Pagkat-on sa Pagbasa
“Natawo sa mga matarung nga ginikanan, busa ako gitudloan sa tanan nga nakat-unan sa akong amahan” (1 Nephi 1:1).
Sa nag-sayis anyos ko, naglisud ko sa pagkat-on unsaon sa pagbasa. Giingnan ko sa akong magtutudlo nga kinahanglan kong mobalik sa grade 1. Nabalaka ang akong papa sa pagkadungog niya niini. Mao nga sa matag gabii human sa panihapon, iya kong praktison sa pagbasa. Naghimo si Papa og dula gikan niini aron maganahan ko. Wala madugay makaila na ko sa mga pulong kon makita ko kini, ug giregaluhan ko ni papa og pagdayeg ug pagdasig. Migahin kami og mga oras sa pagbasa, ug milambo ako.
Mihukom ang akong magtutudlo nga ibalhin na ko sa pagka-grade 2. Mapasigarbuhon si papa kanako. Interesado gayud siya sa akong kalamboan sa eskwelahan. Sa Pasko gipalitan ko niya og libro nga makalingaw kanako.
Pipila ka bulan pagkahuman sa akong high school, namatay sa kanser ang akong papa. Wala na siya kakita nakong migradwar sa kolehiyo o sa pagkadoktor, apan nabuhi pa siya sa igo nga panahon aron mahibalo nga akong nakat-unan ang kadasig sa pagbasa. Naghatag kadto kaniya og dakong katagbawan.
Dili mga miyembro sa Simbahan ang akong pamilya. Usa ka adlaw samtang nag-eskwela ko sa pagkadoktor, mihulam ko og libro gikan sa library nga ginganlan og A Marvelous Work and a Wonder. Sinulat kini sa usa ka Apostol nga ginganlan og Elder LeGrand Richards. Ang libro mahitungod tanan sa Ang Simbahan ni Jesukristo sa mga Santos sa Ulahing mga Adlaw. Gibalik-balik ko kini sa pagbasa. Gitun-an ug giampo ko kini. Ang libro nag-andam kanako nga magpasakop sa Simbahan pipila ka bulan human niadto.
Human sa akong bunyag, akong nakat-unan nga makaadto diay ko sa templo ug mabunyagan alang sa akong papa. Dako siya og gihimong kausaban sa akong kinabuhi. Sa katapusan makahimo ko og butang nga espesyal aron makapasalamat kaniya sa tanan niyang gihimo kanako.
Ganahan gihapon kong mobasa. Ang gasa nga gihatag sa akong papa mipanalangin sa akong kinabuhi sa matag adlaw samtang magbasa ko sa kasulatan ug sa pulong sa mga propeta.
Paghulagway pinaagi ni Jared Beckstrand