Namulong Sila Kanato
Kamo Mao ang Kahayag alang sa Kalibutan
Samtang kita nagbuhat sa misyonaryo nga buhat, kita makakuha og inspirasyon gikan sa mga ehemplo sa Manluluwas, ni Alma, ug ni Joseph Smith.
Kanunay ang mga returned missionary mosulti nga ang ilang pagserbisyo sa misyon mao ang pinakanindot nga mga tuig sa ilang kinabuhi. Nganong ingon niini man?
Tingali sa kalipay nga makita nga may laing kalag nga miduol sa Manluluwas (tan-awa sa D&P 18:15). Tingali tungod sa kasuod nga ilang mabati uban sa mga investigator, kinabig, miyembro, kompanyon, ug presidente sa misyon. Sa akong hunahuna kining mga butanga kabahin niini, apan sa akong hunahuna kini may kalabutan usab sa kahayag sa Manluluwas nga ilang gibati—ug sa kahayag nga ilang gipakigbahin pinaagi sa pagserbisyo ug pagpamatuod.
Kita nasayud nga ang Manluluwas mipaila sa Iyang Kaugalingon isip Kahayag sa Kalibutan (tan-awa sa Juan 9:5; 12:46). Apan sa Wali sa Bukid, Siya mipahayag sa samang butang kabahin sa Iyang mga sumusunod:
“Kamo mao ang kahayag alang sa kalibutan. Ang siyudad nga mahimutang sa ibabaw sa bungtod dili gayud mahisalipdan.
“Ang mga tawo dili usab magdagkot og suga aron ibutang kini sa ilalum sa gantangan, kondili sa ibabaw sa tongtonganan; ug kini magaiwag kanilang tanan nga anaa sa sulod sa balay.
“Pasigaa ninyo ang inyong kahayag sa atubangan sa mga tawo, aron makita nila ang inyong mga maayong buhat, ug dayegon nila ang inyong Amahan nga anaa sa langit.” (Mateo 5:14–16).
Ang pagpakigbahin sa atong kahayag—kana, pagpakita sa kahayag sa Manluluwas (tan-awa sa 3 Nephi 18:24)—usa ka butang nga mahimo nato sa atong tibuok kinabuhi, ug kini usa ka butang nga atong kinahanglang sugdan samtang kita bata pa. Samtang nagbuhat kita sa pormal nga buluhaton sa misyonaryo ug sa tibuok kinabuhi nga buhat sa misyonaryo, kita makalantaw sa tulo ka tawo, nga sa akong opinyon, labing maayong ehemplo niining buhat: Si Alma, si Propeta Joseph Smith, ug ang Manluluwas. Silang tulo nakaimpluwensya pag-ayo sa akong pagsabut sa importansya sa misyonaryo nga buhat—pagpakita sa kahayag sa Manluluwas ngadto sa kalibutan.
Alma: Pagmapainubsanon
Ang mga pagtulun-an ni Alma mahinungdanon kaayo sa akong tinguha sa pagserbisyo og misyon. Bisan tuod ang akong apohang babaye misiguro nga nabunyagan ko sa dihang otso anyos ko, panagsa ra ko nga mosimba sa dihang batan-on pa ko. Sa dihang ang mga misyonaryo miabut sa akong kinabuhi sa dihang young adult nako ug misugod sa paghunahuna kabahin sa Simbahan, misugod ko sa pagtuon sa kasulatan. Ang diskusyon ni Alma kabahin sa napugos sa pagpaubos itandi sa nagpili nga magmapainubsanon nakapainteres kanako (tan-awa sa Alma 32:13–15). Mibati ko nga dili angay tungod sa akong mga kahuyang, apan gihunahuna ko kini pag-ayo—ang paghukom nga mag-misyon nanginahanglan og dakong kausaban. Ako aduna nay maayong panginabuhian ug kaugalingong negosyo, ug gusto na nakong minyoan ang akong hinigugma (nga akong asawa karon). Ako ba ning masakripisyo tanan alang sa pagserbisyo sa Ginoo?
Miadto ko sa usa ka pribadong lugar ug migahin og panahon—tinuod nga panahon—sa pag-ampo ug pagpangamuyo sa akong Langitnong Amahan. Sa pagpaubos sa akong kaugalingon, akong nahibaloan nga gusto sa Langitnong Amahan nga moserbisyo ko. Mihukom ko nga sundon ang Iyang pulong, ug sa pagbuhat niini, akong nakaplagan ang kamatuoran sa saad ni Alma: “Siya nga tinuod nga nagpaubos sa iyang kaugalingon, ug naghinulsol sa iyang mga sala, ug molahutay hangtud sa katapusan, ang mao pagapanalanginan—oo, labaw nga mapanalanginan kay kanila kinsa napugos sa pagpaubos” (Alma 32:15).
Bisan tuod sobra nako og 26 anyos, miadto ko sa akong bishop, kinsa mitabang kanako sa pagpangandam. Misumiter ko sa akong papeles sa misyon ug nagpaabut og pipila ka bulan. Sa katapusan, nakadawat ko og usa ka tawag nga nagsulti nga dili ko mahimong moserbisyo og full-time misyon apan makaserbisyo ko sa public communication, nga mao ang natad sa akong trabaho. Makapakulbahinam kadto nga panahon. Gibansay ko ug sa wala madugay miapil sa mga media discussions pagkahuman nga ang Simbahan didto sa Mexico opisyal nga giila sa gobyerno sa Mexico. Gitabangan nako ang mga stake sa pagbansay sa ilang mga public affairs specialist ug nakaestablisar og relasyon sa mga opisyales sa gobyerno. Kini nga oportunidad sa pagserbisyo nakapanalangin nako sa daghang mga paagi kaysa akong mahulagway ug sa mga paagi nga wala nako damha. Kini nakaapekto sa daghang mga aspeto sa akong kinabuhi sa hangtud.
Ang inyong pag-misyon mao ang bugtong pinakaimportante nga butang sa pag-andam kaninyo alang sa inyong tibuok kinabuhi. Si Presidente Gordon B. Hinckley (1910–2008) misaad sa mga umaabot nga mga misyonaryo: “Ang panahon nga inyong gigahin sa natad sa misyon, kon kadtong mga katuigan gigahin sa mapahinungurong pagserbisyo, mas mabungahon kaysa bisan unsang duha ka tuig sa inyong kinabuhi. … Kon magmisyon mo sa matinud-anong paagi ug maayo, kamo mahimong mas maayo nga bana, mas maayo nga amahan, mas maayo nga estudyante, mas maayo nga trabahante.”1 Kon kamo anaa pa sa edad nga mahimong mag-misyon, pangandam na sa pagserbisyo karon. Ang mga panalangin nga inyong madawat mas mosubra pa kaysa bisan unsa pang sakripisyo nga inyong gihimo.
Nasayud ko nga adunay mga hagit samtang kamo mamalandong sa pagserbisyo og misyon. Buhaton kutob sa mahimo sa kaaway aron mapugngan ang paglambo sa buhat sa Ginoo. Kon kamo nagduhaduha sa pagserbisyo og misyon, dapiton ko kamo sa pagmapainubsanon ug dayon moluhod ug mangamuyo sa Langitnong Amahan. Iyang gipadayag ang Iyang kabubut-on ngari kanako, ug nasayud ko nga Iyang buhaton usab alang kaninyo.
Joseph Smith: Pag-angkon og Mahangturong Panglantaw
Gikan ni Joseph Smith nakakat-on ko nga ang pag-focus sa mahangturong panglantaw makapalambo sa inyong abilidad isip sulugoon sa Ginoo. Sa una, naghunahuna ko kon giunsa niya paglahutay sa tanan niyang naagian—ilabi na sa mga pagsulay ug pagpanggukod. Apan akong nasabtan nga tungod kay nakakita si Joseph lapas pa sa tabil, siya nasayud nga kining mortal nga kinabuhi tipik lang sa atong mahangturong panaw. Naghunahuna ko kon unsa ang mahitabo kanako kon nakasabut ko sa unsay iyang nasabtan, ug sa pagpamalandong niini, akong nahibaloan nga kon kita mag-focus sa pagkakaron, ang atong panglantaw limitado. Kon kita adunay mahangturong panglantaw, atong masabtan kon unsa ka importante nga kita mapasaligon nga motabang sa uban, pagtabang sa uban, ug sa pagpamatuod sa mga kamatuoran nga atong nasayran.
Kon kita mag-focus, sama ni Joseph, sa mga butang diha sa mahangturong panglantaw, unsa kaha kita kaandam ug kahinam sa pagpakigbahin sa ebanghelyo matag adlaw sa atong kinabuhi? Ang pagpakigbahin sa atong kahayag—pagpakita sa kahayag sa Manluluwas—dili kinahanglang limitado sa pormal nga mga buluhaton sa misyonaryo. Kon kamo bukas ug matuohan, kamo makapakigbahin sa Kahayag ni Kristo niadtong nagpalibut kaninyo, nagpakigbahin kon si kinsa kamo isip miyembro sa Simbahan ug unsa ang inyong gituohan. Samtang kamo magbalhin-balhin og kapuy-an sa tibuok ninyong kinabuhi ug makig-uban sa laing-laing mga tawo, moawhag ko kaninyo nga ila-ilahon ninyo ang inyong mga silingan, mga kaklase, ug katrabaho sa ubang mga tinuohan. Sunda ang instruksyon ni Elder M. Russell Ballard sa pagpakigbahin sa ebanghelyo sa internet, pinaagi sa mga website sa social media, blogs, ug video-sharing nga mga site.2
Samtang kita makatudlo sa uban kabahin sa ebanghelyo pinaagi sa pormal nga diskusyon, usahay ang gikinahanglan lang sa usa ka tawo aron mohangup sa ebanghelyo mao ang matarung nga ehemplo ug kaandam sa pagpakigbahin sa inyong pagpamatuod pinaagi sa inyong paagi sa pagpakabuhi. Kon kamo nagpakabuhi nga takus sa Espiritu ug ipakita ang inyong kahayag, dayon ang mga tawo “makakita sa inyong maayong mga buhat, ug dayegon nila ang inyong Amahan nga anaa sa langit” (Mateo 5:16).
Manluluwas: Paghunahuna og Maayo sa Uban
Ug sa katapusan, ang Manluluwas, kinsa atong ehemplo sa tanang mga butang, nagtudlo kanako nga dili kaayo mabalaka sa akong kaugalingon apan sa paghunahuna og maayo sa kaluwasan sa uban. Ang iyang tibuok kinabuhi kabahin sa uban. Usahay sa pagkonsiderar sa pagpakigbahin sa ebanghelyo ngadto sa uban nga lahi og mga tinuohan, kita mahadlok kon unsa ang ilang gihunahuna kanato o unsaon nila pagtubag. Sa paghunahuna sa pagserbisyo og full-time misyon, kita kanunay nabalaka kaayo sa sweldo o pag-eskwela o sa mga relasyon—kini maayo ug importanting mga butang apan kining mga butanga makapaabut. Ang Manluluwas Mismo “walay dapit nga kapahulayan sa iyang ulo” (Mateo 8:20). Iyang gitudlo ngadto sa Iyang mga sumusunod nga “unahon pagpangita … ang gingharian gikan sa Dios,” ug “kining tanang mga butanga” idugang ra kanila (Mateo 6:33).
Mao usab kini alang kanato. Samtang kita magtinguha sa pagsunod ug sa pagpakita sa Kahayag sa Kalibutan, ang mga panalangin moabut sa kalibutan ug sa katapusan ngari kanato isip mga indibidwal. Unta dili nato taguan ang kahayag apan sa pagpadan-ag niini sa atong tibuok kinabuhi.
Paghulagway sa litrato pinaagi ni Matthew Reier; Si Kristo ug ang Babayeng Samarianhon, ni Carl Heinrich Bloch, gigamit nga may pagtugot sa National Historic Museum sa Frederiksborg sa Hillerød, Denmark, dili mahimong pakopyahan; Si Alma nga Batan-on Nagtambag sa Iyang Anak nga Lalaki, ni Darrell Thomas © IRI; Si Joseph Smith sa Bilanggoan sa Liberty, ni Greg K. Olsen, dili mahimong pakopyahan
Sa wala: mga paghulagway sa litrato pinaagi ni Christina Smith ug Matthew Reier © IRI; sa tuo: mga paghulagway sa litrato pinaagi ni Chris Wills © IRI; litrato ni Presidente Monson pinaagi ni Craig Dimond © IRI