Faamanuiaina e ala i Faataitaiga
E pei lava ona uunaia e au uo lo’u olaga, e mafai ona outou faasusulu atu le malamalama o le talalelei i olaga o a outou uo e ala i le auala tou te ola ai.
Talu ai nei na ma faatasi ai ma se uo na ou iloa i le aoga maualuga. Na ma talanoa i le taimi muamua na ma feiloai ai, e uiga i le olioli e oo mai ona o le ola i le talalelei, ma le uunaiga a uo i o ma olaga. O le mea moni lava, o faataitaiga a au uo na ala ai ona ou auai i le Ekalesia.
Na faatoa ou sau i le Iunaite Setete mai Amerika Samoa ina ua 10 ou tausaga aua sa manao lo’u tama ia maua e lana fanau ni avanoa faaleaoaoga ia sili atu nai lo ia. Na ou nofo i Seattle, Uosigitone, faatasi ma se tina ma se tama o le aiga. I le 14 o ou tausaga, na ou masii atu ai i Kalefonia. O lou tina matua, na ma nonofo, sa avea ma se tagata faigaluega i le Malumalu o Los Angeles Kalefonia, ae sa lei avea au ma se tagata o le Ekalesia.
I lou tausaga muamua i le aoga maualuga, na ou aofia ai i le au taitai o le aoga ma na ou matauina ai nai tamaiti i le au taitai sa tulaga ese mai isi tamaiti. Na faaaloalo i latou i isi, mama i le gagana ma ofu, ma na i ai se malualii ma le malamalama ia i latou na ou gauai atu i ai. Na oo ina matou faauo, ma na latou valaaulia au matou te o i le Mutuale. Na ou fiafia i gaoioiga malie ma faafiafialoto, ma le Agaga na ou lagonaina iina, ma na amata ona ou auai soo. I ni nai vaiaso mulimuli ane na faailoa atu ai au e au uo i faifeautalai ma le Tusi a Mamona. Na vave ona ou papatiso mulimuli ane ma amata se suesuega i le olaga atoa o le Tusi a Mamona.
Na mulimuli au uo i le fautuaga i le 1 Timoteo 4:12: “Ia fai oe ma faaaoao i e ua faatuatua, i le upu, ma le amio, ma le alofa, ma le loto, ma le faatuatua, ma le le gaoia.” E pei o au uo, e mafai foi ona avea i tatou ma faatosinaga mo le lelei ia tatou taga i lea aso ma lea aso i le ola ai i le talalelei. A tatou ola i o tatou olaga e faasusulu atu o tatou tulaga faatonuina ma talitonuga, o i latou ua saunia e talia le talalelei o le a matauina ma o le a fia iloa atili.
Mo se faataitaiga, manatua le tala ia Alema o loo maua i le Tusi a Mamona. Sa ola Alema i se olaga toafimalie i le avea ai ma se faitaulaga i le maota o le Tupu o Noa. Ina ua tuuina atu e Apinati lana molimau, na talitonu Alema ia te ia ma, faatasi ai ma le lamatia tele o ia lava, na ia tusia i lalo upu a Apinati ma aoao atu isi e uiga i le Faaola (tagai i le Mosaea 17:2–4).
“Ma sa oo ina ua mavae ni aso e tele sa toatele se vaega o tagata sa faapotopoto atu i le nofoaga lea o Mamona, e faalogologo i upu a Alema. Ioe, sa faapotopoto faatasi i latou uma o e na talitonu i ana upu e faalogologo ia te ia. Ma sa aoaoina i latou, ma talai atu ia te i latou le salamo, ma le togiola, ma le faatuatua i le Alii” (Mosaea 18:7; tagai foi i fuaiupu 1–6).
Mulimuli ane, ina ua avea Alema le Itiiti ma faafitauli i le Ekalesia, na tali mai se agelu i tatalo a Alema: “Ua faafofogaina e le Alii talosaga a lona nuu, ma talosaga foi a lana auauna, o Alema, o le o lou tama; ona sa tatalo atu o ia ma le faatuatua tele e uiga ia te oe, ina ia mafai ona aumai o oe i le malamalama o le upumoni” (Mosaea 27:14). Na salamo Alema le Itiiti ma ana uo, na avea ma faifeautalai maoae, ma na pai atu i olaga o le fia afe o tagata i a latou faataitaiga lelei.
“Ma sa faapea ona avea o i latou ma meafaigaluega i aao o le Atua i le aumaia o le toatele i le malamalama o le upumoni, ioe, i le malamalama o lo tatou Togiola.
“Ma amuia lava i latou! Ona sa latou tala atu le filemu; sa latou tala atu tala e lelei o mea lelei; ma sa latou tautino atu i tagata o loo nofotupu le Alii” (Mosaea 27:36–37).
Na faia foi e au uo se faataitaiga lelei mo au ina ua latou filifili e auauna atu i ni misiona. E ui lava na ou feagai ma ni mea faatautee, ae na ou filifili ou te manao foi e auauna atu i se misiona. O lena faaiuga na faatulaga ai le vaega o totoe o lou olaga. A o ou auauna atu i le Misiona a Apia Samoa, na faatino e faifeautalai le tele o tiutetauave o le taitaiga faaleperisitua, ma na mafai ona ou vaaia le manaomia ona faamalosia o le Ekalesia i atumotu. Na ou faia lau faaiuga e fai lau vaega—o le a ou toe foi i Samoa pe a maea lau misiona ma lau aoga.
Ina ua maea le faauuga mai le iunivesite, na ma masii atu ma lou toalua i Samoa, lea na ma tausia ai le ma fanau ma galulue ai e faamalosia le Ekalesia ma le nuu. O lou tama, e le o se tagata o le Ekalesia, sa aofia malosi o ia i pisinisi i le lotoifale ma mataupu faalenuu. O lana mautauave o le “Afai e taua le faia, e taua le fai ia sao.” A o matou mauaina ma ou uso ma tuafafine le talalelei ma ola ai i le mea sili matou te mafaia, na ia matauina ni suiga mo le lelei i o matou olaga. I le 2000, na nofo ai Peresitene Gordon B. Hinckley (1910–2008) i le fale o lo’u tama ina ua foi mai o ia mai le faapaiaga o le malumalu o Suva i Fiti. I le taimi o lena asiasiga, na pai atu ai le Agaga i le loto o lo’u tama, ma na faamanuiaina au e papatiso o ia ina ua 82 ona tausaga. Na ia maua se olioli sili i le talalelei ma na le maasiasi o ia ae na lototoa i le faasoaina atu o le talalelei i isi i toe aso o lona olaga.
Ou te iloa le taua o le avea ma se faataitaiga o e talitonu ma le fiafia na te aumai i o tatou olaga ma olaga o isi. Ona o faataitaiga lelei a au uo ma le alofa o se perofeta, ua faamanuiaina ai lo’u aiga ma au i le olioli e aumai e le talalelei.
Tatou te uunaia i aso uma isi e ala ia tatou taga. Ia tatou mautinoa e aapa atu i isi ma faasoa atu le upumoni o lenei mau ina ia mafai ona ia aumaia le fiafia i o latou foi olaga. “Ia manatua, ia manatua o luga lava o le papa o lo tatou Togiola, o Keriso lea, le Alo o le Atua, e ao ina oulua atinae ai lo oulua faavae; ina ia pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi, o le a leai sona mana i luga o oulua e toso ifo ai oulua i lalo i le to o le pagatia ma le malaia e le gata, ona o le papa lea ua oulua atinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou” (Helamana 5:12).
Agavale: Apinati o loo tu i luma o le Tupu o Noa, saunia e Arnold Friberg © IRI 1951; taumatau: Alema o loo Papatiso i le Vai o Mamona, saunia e Arnold Friberg © IRI 1951
Ata na tusia e Jerry Thompson © IRI