Faaaogaina ma le Atamai o le Faitalia

O se tasi o upumoni sili ona taua e mafai ona tatou aoaoina i lo tatou talavou e faapea o le saolotoga moni ma le fiafia tumau e oo mai i le faaaogaina o lo tatou faitalia e tausia ai poloaiga a le Atua.¹ O itulau e 52–53 o lenei lomiga, o loo faamamafa atu ai e Elder Shayne M. Bowen o le Fitugafulu lenei mataupu faavae.

“Ua ia te outou le gafatia e maua ai mea uma o i ai i le Tama. O le filifiliga e a oe lea,” sa ia tau atu i le autalavou.

I se lalolagi ua faatumulia i le amioleaga ma le lamatia, ua i ai i matua se matafaioi taua i le sauniaina o a latou fanau ina ia faia filifiliga sao ma ia manumalo mai i faaosoosoga. O le mea moni, ua poloaiina e le Alii ia matua “ia tausi ae a [latou] fanau i le malamalama ma le upumoni” (MF&F 93:40).

Ua saunia e le Ekalesia ia punaoa mo matua ina ia fesoasoani ai i a latou fanau e aoao ma ola ai i lenei tulaga faatonuina. Atonu o le a aoga ia fautuaga nei.

Fautuaga mo le Aoaoina o le Autalavou

Faitau faatasi ma lau fanau talavou le vaega o le faitalia ma le tali atu mo oe lava ia i le Mo Le Malosi o le Autalavou. O le faia o lena mea o le a e maua ai se avanoa e talanoaina ai ia tulaga faatonuina ma tali ai soo se fesili o i ai i lou atalii po o lou afafine.
Faitau i le tusiga a Elder Bowen i itulau e 52-53 i le lomiga lenei. Mafaufau e faaaoga le tala e uiga i le fafagaina o le luko sa’o e fesoasoani ai i lau fanau talavou ia malamalama i le taua o le faia o faaiuga lelei.
Alu i le youth.lds.org, kiliki i le “Mo Le Malosi o le Autalavou” i lalo o le “Youth Menu,” ona kiliki lea i le “Faitalia ma le Tali Atu mo Oe Lava Ia.” O le a e maua ai iina ni mau faasino, vitio, fesili ma tali, ma ni tusiga.
Mafaufau e fai se afiafi faaleaiga po o se faigalotu faaleaiga i le taua o le lototele ma le tu atu mo mea tatou te talitonu i ai.²

Fautuaga mo le Aoaoina o Tamaiti

O Le Aumaia o le Peraimeri i le Fale i lenei masina o loo faatatau lea i le filifiliga e tausia ia poloaiga (tagai i itulau 64–65 i le lomiga lenei). Faitau faatasi ma le aiga le tala ma fai atu i lau tama e faamaumau le aofaiga o faaiuga na faia i totonu o le tala. Faamalamalama atu e faatagaina i tatou e le Tama Faalelagi e faia ni faaiuga ina ia mafai ai ona tatou aoao ma tuputupu ae. Faasoa atu nisi o mea sa e aoaoina mai i le faia o ni faaiuga.
Faamaea le Gaoioiga a le FMT i totonu o le Aumaia o le Peraimeri i le Fale. Ona talanoa lea e uiga i taunuuga o le faia o ni filifiliga lelei. Faasoa atu lau molimau e uiga i faamanuiaga sa e mauaina i le faia o ni faaiuga amiotonu.
Mo nisi manatu faaopoopo e faatatau i le aoaoina atu o le faitalia ma le tali atu mo oe lava, tagai i le vaega o le 2012 Otootoga mo le Taimi o Fetufaaiga o Ianuari (i luga o le initoneti i le lds.org/callings/primary/sharing-time-2012).

Ata na tusia e Scott Greer