Mo Le Malosi o le Autalavou
Faitalia ma le Tali Atu mo Oe Lava Ia
E i ai se tala faapea o se Initia Amerika matua lava na aoaoina le atalii o lona atalii e uiga i le olaga. “O loo tupu se taua i totonu ia te au,” na ia fai atu ai i le tamaitiiti.
“O se taua matautia, i le va o ni luko se lua. O le tasi e leaga: O ia o ita, lotoleaga, faanoanoa, le faamalieina, faaloloto, faasausili, manatu maualalo ia te ia lava, tausalaina, inoino, vaivaiga, pepelo, faamaualuga valea, fia sili, ma le manatu faapito.”
Na ia faaauau, “O le isi e lelei: o ia o olioli, filemu, alofa, faamoemoe, toafilemu, lotomaualalo, agaalofa, agalelei, tiga alofa, loto alofa, upumoni, galuega alofa, ma faatuatua. O le taua foi lena e tasi o loo tupu i totonu ia te oe—ma totonu foi o isi tagata uma.”
Ata na tusia e Allen Garns
Na mafaufau le atalii laitiiti mo sina taimi ona fesili lea i lona tama matua, “O lē fea luko o le a manumalo?”
Na tali vave atu le Initia Amerika matua, “O le luko e te fafagaina.”
Faitalia ma le Muai Olaga
I aso a la ua leva, a o tatou i ai i le afioaga o lo tatou Tama i le Lagi, na faia ai se Fono Tele. I lena fonotaga na tuuina mai ai e lo tatou Tama, ma finagalo ina ia tatou maua le fiafia ma le olioli lava lea e tasi o loo Ia olioli ai, Lana fuafuaga e mafai ai ona tatou o mai i lenei lalolagi, maua se tino faaletino, ma tofo i le oona ma le suamalie o lenei olaga. E mafai ona tatou filifili e tausi Ana poloaiga ma avea faapei o Ia pe filifili e le tausia Ana poloaiga ma tatou le maua ai e i tatou lava le olioli ma faamanuiaga ua Ia folafola mai.
O se vaega totonugalemu o le fuafuaga a lo tatou Tama o le mafai lea ona tatou saoloto e filifili. O lenei meaalofa e taua o le faitalia, o le mana e filifili ai. O le soa a le faitalia i taimi uma lava o le tali atu o le tagata mo ia lava. E tali atu i tatou taitoatasi e tusa ai ma filifiliga tatou te faia.
Ina ua fesili le Tama Faalelagi po o ai o le a faataunuuina le fuafuaga, na ofo atu Lusifelo e faaolaina tagata uma lava i lalo o ana tuutuuga, lea o le a le taliaina ai le faitalia ma o le a ia maua uma ai le mamalu. O lenei mea o le a faaleaogaina ai le fuafuaga faavavau a le Atua mo le fiafia.
Na ofo atu e Iesu Keriso o Ia lava e avea ma Faaola i le fuafuaga a le Tama. Na filifili o Ia e usitai i le fuafuaga a le Tama. Tatou te tuu atu lo tatou faatuatua i lo tatou uso matua o Iesu Keriso, i le iloaina o Lana misiona e taua e mafai ai ona tatou toe foi atu i le malo o lo tatou Tama.
O le a le mea na tupu ia Lusifelo? Na fetalai atu le Tama:
“O le mea lea, ona sa fouvale Satani ia te au, ma saili e faaumatia le faitalia a le tagata, lea na tuu atu e Au, o le Alii le Atua ia te ia, ma le tasi foi, ia Ou avatu ia te ia lou lava mana; i le mana o lau Toatasi na Fanaua, na Ou faia ai ia lafoina o ia i lalo;
“Ma sa avea o ia ma Satani, ioe, o le tiapolo lava lea, o le tamā o pepelo uma lava, e faasese ma faatauaso tagata, ma ta’ita’i faatagataotaua i lona loto, le toatele lava lea o i latou o e e le faalogo i lo’u leo” (Mose 4:3–4).
Ona o le faitalia o se mataupu faavae e faavavau ma o le a le solia ai e le Tama Faalelagi, ua leiloloa mai ia te Ia le tasi-vae tolu o Ana fanau, o e na filifili e mulimuli ia Satani.
Faitalia ma le Olaga Faaletino
O le a la le faamoemoega o le olaga i lenei lalolagi? O se tasi o faamoemoega autu o le faaalia lea o lo tatou faatuatua (tagai i le Aperaamo 3:24–25). O loo ia i tatou le tomai e iloa ai le sao mai le sese. O loo ia i tatou le mana na tuuina mai ia i tatou e le Atua “e fai … ae le faamalosia” (2 Nifae 2:26). Mulimuli ane, o le a tatou mauaina le malo o loo tatou manaomia e tusa ai ma poloaiga tatou te usitaia, o sauniga tatou te mauaina, ma feagaiga tatou te tausia.
E pei lava ona faamalamalamaina e le Initia Amerika matua ma atamai, e pau lava ia te ia po o le fea o luko e na te fafagaina. O loo ia te ia le faitalia, ma e tali atu lava o ia mo ana lava filifiliga. E ao lava ona ia ola faatasi ma taunuuga o ana filifiliga.
O outou o le autalavou o le tupuaga tautupu. Ua auina mai outou i le lalolagi ina ua i ai le atoaga o le talalelei iinei. Ua papatisoina outou ma faamauina ina ia mafai ona outou maua, pe a outou mananao i ai, le Agaga Paia e avea ma a outou soa tumau. Ua outou osia feagaiga o le papatisoga. Ma alii talavou, ua outou osia ni feagaiga faaopoopo o le perisitua.
Ua ia te outou le faitalia e filifili ai le ola faavavau e ala i le tausia o outou lava ia mama ma agavaa e ulu atu i le malumalu paia o le Atua ma maua sauniga ia o le a mafai ai ona outou toe foi atu i le afioaga o le Tama. E mafai ona outou filifilia le faamanuiaga o le ola faavavau, ia ola i le olaga o loo soifua ai le Atua mo le faavavau atoa faatasi ma lou aiga. O loo ia te outou le gafatia e maua ai mea uma o loo i le Tama. O le filifiliga e a oe lea.
Faaaoga ma le atamai lou faitalia ua tuuina mai e le Atua.