Pangutan-a ang Mormon
Kari Koponen, Uusimaa, Finland
Tanang mga batan-ong lalaki nga nag-edad og sobra sa 18 anyos sa Finland gikinahanglan nga moserbisyo sa military sulod sa 6 hangtud 12 ka bulan. Sa dihang akong gisugdan ang gikinahanglang pagserbisyo, akong nakita nga ang mga opinyon ug kinaiya sa daghang kauban nakong mga army nasumpaki sa akong mga baruganan. Isip resulta, nagbuhat ko og mga lakang nga magpabiling maduol sa Espiritu, nag-ampo dili moubos og kaduha sa usa ka adlaw ug nagbasa sa mga kasulatan.
Sa sinugdanan gikulbaan ko kay wala masayud unsay reaksyon sa akong mga kauban, apan ingon og wala ra sila manginlabut, busa relaks lang ko. Pagkataud-taud ang akong mga bunk mates nangutana unsa ang akong gibasa. “Ang Basahon ni Mormon,” direktang giingnan ko sila. Ang sunod nilang pangutana, siyempre, kon ako ba usa ka Santos sa Ulahing mga Adlaw. Giingnan ko sila nga oo, ug pagkataud-taud, wala na sila maghisgut niini.
Miabut ang panahon nga pipila sa akong mga kauban sa army nangutana kabahin sa Basahon ni Mormon—asa kini gikan, ang sulod, ug daghan pa. Sa wala madugay ang ilang pangutana kabahin na sa katuyoan sa kinabuhi ngadto sa mga baruganan sa Simbahan. Ang akong tinuohan natural na nga kabahin sa among panaghisgutan, ug kini mahisgutan hapit sa bisan unsang sitwasyon.
Usa ka kauban sa duol nga bunk mihangyo kon makabasa ba siya sa akong Basahon ni Mormon. Siyempre miingon ko og oo. Sa laing higayon, human ang usa ka kauban sa kwarto miuli gikan sa pagtambong og haya sa usa ka higala, siya miingon kanako nga sa haya siya daghan og mga pangutana kabahin sa kinabuhi ug sa mga katuyoan niini. Nangutana siya nako kon unsa ang gituohan sa Simbahan kabahin niadtong mga butanga. Taas ang among panaghisgut kabahin sa katuyoan sa kinabuhi, Pag-ula, Paglalang, ug uban pang hilisgutan sa ebanghelyo. Pagkahuman, laing mga kauban sa kwarto nainteresado sa mga pagtulun-an ug mga sumbanan sa Simbahan.
Atol sa nahabiling panahon sa among panag-uban, daghan kami og mga panaghisgut nga ingon og kanunay nga mosangput ngadto sa mga pagtulun-an sa Simbahan. Ang akong mga kauban sa kwarto mitawag niining mga panaghisgut nga “Pangutan-a ang Mormon” nga mga sesyon. Sa wala madugay, sa dihang migradwar na kami sa among pagbansay, usa ka kauban sa kwarto miingon kanako nga mohunong na siya sa pagpamalikas.
Sa akong tibuok panahon sa militar, nakamatikod ko nga kon mas mosulti ko sa akong pagkamiyembro sa Simbahan ug kon mas matinud-anon kong mosunod sa mga pagtulun-an sa ebanghelyo, ang uban mas mosulti ngari kanako ug mas daghan ako og oportunidad sa pagpakigbahin sa ebanghelyo.
Mapasalamaton ko sa mga panalangin ug mga oportunidad nga nakahisgut ko kabahin sa ebanghelyo atol sa akong pagserbisyo sa army. Mopamatuod ko nga kon kita isug sa pagbarug sa atong mga mithi, kita mapanalanginan og mga oportunidad sa paghimo sa misyonaryo nga buhat. Ug kon atong tugutan ang kahayag sa ebanghelyo nga mosanag sa atong kinabuhi, atong maproteksyonan ang atong kaugalingon gikan sa kangitngit ug makaangkon og positibong impluwensya sa atong palibut.