O Le A Oo Mai le Seleselega
Sa iloa e le aiga o Filipponi o le tulafono o le seleselega—i le faaletino faapea ma le faaleagaga—e manaomia le maelega, onosai, faapea ma le tatalo.
Mo Oscar Filipponi ma lona aiga, o le ola ai mai le laueleele e lei faigofie. O matagi, mūgālā, faaleagaina o masini, faaletonu o fefaatauaiga i maketi, ma isi luitau ia na foliga mai i nisi taimi sa taupulepule e faasagatau mai i taumafaiga sili a le aiga.
“O aso uma lava i le chacra—i lo matou fanua—e tatau ona matou saili i musumusuga ma faaaliga ina ia mafai ai ona matou ola i mea ua maua mai i le laueleele,” o le tala lea a Oscar, o le e galueaiina se faatoaga e 100 eka (40 ha) i le vaega Maualalo o le Chubut River Valley, o loo i ai i le Itumalo i saute o Chubut Atenitina. “O aso uma lava e oo mai ai luitau.”
O se tasi o luitau sili o le aiga a Filipponi o le leiloa lea po o afea o le a fua mai ai a latou taumafaiga lē faavaivai. Peitai, ua latou iloa o le a faamanuiaina lava a latou galuega faigata ma le maelega i le iuga.
“O le galueaiina o le laueleele e le faapea o le a tauia ai au taumafaiga i se tulaga faaleaso pe faalevaiaso foi,” o le faamalamalama mai lea a Oscar. “Matou te galulue i aso uma vagana ai le Aso Sa—i vaiaso uma, masina uma—e aunoa ma le vaai atu i se taui tautupe, ma o lea e tatau ai ona matou faatulagaina ni fuafuaga faaletamaoaiga. O nisi taimi e faitau masina pe tausaga foi e faatalitali ai mo ni fua o a matou galuega. E tatau ona tatou manatuaina pea o le galuega o loo tatou faia i le taimi nei o le a seleseleina i se taimi mulimuli ane.”
Faatasi ai ma lona toalua o, Liliana, ma le toalua o le la fanau o, Daniel ma María Céleste, o loo totoina e Oscar le vaofalī ma tausia ni lafumanu.
“O nisi taimi e i ai a matou tupe, ma o nisi foi taimi e leai ni tupe ona o loo faaaoga e faagaoioia ai le faatoaga,” o lana tala mai lea. “O nisi taimi e leaga ai a matou masini. O nisi taimi e le taulia ai a matou manu pe a oo i le taimi ua tatau ai ona faatau atu. Ae a matou mafaufau loloto ma tatalo, tumau i le onosai, ma taofimau i le faamoemoe, i totonu o se aso pe lua foi o le a oo mai se vaifofo lava ia. O le a sau se tasi ma fai mai, ‘Che,1 e i ai ni au manu e fia faatau?’ E lelei a mea uma, ma matou te agai pea i luma. E faigata le galueaiina o le laueleele, peitai o loo tausia pea i matou e ala i a matou taumafaiga i aso taitasi.
Nofoaga e avea ma Faasinoala
Fai mai Tanielu o le galueaiina o le laueleele ua ia maua ai ni avanoa i aso taitasi e toe manatunatu ai i faamanuiaga ma luitau mai se vaaiga faaletalalelei. “O se faamanuiaga le talanoa ma le Alii ma gauai atu i uunaiga a le Agaga e aunoa ma ni mea faalavefau mai le pisapisao po o musika po o ni faasalalauga,” sa ia fai mai ai e uiga i le galueaiina o le laueleele.
“E faigofie le avea ai ma se tagata o le Ekalesia i le nofo ai i se nofoaga faapenei ma siosiomia e e pele faatasi ai ma le siosiomaga faalenatura,” o le faaopoopo mai lea a Liliana. “E fesoasoani lea ia te au ina ia ou manatua ai o loo tatou faalagolago atu i le Alii ma o mea uma ua tatou maua e mai ia te Ia. E toeitiiti lava o mea uma tatou te faia iinei e atagia mai ai nisi o mataupu faavae o le talalelei. E sau lava Oscar ia i le fale i taimi uma ma se manatu lelei mai le galue ai i le faatoaga po o le tausiga o manu.”
Pe a suaina e Oscar le palapala, mo se faataitaiga, e na te filifilia se nofoaga e avea ma se faasinoala e pei o se laau po o se maa i se mea mamao ina ia mafai ona fesoasoani ia te ia ina ia sa’o le laina o loo ia suaina. “E le afaina pe afai o loo i ai ni mea o loo faalavelave i le auala,” o le tala lea a Liliana. “E le mafai ona ia aluese mai lona ala aua e na te fia manao ina ia sasa’o ia laina.”
Sa faaopoopo mai Oscar, “Afai ou te tilotilo i tua i le laina sa ou sau ai, o le a ou aluese ai mai le ala. Ma o lea ou te taulai atu ai pea i le nofoaga o loo avea ma faasinoala ma agai ai pea i luma.”
E pei ona i ai i le chacra, o lana tala lea, e faapena foi i le Ekalesia. “Ina ia tumau ai pea i le ala i o tatou olaga, e tatau ona tatou vaai atu i le Alii, faitau ia tusitusiga paia, ma tausi ia poloaiga. Afai tatou te faatagaina ni mea e faalavelave ia i tatou lava, o le a le mafai ona tatou iloa atu ia nofoaga o loo avea ma faasinoala ma o le a piopio o tatou auala.”
O Se Seleselega Faaleagaga
E auai le au Filipponi i se paranesi o le Ekalesia e latalata i Gaiman. O lenei aai e toa 6,000 tagata, sa nofoia e tagata sa malaga mai i Uelese i le vaitau o le 1870, sa tele ni avanoa na maua e tagata o le paranesi e faasusulu atu ai lo latou malamalama. “Sa ao ona avea lava i matou ma tagata sili atu ona o loo vaavaai mai pea tagata ia i matou,” o le tala lea a Liliana.
O le taumafai ina ia i ai se naunau o tagata i le talalelei e mafai ona avea ma se faagasologa alualu lemu. E pei foi o le tulafono faaletino o le seleselega, o le tulafono faaleagaga o le seleselega e manaomia ai foi le onosai. Ae ona o le ola ai pea e le aunoa o le aiga i mataupu faavae o le talalelei, ua mafai ai ona iloa ma faaaloalo ia tagata i o latou tulaga faatonuina o le Au Paia o Aso e Gata Ai.
O le taimi muamua, sa faigaluega ai ia Oscar i le malo, sa ia le taliaina pea le kofe, lauti, ma le ava malosi. “Ina ua mavae ni nai tausaga,” sa ia fai mai ai, “sa amata ona malamalama ma lagolagoina o ia e ana uo faigaluega ma latou faapea mai, ‘O le a se ituaiga vaiinu e te fia manao ai?’ O nisi taimi sa oo lava ina latou fia malamalama i le Ekalesia. O le seleselega lena.”
O le nofoaga o loo matuai tele ai lava le seleselega faaleagaga o le aoaoina ma le ola ai i mataupu faavae o le talalelei, o totonu lea o le aiga lava ia.
Ua oo mai le seleselega e ala mai i faamanuiaga o le auaunaga a Oscar o se peteriaka i le Siteki a Trelew Atenitina i Matu, mai le auaunaga a Liliana o se peresitene o le Aualofa o le paranesi, ma mai isi auaunaga faaopoopo na tuuina atu i le anoanoai o isi valaauga o tagata o le aiga sa faataunuuina i le aluga o tausaga.
Na oo mai le seleselega mai le tausiaina o le paia o le aso Sapati ma e ala i le tausia o le tulafono o le sefuluai. “E toina moni mai lava ia pupuni o le lagi—a le o le taimi nei lava, ia e auala mai i se faagasologa o le usiusitai faifai pea,” o le tala lea a Oscar.
Ua oo mai le seleselega i le faauuga o le fanau uma a le au Filipponi mai le aoga maualuga faatasi ai ma atalii uma e toafa ua maea mai a latou misiona. O a latou aoga ma auaunaga faafaifeautalai ua latou maua ai ni avanoa faigaluega ma faaletaitai lea semanu latou te le mauaina mai se isi lava mea.
Ua oo mai le seleselega i fesili ia na maua e María Céleste mai ana uo o e na fia malamalama i auaunaga faafaifeautalai faamisiona a ona tuagane, i ona talitonuga faalelotu, ma pe aisea e le fia alu ai o ia i pati lea e tuai ona amata i po o Aso Toonai.
Ma ua oo mai le seleselega mai musumusuga ma uunaiga toafilemu a le Agaga Paia, lea na fesoasoani i le taofia ai o le aiga mai se faalavelave i le tuneva o se tasi po ina ua latou manatu ua talepe e tagata lo latou fale. Sa ala ae i luga ia Tanielu ina ua ia faalogoina se pa’o ma sa sauni e puipui le fale, ae peitai o le tagata lea na faapea o se gaoi o le tuaoi lea na sau e fia maua se fesoasoani ua leaga lana taavale.
“Sa ou iloa le faatoafilemuina o a’u e le Agaga ina ia mafai ona ou foiaina le faafitauli e ala i lou le soona vevesi vale,” o le tala lea a Tanielu. “Ina ua mavae lena mea sa matou tatalo ma faafetai atu i le Tama Faalelagi e le’i i ai se mea leaga na tupu.”
Afai tatou te tuuina atu ma le faamaoni i tatou lava i le Atua, sa fai mai ai tagata o le aiga o le au Filipponi, o le a Ia faamanuiaina i tatou i o tatou manaoga ma o le a avea i tatou ma meafaigaluega i Ona aao. O se faagasologa e manaomia ai le maelega, onosai, faapea ma le tatalo. E manaomia ai foi le tele o le faatuatua ma galuega. Peitai o le a oo mai lava le seleselega, i le taimi a le Alii lava ia.
Ata o le aiga na pueina e Michael R. Morris