Nadawat Nako ang Akong Tubag gumikan sa Komperensya
Sara Magnussen Fortes, São Paulo, Brazil
Niadtong 2006 mieskwela ko og anthropology sa usa ka kolehiyo sa Katoliko. Ang among magtutudlo mi-assign kanamo sa pagsiksik og partikular nga tinuohan ug ipresentar kini sa tibuok klase. Gipili nako nga mohimo og presentasyon kabahin sa Ang Simbahan ni Jesukristo sa mga Santos sa Ulahing mga Adlaw—hinoon, miyembro nako sulod sa 21 ka tuig. Nasayud ko nga kini usa ka talagsaon ug nindot nga oportunidad sa pagpakigbahin unsa ang akong gituohan ngadto sa 40 ka klase ug mga higala.
Sa duha ka bulan nakong pagpangandam sa akong presentasyon, nanlimbasug ko sa pagpangita og yanong paagi sa pagpresentar sa mga doktrina nga akong gimanggad nga masabtan sa akong mga kaklase. Dili ko sigurado unsa nga mga punto ang akong himoon o unsaon nako sa paghimo niini. Sa dihang usa na lang ka semana sa dili pa ko mopresentar, wala gihapon ko masayud unsa ang buhaton. Sa tumang kaguol, nag-ampo ug nangayo ko sa Ginoo og tabang.
Gitubag ko pinaagi sa kinatibuk-ang komperensya, nga gipahigayon nianang semanaha. Atol sa Abril 2006 nga komperensya, si Presidente James E. Faust (1920–2007), Ikaduhang Magtatambag sa Unang Kapangulohan, namulong nga giulohan og “Ang Pagpahiuli sa Tanang mga Butang.”1 Nabati nako ang Espiritu Santo nga mimatuod sa mga kamatuoran nga gipakigbahin ni Presidente Faust—ug sa paagi sa iyang pagpakigbahin niini—usa ka sumbanan nga akong masunod sa paghimo sa akong presentasyon.
Gi-download nako ang kopya sa iyang pakigpulong gikan sa Internet paghuman sa komperensya ug gigamit kini isip basihan sa pagpangandam og slideshow nga pasundayag, nga akong ipakita sunod semana. Gigahinan ko og 20 minutos, apan tungod sa mga pangutana sa akong magtutudlo ug mga kaklase, ang presentasyon milungtad og 40 minutos—ang tibuok panahon sa klase.
Sa dihang nahuman ko, ang among magtutudlo miingon nga wala pa sa iyang mga estudyante ang nakahimo og ingon ka nindot nga pasundayag. Iya kong gihatagan og taas nga grado ug miingon kanako nga ang bugtong rason nganong wala nako makuha ang perpekto nga grado tungod kay ingon og may gidapigan ko sumala sa tema.
Sa wala madugay gipakigbahin nako sa akong magtutudlo ang web page sa Liahona, asa niya makita ang pakigpulong ni Presidente Faust ug uban pa nga makatabang kaniya. Gihatagan usab nako siya og kopya sa Basahon ni Mormon ug mihangyo kaniya sa pagbasa niini, nagdapit kaniya nga makig-istorya kanako inigkahuman.
Mapasalamaton ko nga nasayud nga ang presentasyon nakaimpluwensya sa pipila ka mga estudyante. Sa tibuok nabilin nga tuig, nakita nako ang ebidensya sa kalainan nga nahimo niini sa ilang kinabuhi. Gani usa kanila midawat sa mga misyonaryo sa ilang balay, nga naghatag kanamo og dakong oportunidad sa pagpadayon sa among panag-istoryahanay kabahin sa ebanghelyo ni Jesukristo.
Mapasalamaton ko sa oportunidad nga nakapakigbahin ko sa akong mga pagtuo ngadto sa akong mga kaklase. Apan mas importante, mapasalamaton ko nga akong nahibaloan nga ang Ginoo motubag sa atong kinasingkasing nga mga pag-ampo pinaagi sa mga pulong sa moderno nga mga propeta ug apostoles.