Na tatalaina e le Polokalama o Lima Fesoasoani le Ala mo le Galuega Faafaifeautalai Faamisiona, i le Siteki Fou i Amapá, Pasila
O le Aso Toonai, 10 o Mati, 2012, e toa 21 tagata na ui ifo i le vai o le papatisoga. O se fuainumera sili lea le toatele o ni tagata i tausaga ua tuanai i setete o Para ma Amapá i Pasila, i vaega uma o le Misiona a Brazil Belém, na mauaina le sauniga o le papatisoga i le aso lava lea e tasi ma avea ma “nuu faatasi” ma le Au Paia (Efeso 2:19) ma savavali “i le ola toefuataiina” (Roma 6:4).
O papatisoga na oo mai ina ua faatoa maea lava le faasalalauga o le itu o Macapá o le a avea ma siteki, lea na tupu i le aso 14 ma le 15 o Aperila.
Na tuufaatasia uma au taitai, tagata, ma faifeautalai faamisiona i le galulue ai i lenei ituaiga o le tuputupu ae. O le galuega o le polokalama o Lima Fesoasoani ua avea foi ma mea faigaluega i le galuega faafaifeautalai talu ai.
“O galuega faatino a Lima Fesoasoani na faia i le lua tausaga talu ai i le setete o Amapá ma ua aumaia le Ekalesia mai le pogisa, fagua ai taitai faale-malo, le au tusitala, le atunuu lautele i le manao ia iloa lenei polokalama matagofie ma le lotu o loo lagolagoina,” na saunoa i ai José Claudio Furtado Campos, peresitene o le Misiona a Brazil Belém sa faamalolo talu ai nei.
O le mea moni, na matua fesoasoani tele ia galuega faatino i le setete ma o lea na tuuina mai ai e taitai faalemalo ni aso malolo fou se tolu i lea itu: O le aso 6 o Aperila, o le Aso o Le Ekalesia a Iesu Keriso o le Au Paia o Aso e Gata Ai; aso 30 o Iulai, Aso o Lima Fesoasoani Tuufaatasi; ma le aso 23 o Setema, o le Aso “O Le Aiga: O Se Folafolaga i le Lalolagi”. Ma le isi, o se tuufaatasiga o le faafetai i le Ekalesia na tuuina atu ia Elder Jairo Mazzagardi o le Fitugafulu, Fesoasoani Lua i le Au Peresitene o le Eria i Pasila.
“O galuega faatino a Lima Fesoasoani ua fesoasoani i le mauaina e le Ekalesia o le faatuatuaga a tagata o Amapá,” o le saunoaga lea a Peresitene Campos. “Pe a faailoa atu e a tatou faifeautalai faamisiona i latou lava … , e tau atu e tagata ia i latou ua leva ona latou faalogo e uiga i le Ekalesia aua na latou vaai i ni tusi po o ni ata i le televise, i le leitio, ma le nusipepa. Ua latou faalogo i mea maoae e uiga i le Ekalesia, ma o lenei mea e masani ona faateleina ai le taliaina o le galuega a faifeautalai.”
I Macapá, i Pasila, e toa 21 tagata na ui ifo i le vai o le papatisoga i le Aso Toonai, 10 o Mati, 2012, pe a ma le toe tasi le masina avea le Itu o Macapá i Pasila ma siteki. O loo i ai faatasi na tagata fou ma faifeautalai faamisiona mai le Misiona a Brazil Belém i le ata lenei. Fai mai faailoilo, “Estaca Macapá,” po o le “Siteki o Macapá.” Ua tuuina atu e taitai i le lotoifale ma le au paia le faamalo i le polokalama o Lima Fesoasoani ona o lo latou sao i le faatupulaia ma le malosiaga o le Ekalesia.
Ata na pueina e Michelle Sá