Fefaasoaai ma se Uo

Saunia e Adriana Vásquez, Colombia

I se tasi aso ao ou suesue mo lau vasega seminare, sa ou maua se uunaiga matagofie ma manino. Ao ou faitauina le lesona mo le aso e sosoo ai, sa ou vaaia foliga o se uo mai le aoga ma sa maua se lagona malosi e tatau ona ou faasoa atu lau molimau ia te ia.

E ui i le manino o lenei musumusuga, sa ou fefe. Sa ou popole nei teena au e la’u uo, aemaise lava ona e le foliga mai o ia o se ituaiga tamaitai e fiafia e auai i le Ekalesia.

Sa ou toe mafaufau i le lauga a Sister Mary N. Cook o le au peresitene aoao a Tamaitai Talavou lea na ia luitauina i tatou ina ia galulue malolosi ma ia lotototoa.¹ Sa ou manao ina ia ou faapena, ma o lea sa ou tusi atu ai i lenei tamaitai ma molimau atu e uiga i le moni o le Ekalesia atoa ai ma lou fiafia i le Tusi a Mamona. O le aso na sosoo ai sa ou momonoina ai se kopi o le Tusi a Mamona, faatasi ai ma la’u tusi, i totonu o lana ato.

Sa ou ofo, sa matua fiafia lava la’u uo i le talalelei. Amata mai lena aso, na te tauina mai ia te au mea sa ia aoaoina i lana suesuega o le Tusi a Mamona. O ni nai vaiaso mulimuli ane, sa ou faailoa atu ai o ia i faafeautalai. E lei leva lava, ae ona mauaina se faamaoniga mai le Agaga Paia faapea o mea sa ia aoaoina e moni. Sa matou fetagisi ma faaifeautalai ina ua ia tau maia ia i matou ona lagona. E lei leva ae papatiso la’u uo, ma sa ofo ona matua i le vaaia o ni suiga lea na oo ia te ia.

Ou te matuai fiafia lava sa mafai ona ou foia ou popolega ma fesoasoani i le auina atu o le talalelei i lona olaga.