Faafiafiaga ma Ala o Faasalalauga

Ua faatumulia o tatou malo i filifiliga o ala o faasalalauga. E tatau ona tatou faaeteete pe o a ata ma mafaufauga tatou te faatagaina i o tatou mafaufau ona “soo se mea lava [tatou te] faitauina, faalogo i ai, pe vaai i ai e i ai se aafiaga ia i [tatou]” (Mo Le Malosi o le Autalavou [tamaitusi, 2011], 11). O loo tusia e Adrián Ochoa, fesoasoani lua i le au peresitene aoao o Alii Talavou e uiga i faafiafiaga ma ala o faasalalauga i le itulau 48 o le lomiga lenei.

“Manatua o le mea moni lava o loo e i ai iinei i lenei olaga e atiina ae lou faatuatua, ia tofotofoina, ma ia aoao ma ia fiafia,” sa ia tusia ai. “I le avea ai ma se tagata o le Ekalesia moni a Keriso, ua ia te oe le mana sili e fesoasoani ai ia te oe. Ua ia te oe le mana o le Agaga Paia e lapataia oe pe afai e le o sa’o se mea o i ai i ou luma. O loo ia te oe foi le mana o le faitalia, ina ia mafai ai ona e filifili le mea o le a e faia ma le mea o le a e le faia.”

Fautuaga mo le Aoao Atu o le Autalavou

Talatalanoa faatasi ma lau autalavou i ni ata tifaga tou te matamata ai faatasi o se aiga. Faalogologo i musika o loo latou faaaogaina. Mafaufau faatasi pe faapefea e na ala o faasalalauga ona fuatiaina ia tulaga faatonuina o loo i le Mo Le Malosi o le Autalavou.
Alu i le youth.lds.org ma kiliki i le “For the Strength of Youth” i lalo o le Youth Menu. O iina o le a e maua ai ia vitio, mau faasino o tusitusiga paia, polokalama o le leitio o le Mormon Channel, fesili ma tali, ma tusiga (mo se faataitaiga, tagai i le “Getting Real”), e aofia ai lauga a le Au Pulega Aoao.
Mafaufau e fai se afiafi faaleaiga e uiga i le taua o le filifilia o ala o faasalalauga lelei (o se punaoa lelei lava o le lauga a David A. Bednar, “O Mea E Pei Ona I ai Lava,” Liahona, Iuni 2010, 22–31.

Fautuaga mo le Aoao Atu o Tamaiti

I le tala “O Le Tulafono o le Faatulagaga,” o loo maua i le itulau 70, sa iloa ai e Ethan ia ala o faasalalauga sa saogalemu mo ia e faaaoga ona sa talanoaina e lona aiga. E mafai ona e faitau faatasi ma lau fanau i lenei tusiga ma amata sa outou lava talanoaga e faaaoga ai fesili nei:

O ai e mafai ona fesoasoani ia i tatou e fai ni faaiuga lelei e uiga i ala o faasalalauga ma faafiafiaga?
O a ala o faasalalauga e lelei mo i tatou e matamata i ai, faitau, pe faalogologo foi i ai?
O a taimi e LELEI ai le faaaogaina o ala o faasalalauga?
O fea e tatau ona tatou faaaogaina ai ala o faasalalauga?
Aisea e taua ai ona faaeteete i faafiafiaga?

Mafaufau e fai se taiala faaleaiga o ala o faasalalauga e ala i le gauluaina o pepa ma faapipii faatasi i le gauga e fatu ai se tamaitusi. I itulau taitasi, e mafai ona e tusia ai se ituaiga o ala o faasalalauga e faaaoga i lou aiga, faatasi ai ma tulaga faatonuina faaleaiga ma fautuaga faaperofeta lea e faatatau i lena ala o faasalalauga.

E mafai foi ona e faitauina le “Tape ma Ta’u Mai” saunia e Danielle Kennington (Liahona, Iuni 2011, 64) e fesoasoani ai ia te oe e amatalia se talanoaga e uiga i le faaaogaina ma le tatau o ala o faasalalauga.

Ata na tusia e Taia Morley