Iyang ngalan adunay luna sa langitnong gingharian sa Dios sa kahangturan.
Ang Hugot nga Pagtuo Mabatunan pinaagi sa Paghinulsol
Ang paghinulsol may dakong bahin sa pagpalambo og hugot nga pagtuo diha kang Kristo. Ang pagdawat sa pulong ni Kristo makapamugna og hugot nga pagtuo nga kinahanglanon sa paghinulsol, ug ang paghinulsol makatabang usab sa pagpalambo sa pagtuo. Si Mormon mideklarar, “Ug [si Kristo] miingon: Paghinulsol kamong tanan nga mga lumulupyo sa yuta, ug duol ngari kanako, ug pagpabunyag diha sa akong ngalan, ug pagbaton sa hugot nga pagtuo kanako, nga kamo maluwas” (Moroni 7:34).
Sama pananglit, ang maalamong misyonaryo makigtambag ug mag-ampo uban sa iyang kompanyon, magtinguha og inspirasyon kon sa unsang paagi maghinulsol ang kada investigator. Ang mga misyonaryo moplano sa ilang pagtudlo sumala sa inspirasyon. Sila mainampuong motino unsa nga pagdapit o mga pagdapit ang ilang buhaton sa matag leksyon ngadto sa investigator. Ilang himoon ang ilang leksyon sumala sa pagdapit, ilhon ang mga doktrina nga kinahanglang masabtan sa mga investigator aron dawaton ang pagdapit.
Ang mga misyonaryo modeterminar unsaon sa pagtudlo niadtong mga doktrina aron maklaro og maayo ug makamugna og kombiksyon alang nianang partikular nga indibidwal. Sila moplano og mga pamaagi sa paggamit sa tanang anaa nga mga kapanguhaan, lakip ang tabang sa mga miyembro, sa pagtabang sa investigator nga motuman sa ilang pasalig sa pagbuhat nga mahiuyon nianang piho nga baruganan o sugo. Kini nga matang sa pagtudlo ug pagpamatuod sa misyonaryo mao ang paagi nga atong maatiman ang investigator subay sa proseso sa paghinulsol.
Ang Hugot nga Pagtuo Mabatunan pinaagi sa mga Pakigsaad
Laing mahinungdanon nga elemento sa paghinulsol mao ang bunyag pinaagi sa pagpaunlod, diin kita makasugod sa pagdala sa ngalan ni Kristo. Daghang mga bersikulo sa kasulatan ang nagpasabut sa “pagpabunyag ngadto sa paghinulsol” o “bunyag sa paghinulsol” (tan-awa sa Mga Buhat 19:4; Alma 5:62; 7:14; Moroni 8:11; D&P 35:5–6). Kini nga hugpong sa mga pulong miila sa doktrina nga ang pagpabunyag diha sa tubig mao ang katapusan o labing mahinungdanon nga lakang sa paghinulsol. Ang pagsalikway sa sala, inubanan sa atong pakigsaad sa pagkamasulundon, mokompleto sa atong paghinulsol; sa tinuoray, ang paghinulsol dili mahuman kon wala kana nga pakigsaad. Tungod niini kita makasarang sa katubsanan sa mga sala pinaagi sa grasya ni Jesukristo pinaagi sa bunyag sa Espiritu (tan-awa sa 2 Nephi 31:17). Dugang pa, ang pakigsaad sa bunyag magamit sa umaabot ingon man sa nangagi: matag higayon nga kita tinuoray nga naghinulsol, ang pakigsaad mabag-o ug kita mapasarang pag-usab alang sa pagtubos sa mga sala.
Unsa may kalabutan niining mga ordinansa ug sa kaubang mga pakigsaad ngadto sa pagpalambo sa pagtuo? Ang hugot nga pagtuo diha kang Kristo usa ka mahinungdanon nga panginahanglan sa paghimo og balaanong mga pakigsaad, apan ang pakigsaad makapalambo usab sa pagtuo sa tawo nga dili mahimo sa laing paagi. Pinaagi sa pakigsaad, ang gamhanang Dios sa kalangitan mitugot sa Iyang Kaugalingon nga ma-obligar sa tagsa-tagsa kanato (tan-awa sa D&P 82:10). Hangtud nga atong gituman ang pakigsaad ngadto Kaniya, Siya obligado sa paghatag kanato og luna sa Iyang gingharian ug, uban sa mas sagrado nga mga pakigsaad, kahimayaan niana nga gingharian. Siya ang Dios nga anaa sa tanang gahum ug dili mamakak. Busa, kita makaangkon og siguradong pagtuo nga Siya motuman sa Iyang mga saad ngari kanato. Pinaagi sa atong mga pakigsaad ngadto sa Dios, kita makatagamtam og hugot nga pagtuod diha kang Kristo nga may igong kalig-on nga makasuporta kanato sa bisan unsang hagit o pagsulay, nasayud nga sa katapusan sigurado ang atong kaluwasan.
Ang Hugot nga Pagtuo Molambo
Ang akong gisulti kabahin sa pagpalambo sa hugot nga pagtuo diha kang Kristo nga gitudlo sa mga misyonaryo magamit kanatong tanan. Ang atong hugot nga pagtuo diha kang Kristo nabatunan pinaagi sa Espiritu samtang kita naminaw sa pulong sa Dios nga gitudlo niadtong Iyang gisangunan nga mga sulugoon, patay ug buhi. Samtang nagtukod kita ibabaw niana nga pundasyon, ang atong hugot nga pagtuo nalig-on pinaagi sa mga pag-ampo sa hugot nga pagtuo nga nahimong kabahin sa atong matag adlaw nga kinabuhi—ug usahay kabahin sa atong kinabuhi matag oras.
Ang pagpadayon nga mabusog sa mga pulong ni Kristo diha sa Basahon ni Mormon ug sa uban pang mga kasulatan nakadugang ug nagpalalum sa hugot nga pagtuo nga naggikan sa pulong. Ang paghinulsol nga nakagamot sa hugot nga pagtuo makapalambo sa atong pagtuo samtang nagkahingpit sa pagkamasulundon. Ang paghinulsol makapabag-o sa atong bunyag sa tubig ug sa Espiritu aron matubos ang mga sala nga atong nahimo dili lang sa wala pa ang bunyag, lakip usab ang human sa bunyag. Ang Kristohanong pagserbisyo ngadto sa atong silingan usa ka mahinungdanong bahin sa pagtuman sa pakigsaad nga makapalambo og hugot nga pagtuo diha kang Kristo. Sa dili madugay atong makaplagan nga ang mga panalangin nga gisaad sa pagkamasalundon sa Dios sa tinuoray anaa na sa atong kinabuhi ug ang atong hugot nga pagtuo nasiguro ug nalig-on.
Ang Hugot nga Pagtuo usa Usab ka Baruganan sa Gahum
Ang akong gihulagway kutob niini nga punto mao ang kalidad sa hugot nga pagtuo nga naglangkob sa espirituhanong kasiguradoan ug namunga og maayong mga buhat, ilabi na sa pagkamasulundon sa mga baruganan ug sugo sa ebanghelyo. Kini mao ang tinuod nga hugot nga pagtuo diha kang Kristo ug mao ang lebel nga kinahanglang tutukan sa atong pagtudlo sa atong mga investigator.
Hinoon, adunay kalidad sa hugot nga pagtuo nga dili lang modumala sa atong batasan apan mohatag kanato og gahum [empowers] nga mousab sa unsa ang anaa ug mopahinabo sa mga butang nga dili unta mahitabo. Namulong ako kabahin sa hugot nga pagtuo nga dili lang usa ka baruganan sa lihok apan usa usab ka baruganan sa gahum. Si Pablo miingon nga kini mao ang hugot nga pagtuo diin ang mga propeta “gipangdaug nila ang mga gingharian, gipatuman nila ang pagkamatarung, gipanagdawat nila ang mga saad, gipanagtak-om nila ang mga baba sa mga leon, gipalong nila ang mabangis nga kalayo, nakaikyas sila sa sulab sa espada, gikan sa kahuyang nakab-ut nila ang kalig-on, nangahimo sila nga makagagahum sa panggubatan, ilang gipatibulaag ang mga kasundaluhang langyaw, [ug] ang nangamatay nga mga anak gipabalik ngadto sa ilang mga inahan pinaagi sa pagkabanhaw” (Mga Hebreohanon 11:33–35). Kini talagsaon nga mga butang—apan dili labaw kay sa pagbuntog sa grabeng pagkaadik o ubang susama nga mga babag sa pagkakabig ug pagbunyag.
Ang yawe sa atong pag-angkon sa gahum pinaagi sa hugot nga pagtuo mao ang pagkat-on, pagpangutana, ug pagbuhat sumala sa kabubut-on sa Dios. “Si Kristo miingon: Kon kamo adunay hugot nga pagtuo kanako kamo makabaton sa gahum sa pagbuhat sa bisan unsa nga butang nga maayo ngari kanako” (Moroni 7:33).
Hinoon, Siya mipasidaan, “Kon kamo mangayo sa bisan unsa nga dili angay alang kaninyo, kini mosumbalik ngadto sa inyong paghukom” (D&P 88:65).
Ang inyong hugot nga pagtuo diha kang Kristo molambo pag-ayo samtang kamo nagtinguha matag adlaw aron masayud ug mobuhat sa kabubut-on sa Dios. Ang hugot nga pagtuo, usa na ka baruganan sa lihok diha kaninyo, mamahimo dayon nga usa usab ka baruganan sa gahum.
Paghulagway pinaagi ni Cary Henrie