Pagbalanse sa Inyong Kinabuhi
Gikan sa Abril 1987 nga pakigpulong sa kinatibuk-ang komperensya.
Kining walo ka mga sugyot makatabang sa inyong pag-atubang sa mga hagit sa kinabuhi aron dili mabug-atan.
Ang pagsagubang sa lisud ug lain-laing mga hagit sa inadlawng pagpakabuhi, nga dili sayon nga tahas, makawagtang sa balanse ug panag-uyon nga atong gipangita. Daghang matarung nga mga tawo ang naningkamot gayud nga mamentinar ang pagkabalanse, apan usahay bation sila og kabug-at ug malupig.
Duna koy pipila ka sugyot nga gilauman nakong makatabang ninyong mga hingtungdan kabahin sa pagbalanse sa panginahanglan sa kinabuhi. Kini nga mga sugyot mahinungdanon kaayo; ang mga konsepto niini dali rang mataligam-an kon dili kamo magmatngon. Magkinahanglan kamo og lig-ong pasalig ug personal nga disiplina aron mahilakip kini sa inyong kinabuhi.
1. Pag-establisar og mga Prayoridad
Hunahunaa ang inyong kinabuhi ug han-aya ang inyong mga prayoridad. Pangita og hilom nga panahon kanunay sa paghunahuna og maayo kon asa kamo padulong ug unsay angay ninyong buhaton aron molampus. Si Jesus, atong ehemplo, kasagaran “mipahilit ngadto sa mga awaaw ug nag-ampo” (Lucas 5:16). Usahay atong gikinahanglan ang paghimo sa samang butang aron malagsik kita sa espirituhanon sama sa gibuhat sa Manluluwas.
Isulat ang mga buluhaton nga gusto ninyong matuman sa matag adlaw. Unaha sa inyong paghunahuna ang gihimo ninyong sagradong mga pakigsaad uban sa Ginoo samtang magsulat kamo sa inadlaw ninyong mga iskedyul.
2. Paghimo og Makab-ot ra nga mga Tumong
Paghimo og mubo og tagal nga mga tumong nga mahimo ninyong kab-uton. Paghimo og mga tumong nga maayo ang pagkabalanse—dili manubra ang kadaghan o diyutay ra kaayo ug dili kaayo taas o mubo. Isulat ang makab-ot ra ninyo nga mga tumong ug lihoka sigon sa importansya niini. Pag-ampo alang sa balaang giya sa inyong paghan-ay og tumong.
3. Pag-badyet nga Maalamon
Ang tanan nag-atubang og mga hagit sa pinansyal. Pinaagi sa maalamon nga pag-badyet, kontrolaha ang tinuod ninyong panginahanglan ug sukda kini sa mainampingong paagi batok sa daghan ninyong gusto sa kinabuhi. Si propeta Jacob miingon sa iyang katawhan: “Busa, ayaw paggasto og salapi alang niana nga walay bili, ni ang inyong kahago niana nga dili makatagbaw” (2 Nephi 9:51).
Hinumdumi ang kanunayng pagbayad sa hingpit nga ikapulo.
4. Pagtukod og Maayong mga Relasyon
Pakigsuod sa inyong mga ginikanan, kaparyentihan, ug kahigalaan. Motabang sila nga mabalanse kanunay ang inyong kinabuhi. Pagtukod og maayong relasyon sa inyong pamilya ug higala pinaagi sa dayag ug matinuoron nga komunikasyon.
Ang maayong relasyon sa pamilya mapadayon pinaagi sa malumo, mapinanggaon, mahunahunaon nga komunikasyon. Hinumdumi nga kasagaran ang daklit nga pagpasiplat, pagkidhat, pagyango, o paghapuhap mas maayo pa kay sa pulong. Ang pagpakatawa ug maayo nga pagpaminaw mahinungdanon usab nga bahin sa maayong komunikasyon.
5. Pagtuon sa mga Kasulatan
Siksika ang mga kasulatan. Nagtanyag kini og usa sa pinakamaayo nato nga kapanguhaan aron kanunayng maanaa ang Espiritu sa Ginoo. Usa sa mga paagi nga akong naangkon ang siguradong kahibalo nga si Jesus mao ang Kristo mao ang pagtuon sa mga kasulatan. Si Presidente Ezra Taft Benson (1899–1994) ug Gordon B. Hinckley (1910–2008) nanawagan sa mga miyembro sa Simbahan nga himoon ang pagtuon sa Basahon ni Mormon nga usa ka inadlaw nga buluhaton ug tibuok kinabuhi nga tinguha.
Ang tambag ni Apostol Pablo kang Timoteo usa ka maayong tambag alang kanatong tanan. Misulat siya “Ang tibuok nga kasulatan gituga sa Dios, ug may kapuslanan alang sa pagpanudlo, alang sa pagpamadlong, alang sa pagpanul-id, alang sa pagmatoto sa pagkamatarung” (2 Timoteo 3:16).
Paghulagway pinaagi ni Cary Henrie
6. Pag-atiman sa Inyong Kaugalingon
Daghang tawo lakip kanako, naglisud sa pagpangita og igong panahon sa pagpahulay, pag-ehersisyo, ug pagrelaks. Kinahanglan kitang maghimo sa atong inadlaw nga iskedyul alang niini nga mga kalihokan kon gusto kitang makatagamtam og himsog ug balansing kinabuhi. Ang maayo nga pamustura makadugang sa atong dignidad ug pagrespeto sa kaugalingon.
7. Pagsunod sa Ebanghelyo
Balik-balik nga nagtudlo ang mga propeta kanato nga ang mga pamilya kinahanglang motudlo sa usag usa kabahin sa ebanghelyo, ilabi na atol sa family home evening. Kini nga praktis sa pamilya, kon dili kaayo kita nagmainampingon, anam-anam nga mawala kanato. Kinahanglan nga dili mawala kanato kining espesyal nga oportunidad nga “motudlo sa usag usa sa doktrina sa gingharian” (D&P 88:77), nga maggiya sa pamilya ngadto sa kinabuhing dayon.
Si Satanas naglihok kanunay sa pagguba sa atong mga pagpamatuod, apan siya walay gahum sa pagtintal o pagsamok kanato lapas sa atong kusog sa pagbatok kon kita nagtuon sa ebanghelyo ug nagsunod sa mga sugo niini.
8. Pag-ampo Kanunay
Ang katapusan nakong sugyot mao ang kanunay nga pag-ampo sa tinagsa ug sa pamilya. Mahibaloan ninyo ang hustong desisyon nga buhaton sa matag adlaw pinaagi sa kanunay, sinsero nga pag-ampo.
Gi-summarize ni propeta Alma ang kaimportante sa pag-ampo niini nga mga pulong: “Magpaubos sa inyong mga kaugalingon sa atubangan sa Ginoo, ug motawag sa iyang balaan nga ngalan, ug magbantay ug mag-ampo sa kanunay, nga kamo mahimo nga dili matintal labaw niana nga kamo makalahutay, ug sa ingon giyahan pinaagi sa Balaang Espiritu, magmapainubsanon, magmaaghup, masinugtanon, mapailubon, puno sa gugma ug sa tanan mainantuson” (Alma 13:28). Kon nahiangay ako sa espirituhanong paagi, mas dali ra nakong mabalanse ang tanan sa akong kinabuhi.
Padayon sa Pag-focus ug Paghimo sa Inyong Pinakamaayo
Ang ubang mga sugyot mahimong idugang niini. Bisan pa, nagtuo ko nga kon mag-focus kita sa pipila ka mahinungdanong katuyoan, mas madumala nato ang daghang panginahanglan sa kinabuhi. Hinumdumi, ang masubrahan sa bisan unsa sa kinabuhi makawagtang sa balanse. Sa samang paagi, ang gamay ra sab kaayong importanting butang sa kinabuhi sama ra sab og resulta. Mitambag si Haring Benjamin nga “ang tanan niini nga mga butang [angay nga] mahimo diha sa kaalam ug kahusay” (Mosiah 4:27).
Kasagaran ang kakulang sa klaro nga direksyon ug mga tumong makausik sa atong panahon ug enerhiya ug makadugang sa kawalay balanse sa atong kinabuhi. Ang kinabuhi nga dili balanse sama ra kaayo sa ligid sa sakyanan nga dili balanse. Dili maayo ang dagan niini ug peligro. Ang mga ligid nga perpekto ang pagkabalanse maghimo og hapsay og komportable nga pagpadagan. Mao usab sa kinabuhi. Ang dagan sa kinabuhi mahimong mas hapsay alang kanato kon maningkamot kitang kanunay nga balanse. Kinahanglan nga ang atong pinakatumong mao ang pagtinguha sa “pagka-imortal ug kinabuhing dayon” (Moises 1:39). Sa ingon niini nga tumong, nganong dili man nato wagtangon sa kinabuhi ang mga butang nga naghulhog sa atong mga hunahuna, pagbati, ug enerhiya nga walay gikatabang alang sa pagkab-ot sa atong mga tumong?
Dili pa dugay, usa sa akong anak miingon, “Pa, usahay maghunahuna ko kon makaya ba kaha nako.” Ang akong tubag kaniya sama sab sa akong ihatag kaninyo. Buhata lamang ang kutob sa imong mahimo matag adlaw. Buhata ang mahinungdanong mga butang ug, dili lang ninyo kini mabantayan nga, puno na ang inyong kinabuhi sa espirituhanong panabut nga mopamatuod kaninyo nga gihigugma kamo sa Langitnong Amahan. Kon mahibalo ang usa ka tawo niini, ang kinabuhi mapuno sa katuyoan ug kahulugan, nga mas sayon mamentinar ang pagkabalanse.