Fesili i le Mamona
Kari Koponen, Uusimaa, Finelani
O alii talavou uma lava ua silia ma le 18 tausaga i Finelani e manaomia le auauna atu i le militeli mo le 6 i le 12 masina. Ina ua amata la’u auaunaga moomia, na ou iloa ai o manatu ma uiga faaalia o le tele lava o au paaga fitafita e feteenai ma au mataupu faavae. O le taunuuga, na ou faia ni laasaga ina ia tumau ai le latalata i le Agaga, tatalo e le itiiti ifo i le faalua i le aso ma le faitauina o tusitusiga paia.
Na ou lagona le fefe i le taimi muamua aua ou te le iloa po o a uiga o le a faaalia mai e au paaga, ae na foliga mai latou te lei popole, ma na ou mafanafana. Ina ua mavae sina taimi na fesili mai au uo i le potu po o le a le mea o loo ou faitauina. “O le Tusi a Mamona,” na ou tau sao atu ia i latou. O le isi a latou fesili, ioe, pe o au o se Au Paia o Aso e Gata ai. Na ou tau atu ia te i latou o lea lava, ma na latou faagaloina le mataupu mo sina taimi.
Na oo mai le taimi na amata ona fesili mai nisi o au paaga fitafita e uiga i le Tusi a Mamona—pe mai fea, anotusi, ma faaauau ai lava. Mulimuli ane ua faasolo mai a latou fesili mai le faamoemoega o le olaga agai i mataupu faavae o le Ekalesia. Na avea lau lotu ma vaega masani o a matou talanoaga, ma na oso mai toeitiiti lava i soo se tulaga.
O se tasi o alii i le moega tuaoi na fesili mai pe mafai ona ia faitau i lau Tusi a Mamona. Ioe, na ou fai atu ai. I se tasi taimi, ina ua foi mai se tasi ma te potu mai se falelauasiga o se uo, na fai mai ia te au na avea le falelauasiga ma mea na faaosofia ai le tele o fesili i lona mafaufau e uiga i le olaga ma lona faamoemoega. Na ia fesili mai ia te au po o le a le talitonuga o le Ekalesia e uiga i na mea. Na umi se ma talanoaga e uiga i le faamoemoega o le olaga, le Togiola, le Foafoaga, ma isi mataupu o le talalelei. Mulimuli ane, na amata ona fiafia mai isi matou te potu i aoaoga ma tulaga faatonuina a le Ekalesia.
I taimi na totoe o le matou mafutaga, na tele a matou talanoaga na foliga mai e liliu atu i aoaoga a le Ekalesia. Na faaigoa e le matou potu nei talanoaga o vasega o le “Fesili i le Mamona.” Mulimuli ane, ina ua matou faauu mai la matou aoaoga, na tau mai e se tasi o le matou potu ua ia filifili e tuu le palauvale.
I lou taimi atoa i le militeli, na ou matauina ai o le tele lava o lo’u talanoa atu e uiga i lo’u avea ai ma tagata o le Ekalesia ma le tele o lo’u mulimuli ma le faamaoni i aoaoga o le talalelei, o le tele foi lena o le tatala mai o lagona o isi ia te au ma tele ai avanoa ou te maua e faasoa atu ai le talalelei.
Ou te faafetai mo faamanuiaga ma avanoa na ou maua e talanoa ai e uiga i le talalelei i le taimi o lau auaunaga faafitafita. Ou te molimau atu afai tatou te lotototoa e tutu atu mo o tatou tulaga faatauaina, o le a faamanuiaina i tatou i avanoa e fai ai galuega faafaifeautalai. Ma afai tatou te faasusulu atu ma le saoloto le malamalama o le talalelei i o tatou olaga, o le a mafai ona tatou puipuia i tatou lava mai le pogisa ma maua se uunaiga lelei i le lalolagi o siomia ai i tatou.