Giunsa sa mga Disipulo ni Kristo Pagpuyo Panahon sa Gubat ug Kasamok
Ang mga baruganan diha sa Basahon ni Mormon nakatabang kanato sa pagpuyo nga may hugot nga pagtuo ug paglaum panahon sa kalisdanan.
Kita nagpuyo sa panahon sa grabeng gubat ug kasamok. Ang mga pamantalaan nag-report niining makalilisang nga mga panghitabo matag adlaw. Ang propeta sa Ginoo, si Presidente Thomas S. Monson, miingon, “Mianhi kita niining yuta sa panahon sa kasamok.”1 Siya miuyon sa gisulti ni Presidente Gordon B. Hinckley (1910–2008): “Kita nagpuyo sa panahon diin mapintas nga kalalakin-an mobuhat og terible ug salawayon nga mga butang. Kita nagpuyo panahon sa gubat.”2
Samtang makapahinuklog, dili gyud ni ikatingala. Ang kasulatan nagtudlo nga sa katapusang mga adlaw si Satanas “makiggubat” (Pinadayag 12:17) sa mga matinuoron ug ang “kalinaw pagakuhaon gikan sa yuta” (D&P 1:35).
Ang Dios nakakita sa atong adlaw ug gitawag si Propeta Joseph Smith sa pagpatungha sa Basahon ni Mormon aron sa pagtabang kanato (tan-awa sa D&P 1:17, 29; 45:26). Sa 239 ka mga kapitulo sa Basahon ni Mormon, 174 (73 porsyento) naghisgut kabahin sa gubat, terorismo, pagpatay, laraw-pangdaot sa politika, tinago nga mga kalihokan, pagpanghulga, pakigkunsabo sa pamilya, ug uban pang oposisyon.
Nganong ang mga tigtipig sa talaan sa Basahon ni Mormon nagpreserbar og daghan kaayong mga insidente sa gubat? Si Presidente Ezra Taft Benson (1899–1994) mitubag, “Gikan sa Basahon ni Mormon atong makat-unan giunsa sa mga disipulo ni Kristo pagpuyo panahon sa gubat.”3 Ang mosunod mga ideya nga makagiya kanato samtang kita nagpuyo sa gubot nga panahon.
Ang Pagkamasulondon Nagdapit og Kaluwasan [Deliverance]
Kadaghan diha sa Basahon ni Mormon, ang Ginoo miluwas sa Iyang mga disipulo kon sila mosunod sa Iyang mga sugo.4 Si Nephi mitudlo, “Ang malumo nga mga kalooy sa Ginoo anaa ibabaw sa tanan kinsa siya mipili, tungod sa ilang hugot nga pagtuo, aron mahimo sila nga malig-on maingon ngadto sa gahum sa kaluwasan” (1 Nephi 1:20). Si Nephi dayon mirekord giunsa sa Ginoo pagluwas sa iyang amahan gikan sa mga tawo nga misulay sa pagpatay kaniya, miluwas sa iyang pamilya gikan sa pagkagun-ob sa Jerusalem, miluwas kaniya ug sa iyang mga igsoon gikan sa pagsulay og patay ni Laban kanila, ug miluwas kaniya sa dihang mihasi si Laman ug Lemuel (tan-awa sa 1 Nephi 2:1–3; 3:28–30; 4; 7:16–19; 18:9–23).
Si Alma miingon sa iyang anak nga si Shiblon, “Ako manghinaut nga ikaw kinahanglan mahinumdom, nga tungod kay ikaw mibutang sa imong pagsalig diha sa Dios mao usab nga ikaw pagaluwason gikan sa imong mga pagsulay, ug sa imong mga kasamok, ug sa imong mga kasakit” (Alma 38:5). Si Mormon nakaobserbar usab nga “kadto kinsa matinud-anon diha sa paghupot sa mga sugo sa Ginoo giluwas sa tanan nga mga panahon” (Alma 50:22). Si Elder Russell M. Nelson sa Korum sa Napulog Duha ka mga Apostoles mimatuod niining baruganan sa dihang miingon siya: “Ang pagkamasulundon mopadagayday sa mga panalangin sa Dios nga walay pagpugong. Siya mopanalangin sa Iyang masulundon nga mga anak og kagawasan gikan sa pagkaulipon ug pagkauyamot.”5
Ang Basahon ni Mormon nagpakita usab nga bisan ang pipila lang ka matarung nga mga tawo makaangkon og kalinaw ug kaluwasan diha sa tibuok siyudad (tan-awa sa Helaman 13:12–14).
Ang Gubat Mahimong usa ka Panawagan sa Paghinulsol
Kon kita makalimot sa Dios, Siya manawag kanato. Sa sinugdanan mogamit Siya og malumong mga pamaagi sama sa personal nga pagdasig ug mga propeta. Apan kon kita dili maminaw, Iyang dugangan ang Iyang mga paningkamot. Usahay, tugutan Niya ang mga gubat ug kasamok isip bahin sa Iyang katapusang paagi sa pagtabang kanato nga mobalik Kaniya.6
Si Mormon miingon, “Ug sa ingon kita makakita nga gawas kon ang Ginoo mopanton sa iyang mga katawhan uban sa daghan nga mga kasakitan, oo, gawas kon siya moduaw kanila uban sa kamatayon ug uban sa kalisang, ug uban sa kagutom ug uban sa tanan nga matang sa kamatay, sila dili mohinumdom kaniya” (Helaman 12:3). Ang gubat mahimong usa ka pahinumdom nga maghinulsol ug mobalik ngadto sa Dios.
Ang Dios Mohupay atol sa Gubat
Kon gikinahanglan sa mga disipulo sa Ginoo nga mag-antus tungod sa gubat, ang Dios mohupay kanila. Sa dihang si Alma ug ang iyang mga sumusunod nabilanggo, sila dayon nangamuyo sa Ginoo (tan-awa sa Mosiah 23:27–28), ug diha-diha dayon Siya mitubag: “Ako usab mopagaan sa mga alantuson diin anaa gitungtong diha sa inyong mga abaga, gani kamo dili makabati kanila diha sa inyong buko-buko, bisaan anaa pa kamo sa pagkaulipon; … nga kamo mahimo nga masayud sa pagkatinuod nga Ako, ang Ginoong Dios, moduaw sa akong mga katawhan diha sa ilang kasakit” (Mosiah 24:13–14).
Si Jacob miingon ngadto sa putli og kasingkasing sa iyang panahon, “Tan-aw ngadto sa Dios uban sa kalig-on sa hunahuna, ug pag-ampo ngadto kaniya uban sa hilabihan ka hugot nga pagtuo, ug siya mohupay kaninyo sa inyong mga kasakit, ug siya mohangyo alang sa inyong katuyoan, ug mopakanaog og kaangayan niadtong kinsa nagtinguha sa inyong kalaglagan” (Jacob 3:1).
Ang moderno nga mga propeta mimatuod niini nga kamatuoran. Si Elder Joseph B. Wirthlin (1917–2008) sa Korum sa Napulog Duha ka mga Apostoles mitudlo, “Samtang dili kanunay manginlabut ang [Dios] sa dagan sa mga panghitabo, Siya misaad sa mga matinud-anon og kalinaw bisan sa ilang mga pagsulay ug kalisdanan.”7
Si Presidente Benson miingon, “Bisan tuod ang panahon nagkaanam og kapeligro, … kon kita mosalig lang sa Dios ug mosunod sa iyang mga sugo dili kita angay nga mahadlok.”8
Ang Pipila Gitawag sa Pagbarug isip Saksi Batok sa Kadautan
Samtang ang mga disipulo ni Kristo maluwas gikan sa gubat, pipila sa mga disipulo kinahanglang mag-antus o mamatay sa pagbarug isip saksi batok sa dautan. Kini usa ka sakit nga reyalidad nga dili dali madawat o masabtan. Si Elder Neal A. Maxwell (1926–2004) sa Korum sa Napulog Duha ka mga Apostoles mipahinumdom kanato nga “ang mga matinud-anon dili makalikay sa mga panghitabo sa kalibutan.”9 Si Presidente Hinckley miila nga pipila kanato “mahimong mag-antus.”10
Gipreserbar sa Basahon ni Mormon ang pipila ka mga panghitabo sa dili makatawhanong pag-abusar ug pagkamapintas aron makatabang kanato sa pagsabut nganong ang mga disipulo sa Ginoo, lakip ang mga propeta ingon man ang inosenteng mga babaye ug mga bata, usahay mag-antus ug mamatay sa gubat. Sama pananglit, si Propetang Abinadi gigapos sa dautang mga pari ni Haring Noah “ug mibunal sa iyang lawas uban sa binugkos nga kahoy, oo, gani ngadto sa kamatayon.” Sa wala pa mamatay, si Abinadi mipamatuod, “Kon ikaw mopatay kanako ikaw mopaagas sa dugo sa walay sala, ug kini usab mobarug nga usa ka pagpamatuod batok kanimo sa katapusan nga adlaw” (Mosiah 17:10, 13).
Sa lain nga panghitabo sa sakit nga pagpatay diha sa Basahon ni Mormon, gisunog sa dautang mga abogado ug mga maghuhukom sa Ammonihah ang mga asawa ug mga anak sa mga nakabig sa tinuohan. Sila si Alma ug Amulek gidala ngadto sa dapit asa gipangpatay ug gipugos sa pagsaksi niining walay kalooy nga pagpamatay.
“Sa diha nga si Amulek nakakita sa mga kasakit sa mga babaye ug sa mga bata kinsa gilamoy sa kalayo, siya usab gisakitan; ug siya miingon ngadto kang Alma: Ngano nga kita mosaksi niini nga makahahadlok nga talan-awon? Busa kita mopatuy-od sa atong mga kamot, ug gamiton ang gahum sa Dios nga ania kanato, ug luwason sila gikan sa mga dilaab sa kalayo.”
Si Alma mitubag, “Ang Espiritu nagpugong kanako nga ako kinahanglang dili mopatuy-od sa akong kamot; kay tan-awa ang Ginoo midawat kanila ngadto sa iyang kaugalingon, diha sa himaya; ug siya mitugot nga sila mahimo nga mobuhat niini nga butang, o nga ang mga katawhan mahimo nga mobuhat niini nga butang ngadto kanila, sumala sa katig-a sa ilang kasingkasing, nga ang mga paghukom diin siya mopahamtang nganha kanila diha sa iyang kasuko makiangayon; ug ang dugo sa walay sala mobarug ingon nga usa ka saksi batok kanila, oo, ug mosinggit sa hilabihan batok kanila sa katapusan nga adlaw” (Alma 14:10–11).
Ang Matarung nga Namatay sa Gubat Mosulod ngadto sa Kapahulayan sa Ginoo
Samtang kita nagmasulub-on sa pagkamatay sa matinud-anong gimahal, ang Basahon ni Mormon misiguro kanato nga sila nakasulod sa kapahulayan as Ginoo ug nagmalipayon. Si Moroni mihatag og gibug-aton niining hilisgutan, “Kay ang Ginoo mitugot sa mga matarung nga mapatay nga ang iyang kaangayan ug paghukom modangat sa mga dautan; busa kamo dili magtuo nga ang mga matarung gisalikway tungod kay sila gipatay; apan tan-awa, sila mosulod ngadto sa kapahulayan sa Ginoo nga ilang Dios” (Alma 60:13).
Human sa usa ka gubat diin ang “mga lawas sa daghan nga mga liboan … nadunot nga nagtipun-og diha sa ibabaw sa yuta,” lakip sa pipila sa mga matinud-anong mga disipulo ni Kristo, narekord sa Basahon ni Mormon nga ang mga naluwas “nagbangutan tungod sa pagkamatay sa ilang mga kaliwatan, apan sila nalipay ug naghimaya sa paglaum, ug gani nasayud, sumala sa mga saad sa Ginoo, nga sila pagabanhawon aron mopuyo diha sa tuo nga kamot sa Dios, sa usa ka kahimtang sa walay katapusan nga kalipay” (Alma 28:11–12).
Ang Prinsipe sa Kalinaw
Ang Basahon ni Mormon gipatungha aron sa pagpanalangin niadtong buhi panahon sa gubat ug kasamok. Ang mga panghitabo ug mga pagtulun-an nga narekord dinhi naghatag og paglaum, paghupay, ug paghatag og balaanong panglantaw. Atong nakat-unan nga ang pagkamasulundon ngadto sa Dios makaluwas og daghan, nga ang gubat mahimong usa ka panawagan sa pagbalik ngadto sa Dios, ug nga ang Dios naghatag og kahupayan alang sa Iyang mga disipulo nga nag-antus. Ato usab nga nakat-unan nga ang mga matarung kinsa mamatay atol sa gubat o kasamok mobarug isip saksi batok sa dautan ug kini nga mga disipulo mosulod ngadto sa kapahulayan sa Ginoo.
Sa katapusan, ang Basahon ni Mormon nagtudlo kanato sa unsang paagi nga ang mga disipulo ni Kristo makadawat og kalinaw sa ilang mga kasingkasing, mga panimalay, ug kanasuran. Kini mao ang labing mahinungdanon nga instrumento sa pagdala nato kang Jesukristo, ang Prinsipe sa Kalinaw.
Pipila sa mga disipulo, sama ni Abinadi (gipakita sa ibabaw ug sa ubos), nag-antus o namatay aron mobarug isip saksi batok sa kadautan.
Sa ibabaw: Si Nephi milahutay nga gigapos sulod sa upat ka adlaw hangtud nga si Laman ug Lemuel naghinulsol ug gibadbad ang mga pisi (tan-awa sa 1 Nephi 18:9–21). Sa tuo: Walay usa sa 2,000 ka mga batan-ong lalaki nga sundalo ni Helaman ang namatay sa gubat (tan-awa sa Alma 56:44–57).
Sa wala: Ilang Kong Gitratar uban sa Hilabihan nga Kapintas, ni Walter Rane, sa maayong kabubut-on sa Church History Museum; sa tuo: Sila Misalig sa Dios, ni Walter Rane, sa maayong kabubut-on sa Church History Museum
Si Ether (sa ibabaw) ug si Moroni (sa pahina 34) nakakita sa kalaglagan sa ilang mga sibilisasyon tungod sa gubat (tan-awa sa Ether 13:13–14; Moroni 1:1–4).
Sa ibabaw sa wala: Si Abinadi Miselyo sa Iyang Pagpamatuod, ni Ronald Crosby, dili mahimong pakopyahan; ubos sa wala: Si Abinadi Mipamatuod, ni Walter Rane, sa maayong kabubut-on sa Church History Museum; sa tuo: Katalagsaon sa mga Panagna ni Ether, ni Walter Rane, sa maayong kabubut-on sa Church History Museum
Nagpabilin Akong Nag-inusara, ni Walter Rane, sa maayong kabubut-on sa Church History Museum