Maalamong Paggamit sa Kabubut-on

Usa sa labing importante nga kamatuoran nga atong makat-unan sa atong pagkabatan-on mao nga ang tinuod nga kagawasan ug mahangturong kalipay nagagikan sa paggamit sa atong kabubut-on sa pagsunod sa mga sugo sa Dios.¹ Sa mga pahina 52–53 niini nga isyu, si Elder Shayne M. Bowen sa Seventy mihatag og gibug-aton niini nga baruganan.

“Kamo adunay potensyal nga madawat ang tanan nga anaa ang Amahan. Kamo ang magpili,” miingon siya sa mga batan-on.

Sa kalibutan nga puno sa kadautan ug kakuyaw, ang mga ginikanan adunay mahinungdanong bahin sa pag-andam sa ilang mga anak aron sa paghimo og eksaktong mga pagpili ug pagbuntog sa tintasyon. Sa pagkatinuod, ang Ginoo misugo sa mga ginikanan “sa pag-amuma sa [ilang] mga anak diha sa kahayag ug kamatuoran” (D&P 93:40).

Ang Simbahan nag-andam og mga kapanguhaan para sa mga ginikanan aron tabangan ang ilang mga anak nga makat-un ug mosunod niini nga sumbanan. Ang mga mosunod nga mga sugyot napamatud-an nga makatabang.

Mga Sugyot sa Pagtudlo sa mga Batan-on

Basaha uban sa inyong batan-on ang seksyon sa kabubut-on ug pagkamay-tulubagon sa Alang sa Kalig-on sa mga Kabatan-onan. Ang pagbuhat niini makahatag og oportunidad sa paghisgut sa mga sumbanan ug sa pagtubag sa bisan unsang mga pangutana sa inyong anak.
Basaha ang artikulo ni Elder Bowen sa mga pahina 52–53 niini nga isyu. Ikonsiderar ang paggamit sa istorya sa pagpakaon sa saktong lobo aron sa pagtabang sa inyong batan-on nga makasabut sa kaimportante sa paghimo og maayong mga desisyon.
Bisitaha ang youth.lds.org, i-klik ang “For the Strength of Youth” ubos sa “Youth Menu,” ug dayon i-klik ang “Agency and Accountability.” Didto makakita kamo og mga pakisayran sa kasulatan, mga video, mga pangutana ug tubag, ug mga artikulo.
Konsideraha nga mag-family home evening o mag-family devotional sa kaimportante nga magmaisugon ug mobarug sa unsay atong gituohan.²

Mga Sugyot alang sa Pagtudlo sa mga Bata

Ang Pagdala sa Primary ngadto sa Panimalay karong bulana kabahin sa pagpili sa pagsunod sa mga sugo (tan-awa sa mga pahina 64–65 niini nga isyu). Basaha ang istorya isip pamilya ug hangyoa ang inyong anak sa pag-ihap sa mga desisyon nga gihimo diha sa istorya. Ipasabut nga ang Langitnong Amahan nagtugot kanato sa paghimo og mga desisyon aron kita makat-on ug molambo. Ipakigbahin ang pipila sa mga butang nga inyong nakat-unan gikan sa paghimo og mga desisyon.
Ang Kalihokan sa CTR sa Pagdala sa Primary ngadto sa Panimalay kompletoha. Dayon hisguti ang mga sangputanan sa paghimo og maayong mga desisyon. Pagpamatuod sa mga panalangin nga inyong nadawat sa paghimo og matarung nga mga desisyon.
Alang sa dugang nga mga ideya sa pagtudlo sa kabubut-on ug pagkamay-tulubagon, tan-awa ang Enero nga seksyon sa 2012 Outline for Sharing Time (online sa lds.org/callings/primary/sharing-time-2012).

PAGHULAGWAY PINAAGI NI Scott Greer