Mensahe sa Visiting Teaching
Espesyal nga mga Panginahanglan ug Serbisyo nga Nabuhat
Tun-i kini nga materyal sa mainampuon nga paagi ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.
Hugot nga Pagtuo, Pamilya, Kahupayan
“Ang mga panginahanglan sa uban kanunayng anaa,” miingon si Presidente Thomas S. Monson, “ug matag usa kanato makahimo og butang aron sa pagtabang og usa ka tawo. … Gawas kon kalimtan nato ang atong kaugalingon diha sa pagserbisyo sa uban, adunay gamay ra nga katuyoan sa atong kaugalingong kinabuhi.”1
Isip mga visiting teacher kita matinud-anong makaila ug mahigugma sa matag sister nga atong gibisitahan. Mahimong natural ang atong pagserbisyo niadtong atong gibisitahan tungod kay nahigugma kita kanila (tan-awa sa Juan 13:34–35).
Unsaon nato pagkahibalo sa espiritwal ug temporal nga mga panginahanglan sa atong mga sister aron kita makaserbisyo kon gikinahanglan? Isip mga visiting teacher, kita makadawat og inspirasyon kon kita mag-ampo niadtong atong gibisitahan.
Ang kanunay nga pagkontak sa mga sister importante usab. Personal nga mga pagbisita, pagtawag gamit sa telepono, usa ka mubo nga sulat sa pagdasig, mga e-mail, pagtapad kaniya, matinud-anong pagdayeg, pagtabang kaniya sa simbahan, pagtabang kaniya panahon sa sakit o panginahanglan, ug ubang mga buhat sa pagserbisyo makatabang sa pag-amuma ug paglig-on sa usag usa.2
Ang mga visiting teacher gihangyo sa pagreport sa kahimtang, bisan unsa nga espesyal nilang panginahanglan, ug sa serbisyo nga gihatag kanila. Kini nga mga report ug atong pagserbisyo sa atong mga sister makatabang kanato sa pagpakita sa atong pagkadisipulo.3
Gikan sa mga Kasulatan
Gikan sa Atong Kasaysayan
Ang pagserbisyo sa usag usa mao ang labing mahinungdanon sa visiting teaching. Pinaagi sa padayon nga pagserbisyo atong mapakita ang pagkamabination ug pakighigala nga sobra pa kaysa binulan lang nga mga pagbisita. Ang atong pag-amuma mao ang mahinungdanon.
“Ang akong tinguha mao ang paghangyo sa atong mga sister sa dili pagkabalaka mahitungod sa pagpanawag sa telepono o matag tulo ka bulan o binulan nga pagbisita,” miingon si Mary Ellen Smoot, ika-13 nga kinatibuk-ang presidente sa Relief Society. Siya mihangyo kanato nga “maghunahuna sa pag-alima sa malumo nga mga kalag.”4
Si Presidente Spencer W. Kimball (1895–1985) mitudlo nga, “Importante kaayo nga moserbisyo kita sa usag usa sa gingharian.” Apan iyang giila nga dili tanang pagserbisyo kinahanglan nga may pagkabayani. “Kanunay gayud, ang binuhatan sa pagserbisyo naglangkob sa yano nga pagdasig o sa paghatag … og tabang uban sa kalibutanon nga tahas,” siya miingon, “apan unsa ka mahimayaon nga mga sangputanan ang mahitabo … gikan sa gamay apan kinabubut-on nga mga buhat!”5
Paghulagway sa litrato pinaagi ni Matthew Reier