Hangtud Kita Magkita Pag-usab
Unsa ang Akong Bili?
Mohukom ang tigpalit kon ang butang angay ba sa kantidad.
Human sa upat ka tuig nga walay TV ug unom pa ka tuig gamit ang second hand nga mga TV, ako ug ang akong asawa nakahukom nga mopalit og bag-ong TV. Tungod sa kantidad, gikumpara namo ang mga modelo, brand, features, ug mga presyo sa wala pa mopalit. Makalingaw, kay nakadala ko og dili lamang usa ka TV apan usa ka importanting panan-awon sa pagdeterminar sa kaugalingong bili.
Ang among kasinatian nagtudlo kanamo nga ang among bili gisukod pinaagi sa pagkumpara—ngadto sa among mga igsoon, mga klasmeyt, kaedad, ug kaubanan sa trabaho. Hinoon, kon determinahon ang bili pinaagi sa pagkumpara adunay kahulugan kon magpalit og TV, sa kinabuhi kita ang mga TV.
Ang pagkumpara sa atong kaugalingon ngadto sa uban aron madeterminar ang atong bili sama ra usab sa usa ka TV diha sa tindahan nga nagtan-aw sa ubang TV ug nanghinaut nga unta 40 ka pulgada siya (102 cm) kay sa 27 (69 cm). Wala kini hinungdan, kay kinsa man kaninyoy makadugang ug usa ka takna sa gitas-on sa iyang kinabuhi” (Mateo 6:27) o usa ka pulgada sa gidak-on sa inyong screen? Mipasidaan si Apostol Pablo nga ang mga tawo nga “nagapakigsukdanay sa ilang masigkaugalingon, ug nagatandiay sa ilang masigkaugalingon, sila walay kabuot” (2 Mga Taga-Corinto 10:12).
Kinahanglan usab nga dili kaayo nato tagdon kadtong nanagkumpara alang kanato ug nagsulti kanato kon unsa sa ilang pagtuo ang atong bili. Bisan og ang tigbaligya dunay kontrol sa presyo sa TV, dili siya ang nagdeterminar sa bili niini.
Kini ang importante: ang kustomer maoy motan-aw sa presyo, motimbang-timbang sa produkto, ug mohukom kon angay ba ang kantidad. Ug niini nga kinabuhi dunay usa lamang ka Pumapalit nga importante.
Ang atong Manluluwas, si Jesukristo, mitimbang-timbang sa produkto”—kita, sa tiningob ug sa tinagsa. Nahibalo siya sa kalawom sa kadautan nga may kalabutan sa tawhanong pamilya.1 Nakasabut Siya sa makahahadlok, dili masukod nga kantidad nga gikinahanglan niyang ibayad, “kansang pag-antus nakapahimo [Kaniya], gani ang Dios, ang labing halangdon sa tanan, sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antus sa lawas ug sa espiritu” (D&P 19:18).
Ug nakahibalo sa tanan, mihukom gihapon Siya nga angay ang akong bili niini.
Bisan unsa ko kalayo sa akong hunahuna kon ikumpara sa uban, bisan unsa ka gamay sa akong bili diha sa panan-aw sa uban, mibati si Jesus nga angay ang bili sa kantidad nga iyang bayaran.
Ang pag-atake ni Satanas sa atong kaugalingong bili maoy usa sa pinakamalinglahon gani mahulgaon nga mga taktika. Mahinungdanon alang kanako ang pagtuo nga ang Anak sa Dios namatay dili lamang alang sa mga sala sa kalibutan apan Siya namatay alang sa akong mga sala. Kon ang kaaway makapatuo kanato nga sukwahi niini, ang akong pagduha-duha makapugong sa akong pagtinguha sa maulaon nga grasya sa Manluluwas ug pagbalik ngadto sa Iyang presensya.
Kon nagduha-duha ka man sa imong bili, adtoa ang Pumapalit aron makuha ang bugtong nga pagribyu sa produkto nga mao lamang ang mahinungdanon. “Makaampo kita uban sa kamasaligon nga atong mabati ang gugma sa Manluluwas alang kanato,” miingon si Presidente Henry B. Eyring, Unang Magtatambag sa Unang Kapangulohan. “… Nahigugma siya kanato… igo sa pagbayad sa tanan natong mga sala.”2
Ang pagbaton og hugot nga pagtuo niana nga gugma magtugot sa Manunubos nga mousab sa atong kinabuhi ug modala sa Iyang pinalit pauli.
Imahe ni Kristo, ni Heinrich Hofmann, sa maayong kabubut-on sa C. Harrison Conroy Co.