Ua Faamanatuina e Tamaitai o le Aualofa i le Salafa o le Lalolagi le 170 Tausaga
Ina ia faamamaluina le 170 tausaga o le faalapotopotoga a le Aualofa, ua auai ma le filiga ia tamaitai mai le salafa o le lalolagi i auaunaga ma isi gaoioiga ua latou punouai ai i le galuega a le faalapotopotoga.
Na auina atu e le au pulega aoao a le Aualofa, ia Fepuari se valaaulia i tamaitai i le lalolagi atoa, ua fautuaina atu ai ni gaoioiga talafeagai faifai pea se valu mo le faamanatuina o le aso fanau—lea na faataunuuina i le Aso Toonai, 17 o Mati, 2012. E mafai ona fuafuaina gaoioiga i lalo o le taitaiga a taitai perisitua o le lotoifale.
Ma na tali mai tamaitai i le salafa o le lalolagi. O nisi nei o otootoga faapitoa mai nisi o faamamaluga na faataunuuina i le Ekalesia atoa.
Ripapelika Tominika
O tamaitai mai le Paranesi Muamua a Primavera o le Itu o La Vega i Ripapelika Tominika na manatuaina le lē manatu faapito o tamaitai mai le talafaasolopito anamua o le Au Paia o Aso e Gata Ai ma la latou talatuu faavavau i le faamamaluga a le paranesi i le aso 17 o Mati.
O tamaitai taitoatasi na auai na oofu faapaionia ma faasoa atu se savali e uiga i le Aualofa. O María Elena Pichardo de Gómez, le fesoasoani muamua i le au peresitene o le Aualofa, na ia faamanatu atu i tamaitai lo latou tiute o le saunia mo taimi faigata, e pei ona aoaoina mai e perofeta o aso nei. Na ia faaopoopo atu, “O le malosi sili o le Aualofa a le Paranesi Muamua a Primavera o loo i totonu o lo matou eseesega ae ua fusia faatasi i matou e le talalelei e tasi.”
Fiti
I le mulimuli ai i le fautuaga a le au peresitene aoao o le Aualofa ia “faatulaga ni auaunaga a le Aualofa i le alalafaga,” na faalauiloa ai e le Aualofa a le Uarota a Samabula o le Siteki a Suva Fiti i Matu se galuega faatino faifai pea e taua o le “Faia o se Eseesega—E Le Uma le Alofa.” Na tofu tamaitai o le uarota ma se sini ina ia faia se galuega fesoasoani, alofa, po o le agalelei atu e faa-170 taimi—i tagata eseese uma lava—seia oo i le faaiuga o Setema o le 2012.
Na faia foi e le uarota se gaoioiga e fesoasoani ai i tamaitai ina ia malamalama atili ai ma talisapaia ia olaga ma saofaga a peresitene aoao uma o le Aualofa, e amata mai ia Ema Samita.
Hong Kong
I Hong Kong, na faamamaluina e tamaitai mai le Siteki o New Territories le aso fanau o le Aualofa e ala i le toe tepa o latou lava talafaasolopito faapea ma le Aualofa.
Sa latou faatulagaina se faaaliga, e faaautu faapea “Sailiga mo le Alofa Tunoa,” lea na latou faaalia ai ni ata tuai o faifeautalai, faamaumauga a aiga, ata vali, ma galuega taulima na faia i gaoioiga e Aualofa anamua, e aofia ai ni moli matagi ma pīpī e fai i taga pepa mumu, galuega suisui, tautau ki, ma ato tupe.
Kenya
I le Paranesi a Bamburi o le Misiona a Kenya Nairobi, na foaiina atu ai e tamaitai o le Aualofa le tupe semanu latou te faaaogaina i se gaoioiga ae faatau ai mea e manaomia mo le umukuka ma isi aitema na manaomia e le paranesi. Ina ua uma ona faamamaina maeaea le falelotu i le lotoifale, na faapotopoto tamaitai o le uarota mo se taimi o le toe tepa i tua i le foafoaina o le Aualofa i le 1842, i le faaaogaina ma le talanoaina o punaoa mai le O Afafine i Lo’u Malo: O le Talafaasolopito ma le Galuega a le Aualofa.
“O le mafaufau atu i le avea ma se vaega o lenei faalapotopotoga i le lalolagi atoa o le Aualofa e faapitoa,” o le tala lea a Irene Kioi, le fesoasoani lua i le au peresitene o le Aualofa. “Ua faamautinoa mai ai ia te au faapea o le [Aualofa] ua faauuina e le Atua ae le o tagata.”
I le Paranesi a Mombasa, na suesue tamaitai e uiga i soo tamaitai o Iesu Keriso mai le O Afafine i Lo’u Malo ma le Feagaiga Fou. O le peresitene o le Aualofa o le paranesi, o Jael Mwambere, na faapea mai, “O la matou faamamaluga muamua lenei mo le Aualofa a le Paranesi a Mombasa. O lou faamoemoe ina ia matou amataina se tautinoga fou i o matou tiute i le Aualofa. Tau ina ia matou fetausiai, auai i a matou sauniga Lotu, ma fesoasoani i e manaomia le fesoasoani, e amata atu nei.”
O Le Ripapelika o le Atu Maresala
O le Aso Toonai, aso 17 o Mati, e faitau selau tamaitai mai le Paranesi a Ajeltake, le Uarota a Laura, ma le Uarota a Long Island Majuro o le Siteki a Majuro Marshall Islands na feiloai i Rairok, o se taulaga e latalata i le Majuro Atoll, i le 4:30 i le taeao. O le mafuaaga: sa latou savavali mo se itula ma le afa agai i le falelotu o Delap e faaali atu ai le uiga o le taua naua o le tumau. Na latou feiloai mulimuli ane ma tamaitai o Uarota a Delap ma Rita, o e na savavali foi i le falelotu, mo se faigalotu ma le malu taeao. Ma mulimuli ane faatino ai e tamaitai tala ma siva ma faalogologo i se lauga mai le peresitene o le siteki.
Sepania
Na faia se faaaliga o le talafaasolopito o le Aualofa a le Uarota a Dos Hermanas o le Siteki a Seville i Sepania ma na faaaofia ai se tusi faapitoa o ata o le auaunaga ma gaoioiga na faatinoina faatasi e tamaitai i le aluga o taimi.
O María Pérez Sánchez, o le fesoasoani muamua i le au peresitene o le Aualofa, na saunoa mai, “[O le] mafai ona auai i le aso fanau o lenei faalapotopotoga ua ou latalata atili ai i na tamaitai paionia o e na ositaulagaina le tele o mea mo i tatou. Ma o lenei, i le aso, e mafai ona tatou faaauauina le faiga o lenei galuega na latou faia.”
O Le Iunaite Setete
Sa faamanatuina e tamaitai o le Uarota a Gardner o le Siteki a Springfield Massachusetts, le 170 tausaga o le Aualofa i se taumafataga o le afiafi na faia i le aso 15 o Mati. Na aofia ai i le afiafi ni saunoaga mai ni tamaitai se toafa, sa latou talanoa taitasi mai e uiga i se tamaitai na faatosinaina lona olaga i se tulaga lelei. Na aumaia foi e failauga taitoatasi se mea faitino laitiiti e faamamafa mai ai lana aoaoga.
“O lenei gaoioiga na siitia ai le malosi ma le taua o tamaitai” na saunoa ai Jennifer Whitcomb, le peresitene o le Aualofa, “ma na faamalolosia foi i matou e vaai atu i malosiaga, mea e tutusa ai, ma le taua o isi.”
E ui lava ina ua tuanai atu le aso fanau, ae o le valaaulia mo tamaitai ia auai i auaunaga ma isi gaoioiga faamamaluina e faaauau pea mo le 2012 atoa.
Na faia foi e le Aualofa o le Uarota a Samabula o le Siteki a Suva Fiti i Matu se gaoioiga e fesoasoani ai i tamaitai ina ia malamalama atili ma talisapaia ia olaga ma saofaga a peresitene aoao uma o le Aualofa, e amata mai ia Ema Samita.
Ata na pueina e Evonne Inia-Taufaga